مجمع الزوائد ومنبع الفوائد

سیدنا سہل بن حنیف رضی اللہ عنہ بیان کرتے ہیں : نبی اکرم صلی اللہ علیہ وسلم نے فرمایا : تم اہل مکہ کی طرف پیغام رساں ہو ! تم یہ بتا دینا : بے شک اللہ کے رسول نے تم لوگوں کو سلام کہا: ہے ، اور تمہیں تین باتوں کا حکم دیا ہے ، تم لوگ غیر اللہ کے نام پر حلف نہ اٹھانا ، جب تم قضائے حاجت کرو ، تو قبلہ کی طرف رخ نہ کرنا اور پیٹھ نہ کرنا ، اور تم ہڈی کے ذریعے ، یا مینگنی کے ذریعے استنجاء نہ کرنا
یہ روایت امام أحمد نے نقل کی ہے ، اس کی سند میں ایک راوی عبدالکریم بن ابوالمخارق ہے اور وہ ضعیف ہے ۔

انصار سے تعلق رکھنے والے ایک صاحب ، اپنے والد کے حوالے سے یہ بات نقل کرتے ہیں : نبی اکرم صلی اللہ علیہ وسلم نے اس بات سے منع کیا ہے کہ ہم پیشاب ، یا پاخانہ کرتے ہوئے ، دونوں قبلوں ( میں سے کسی ) کی طرف رخ کریں ۔
یہ روایت امام أحمد نے نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ۔

نافع بیان کرتے ہیں : عبداللہ بن عمرو عجلانی نے سیدنا عبداللہ بن عمر رضی اللہ عنہما کو اپنے ( یا شاید ان کے ) والد کے حوالے سے یہ بات بیان کی : کہ نبی اکرم صلی اللہ علیہ وسلم نے اس بات سے منع کیا ہے کہ پیشاب ، یا پاخانہ کرتے ہوئے ، دونوں کے قبلوں میں سے کسی کی طرف رخ کیا جائے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبداللہ بن نافع ہے اور وہ ضعیف ہے ۔

سیدنا سہل بن سعد رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب کوئی شخص قضائے حاجت کے لیے جائے ، تو وہ قبلہ کی طرف رخ یا پیٹھ نہ کرے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی محمد بن عمر واقدی ہے اور وہ ضعیف ہے ۔

سیدنا عبداللہ بن حارث بن جزء زبیدی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو قبلہ کی طرف رخ کر کے پیشاب کرتے ہوئے دیکھا ہے ، اور میں نے لوگوں کو اس بارے میں سب سے پہلے بیان کیا ۔ علامہ ہیثمی فرماتے ہیں : ) میں یہ کہتا ہوں : امام ابن ماجہ نے ان صحابی کے حوالے سے روایت نقل کی ہے : کہ یہ صحابی وہ پہلے شخص ہیں ، جنہوں نے نبی اکرم صلی اللہ علیہ وسلم کو اس چیز سے منع کرتے ہوئے سنا ، تو یہ چیز اس کے منسوخ ہونے پر دلالت کرتی ہے ۔
یہ روایت امام أحمد نے نقل کی ہے اس کی سند میں ایک راوی ابن لہیعہ ہے اور وہ ضعیف ہے ۔

سیدنا عمار بن یاسر رضی اللہ عنہ بیان کرتے ہیں : ( قبلہ کی طرف رخ کر کے ) پاخانہ یا پیشاب کرنے کی ممانعت کے بعد ، میں نے نبی اکرم صلی اللہ علیہ وسلم کو قبلہ کی طرف رخ کر کے ( پیشاب کرتے ہوئے ) دیکھا ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی جعفر بن زبیر ہے ، جس کے ضعیف ہونے پر محدثین کا اتفاق ہے ۔

سیدنا ابوہریرہ رضی اللہ عنہ روایت کرتے ہیں : نبی کریم صلی اللہ علیہ وسلم نے ارشاد فرمایا ہے : ” جو شخص پاخانہ کرتے ہوئے قبلہ کی طرف رخ نہیں کرتا اور پیٹھ نہیں کرتا ، اُس کے لیے ایک نیکی نوٹ کی جاتی ہے اور اس کا ایک گناہ مٹا دیا جاتا ہے “ ۔
یہ روایت امام طبرانی نے معجم اوسط میں نقل کی ہے ، اور اس کے رجال صحیح کے رجال ہیں ، البتہ امام طبرانی کے استاد اور ان کے استاد کے استاد کا معاملہ مختلف ہے ، ویسے یہ دونوں ثقہ ہیں ۔