مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جس شخص سے علم کی کسی بات کے بارے میں سوال کیا جائے اور وہ اُسے چھپا لے ، تو جب وہ قیامت کے دن آئے گا ، تو اسے آگ کی بنی ہوئی لگام ڈالی گئی ہو گی ، اور جو شخص علم نہ ہونے کے باوجود قرآن کے بارے میں کچھ کہے گا ، جب وہ قیامت کے دن آئے گا ، تو اُسے آگ سے بنی ہوئی لگام ڈالی گئی ہو گی ۔ “
یہ روایت امام ابویعلیٰ نے نقل کی ہے ، امام طبرانی نے معجم کبیر میں اسے مختصر روایت کے طور پر نقل کیا ہے ، جو صرف قرآن کے بارے میں ہے ، امام ابویعلیٰ کے رجال صحیح کے رجال ہیں ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص علم کی کوئی بات چھپائے ، جس کو وہ جانتا ہو ، تو اسے قیامت کے دن آگ کی لگام ڈالی جائے گی ۔ “ وہ فرماتے ہیں : یہ ( یعنی اس سے مراد ) گواہی ہے ، جو کسی شخص کے پاس ہوتی ہے ، اور پھر اسے اس گواہی کے لئے بلایا جاتا ہے یا بلایا نہیں جاتا ہے ، لیکن وہ اس چیز کے بارے میں علم رکھتا ہے اور پھر وہ اُس گواہی سے متعلقہ فرد کی رہنمائی اُس کی طرف نہیں کرتا ، تو یہاں اس بات کا علم ہونا مراد ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابراہیم بن ایوب فرسانی ہے اور وہ مجہول ہے ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جس شخص سے علم کی کسی بات کے بارے میں سوال کیا جائے اور وہ اُسے چھپا لے ، تو قیامت کے دن اُسے آگ کی بنی ہوئی لگام ڈالی جائے گی ۔ “
یہ روایت امام طبرانی نے معجم کبیر اور معجم اوسط میں نقل کی ہے اور اس کے رجال کی توثیق کی گئی ہے ۔

سیدنا عبداللہ بن مسعود رضی اللہ عنہ وہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جس بھی بندے کو اللہ تعالیٰ نے علم عطا کیا ہو اور وہ اُس کو چھپا لے ، تو جب قیامت کے دن اللہ تعالیٰ کی بارگاہ میں حاضر ہو گا ، تو اس کو آگ کی بنی ہوئی لگام ڈالی گئی ہو گی ۔ “
یہ روایت امام طبرانی نے معجم اوسط میں اس طرح نقل کی ہے جبکہ معجم کبیر میں انہوں نے یہ الفاظ نقل کیے ہیں : ” جس شخص سے علم کی کسی بات کے بارے میں سوال کیا جائے اور وہ اُسے چھپا لے ، تو قیامت کے دن اُسے آگ کی بنی ہوئی لگام ڈالی جائے گی ۔ “ معجم اوسط کی سند میں ایک راوی نضر بن سعید ہے ، جسے عقیلی نے ضعیف قرار دیا ہے ، جبکہ مجھے کبیر کی سند میں ایک راوی سوار بن مصعب ہے اور وہ متروک ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جس شخص سے علم کے بارے میں سوال کیا جائے اور وہ اسے چھپا لے ، جب اُس شخص کو قیامت کے دن لایا جائے گا تو اُسے آگ کی لگام ڈالی گئی ہو گی ۔ “
یہ روایت امام طبرانی نے معجم اوسط میں نقل کی ہے اس کی سند میں ایک راوی حسان بن سیاہ ہے جسے ابن عدی ، ابن حبان اور دارقطنی نے ضعیف قرار دیا ہے ۔

سیدنا سعد بن مدحاس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : “” “” جو شخص کسی چیز کا علم رکھتا ہو تو وہ اسے نہ چھپائے اور جس شخص کے آنکھوں سے اللہ تعالیٰ کے خوف کی وجہ سے آنسو جاری ہو جائیں ، اس شخص کے لئے یہ بات حلال نہیں ہو گی کہ وہ کبھی بھی جہنم میں داخل ہو ، البتہ رحمن کی بات پوری کرنے کا معاملہ مختلف ہے اور جو شخص میری طرف کوئی جھوٹی بات منسوب کرے ، اسے جہنم میں موجود گھر تک پہنچنے کے لیے تیار رہنا چاہیے ۔ “
یہ روایت امام طبرانی نے معجم کبیر میں نقل کی ہے ، اس کی سند میں ایک راوی سلیمان بن عبدالحمید ہے ، امام نسائی رحمہ اللہ فرماتے ہیں : یہ کذاب ہے ، ابن ابوحاتم کہتے ہیں : یہ صدوق ہے ، ابن حبان نے اسے ثقہ قرار دیا ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص علم حاصل کرتا ہے اور پھر اسے بیان نہیں کرتا ہے ، اُس کی مثال اس شخص کی مانند ہے جو خزانہ اکٹھا کر لیتا ہے ۔ اور خرچ نہیں کرتا ہے ۔ “
یہ روایت امام طبرانی نے معجم اوسط میں نقل کی ہے ، اس کی سند میں ایک راوی ابن لہیعہ ہے اور وہ ضعیف ہے ۔