مجمع الزوائد ومنبع الفوائد

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کے حوالے سے یہ بات نقل کرتے ہیں : بنی اسرائیل میں ایک کتیا تھی جو شور مچانے والی تھی ۔ ایک مرتبہ اس کے مالکان کے ہاں مہمان آ گئے ، تو اس نے یہ سوچا آج رات میں مہمان کی وجہ سے نہیں بھونکوں گی ، تو اس نے اپنے پلے کو پیٹ کے ساتھ لگا لیا ، تو اُن میں سے ایک شخص کی طرف یہ بات وحی کی گئی : کہ اُس کتیا کی مثال اس امت کی مانند ہے ، جو تم لوگوں کے بعد آئے گی ، جس کے بے وقوف لوگ ، اُس کے علماء پر غالب آ جائیں گے ۔
یہ روایت امام طبرانی نے معجم اوسط میں نقل کی ہے ، امام أحمد نے اس کی مانند روایت نقل کی ہے ، تاہم امام أحمد کی روایت میں یہ الفاظ ہیں : ” اُس کے بے وقوف لوگ اُس کے علماء پر غلبہ حاصل کر لیں گے ۔ “ یہ روایت فتنوں سے متعلق باب میں آگے آئے گی ، اس کی سند میں ایک راوی شعیب بن صفوان ہے ، جسے ابن حبان نے ثقہ قرار دیا ہے ، جبکہ یحیی نے اسے ضعیف قرار دیا ہے اور عطاء بن سائب نامی راوی اختلاط کا شکار ہو گیا تھا ۔