مجمع الزوائد ومنبع الفوائد

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” سب سے پہلے بتوں کے نام پر جانور مخصوص کرنے اور بتوں کی عبادت کرنے کا آغاز ، خزاعہ کے جدامجد عمرو بن عامر نے کیا تھا ، میں نے اُسے دیکھا ہے کہ وہ جہنم میں اپنی آنتیں گھسیٹ رہا تھا “ ۔
یہ روایت امام أحمد نے نقل کی ہے ، اس کی سند میں ایک راوی ابراہیم ہجری ہے اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” سیدنا ابراہیم علیہ السلام کے دین میں ، سب سے پہلے جس شخص نے تبدیلی کی ، وہ عمرو بن لحی بن قمعہ بن خندف ہے ، جو خزاعہ کا جدامجد ہے “
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی صالح مولی توامہ ہے ، جس کے اختلاط کی وجہ سے اسے ضعیف قرار دیا گیا ہے ، لیکن ابن ابوذئب نے اُس کے اختلاط کا شکار ہونے سے پہلے اس سے سماع کیا تھا اور
یہ روایت بھی ان روایات میں سے ایک ہے ، جو ابن ابوذئب نے اُس سے نقل کی ہیں ۔

علقمہ بیان کرتے ہیں : ہم لوگ سیدہ عائشہ رضی اللہ عنہا کے پاس بیٹھے ہوئے تھے ، سیدنا ابوہریرہ رضی اللہ عنہ آئے ، تو سیدہ عائشہ رضی اللہ عنہا نے فرمایا : کیا تم یہ حدیث بیان کرتے ہو ؟ کہ ایک عورت کو بلی کی وجہ سے عذاب دیا گیا ، جس بلی کو اُس نے باندھ دیا تھا وہ عورت اُسے کچھ کھانے کے لیے نہیں دیتی تھی ، اور پینے کے لئے نہیں دیتی تھی ، تو سیدنا ابوہریرہ رضی اللہ عنہ نے بتایا : یہ بات میں نے اُن سے سنی ہے ، سیدنا ابوہریرہ رضی اللہ عنہ کی مراد نبی اکرم صلی اللہ علیہ وسلم تھے ، تو سیدہ عائشہ رضی اللہ عنہا نے فرمایا : کیا تم جانتے ہو ؟ وہ عورت کون تھی ؟ اُس عورت نے جو کچھ بھی کیا ، اُس کے ہمراہ وہ کافر بھی تھی ، اور مومن ، اللہ تعالیٰ کی بارگاہ میں اس سے بلند حیثیت رکھتا ہے ، کہ اللہ تعالیٰ کسی بلی کی وجہ سے اُسے عذاب دے ، جب تم نبی اکرم صلی اللہ علیہ وسلم کے حوالے سے کوئی حدیث بیان کرو ! تو اس بات کا جائزہ لے لیا کرو ! کہ تم کیا بیان کر رہے ہو ؟
یہ روایت امام أحمد نے نقل کی ہے اور اس کے رجال صحیح کے رجال ہیں ۔

ابورزین عقیلی ، اپنے چچا کا یہ بیان نقل کرتے ہیں : میں نے عرض کی : یا رسول اللہ ! میری والدہ کہاں ہیں ؟ آپ نے فرمایا : تمہاری والدہ جہنم میں ہے ، راوی بیان کرتے ہیں : میں نے دریافت کیا : آپ کے اہل خانہ میں سے جو لوگ ( دنیا سے ) رخصت ہو چکے ہیں ، وہ کہاں ہیں ؟ نبی اکرم صلی اللہ علیہ وسلم نے ارشاد فرمایا : کیا تم اس بات سے راضی نہیں ہو کہ تمہاری ماں ، میری ماں کے ساتھ ہو ۔
یہ روایت امام أحمد نے نقل کی ہے ، اس کو امام طبرانی نے معجم کبیر میں نقل کیا ہے اور اس کے رجال ثقہ ہیں ۔

سیدنا بریدہ رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ ( سفر کر رہے تھے ) آپ صلی اللہ علیہ وسلم نے ایک جگہ پڑاؤ کیا ، آپ کے ساتھ ہم لوگ تقریبا ایک ہزار سوار تھے ، نبی اکرم صلی اللہ علیہ وسلم نے دو رکعت ادا کیں ، پھر آپ نے ہماری طرف رخ کیا ، تو آپ کی آنکھوں سے آنسو جاری تھے ، سیدنا عمر رضی اللہ عنہ اُٹھ کر آپ کے پاس آئے اور یہ کہا: میرے ماں باپ آپ پر قربان ہوں اور دریافت کیا : یا رسول اللہ ! آپ کو کیا ہوا ہے ؟ نبی اکرم صلی اللہ علیہ وسلم نے فرمایا : میں نے اپنے پروردگار سے اپنی والدہ کے لئے دعائے مغفرت کی اجازت مانگی تھی ، تو اس نے مجھے اجازت نہیں دی ، تو اُس خاتون کے لیے رحمت کی وجہ سے میری آنکھوں سے آنسو جاری ہو گئے کہ وہ جہنم میں جائیں گی ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا بریدہ رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ تھے ، یہاں تک کہ ہم ” ودان “ کے مقام پر پہنچے ( راوی کو شک ہے ، یا شاید یہ الفاظ ہیں : ) کچھ قبروں کے پاس پہنچے ، تو نبی اکرم صلی اللہ علیہ وسلم نے اپنی والدہ کے لئے شفاعت کی دعا کی ( راوی بیان کرتے ہیں : میرا خیال ہے ، روایت میں یہ الفاظ بھی ہیں : ) تو سیدنا جبرائیل علیہ السلام نے نبی اکرم صلی اللہ علیہ وسلم کے سینے پر ہاتھ مارا ، اور وہ بولے : آپ اُس کے لیے دعائے مغفرت نہ کریں ، جو مشرک ہونے کے عالم میں مر گیا تھا ۔
یہ روایت امام بزار نے نقل کی ہے ، وہ بیان کرتے ہیں ، اس سند کے ساتھ ، اس روایت کو صرف محمد بن جابر نے سماک بن حرب سے نقل کیا ہے ۔ ( علامہ ہیثمی فرماتے ہیں : ) : میں یہ کہتا ہوں : میں نے کسی شخص کو محمد بن جابر نامی اس راوی کا ذکر کرتے ہوئے نہیں دیکھا ہے ۔

سیدنا عبداللہ بن عباس رضی اللہ عنہما بیان کرتے ہیں : جب نبی اکرم صلی اللہ علیہ وسلم غزوہ تبوک سے واپس تشریف لائے اور عمرہ کے لیے روانہ ہوئے ، تو جب ” عسفان “ نامی گھاٹی کے پاس پہنچے ، تو آپ نے اپنے اصحاب کو حکم دیا کہ وہ گھاٹی کے ساتھ ٹیک لگا کر رکھیں جب تک میں تم لوگوں کے پاس وقت نہیں آ جاتا ، نبی اکرم صلی اللہ علیہ وسلم تشریف لے گئے اور اپنی والدہ کی قبر کے پاس ٹھہرے ، آپ صلی اللہ علیہ وسلم نے اپنے پروردگار کی بارگاہ میں طویل مناجات کی ، پھر آپ رونے لگے اور بہت روئے ، یہاں تک کہ آپ کے رونے کی وجہ سے ، دوسرے لوگ بھی رونے لگے ، لوگوں نے دریافت کیا : اللہ کے نبی اس مقام پر کیوں روئے ہیں ؟ اس کی وجہ یہی ہو گی کہ آپ کی امت کے بارے میں کوئی ایسی چیز سامنے آئی ہو گی کہ آپ کو خود پر ق ابونہیں رہا ، جب لوگوں نے بھی رونا شروع کیا ، تو نبی اکرم صلی اللہ علیہ وسلم اُٹھے اور اُن لوگوں کے پاس واپس تشریف لائے ، تو آپ نے دریافت کیا : تم لوگ کیوں رو رہے ہو ؟ اُن لوگوں نے عرض کی : اے اللہ کے نبی ! آپ کے رونے کی وجہ سے ہم بھی رو رہے ہیں ، ہم نے کہا: ہم یہ سمجھے کہ شاید آپ کی امت کے بارے میں کوئی نئی چیز رونما ہوئی ہے ، جس کی آپ طاقت نہیں رکھتے ( یا جسے دیکھ کر آپ کو خود پر ق ابونہیں رہا ) نبی اکرم صلی اللہ علیہ وسلم نے فرمایا : جی نہیں ! ( یعنی ایسا نہیں ہے ) لیکن اس کا کچھ حصہ ہے ، میں اس قبر کے پاس آیا میں نے اللہ تعالیٰ سے دعا کی کہ وہ قیامت کے دن مجھے اُن کی شفاعت کرنے کی اجازت دے ، تو اللہ تعالیٰ نے مجھے اجازت دینے سے انکار کر دیا ، تو مجھے اس خاتون پر رحم آ گیا ، کیونکہ وہ میری والدہ ہیں ، تو میں رونے لگ گیا پھر جبرائیل میرے پاس آئے اور بولے : ( یعنی اُنہوں نے یہ آیات تلاوت کیں : ) ” ابراہیم نے اپنے باپ کے لئے جو استغفار کیا تھا ، وہ صرف ایک وعدے کی وجہ سے تھا ، جو اُس نے اس شخص کے ساتھ کیا تھا ، لیکن جب اُس ( یعنی ابراہیم ) کے سامنے یہ بات واضح ہو گئی کہ وہ شخص ، اللہ کا دشمن ہے ، تو اُس ( یعنی ابراہیم نے ) اس شخص سے لاتعلقی اختیار کی “ ۔ ( سیدنا جبرائیل علیہ السلام نے نبی اکرم صلی اللہ علیہ وسلم سے کہا: ) تو آپ صلی اللہ علیہ وسلم بھی اپنی والدہ سے اُسی طرح لاتعلقی اختیار کریں ، جس طرح سیدنا ابراہیم علیہ السلام نے اپنے والد سے لاتعلقی اختیار کی تھی ۔ نبی اکرم صلی اللہ علیہ وسلم فرماتے ہیں : تو مجھے اُن پر رحم آ گیا کیونکہ وہ میری والدہ ہیں ۔ آپ صلی اللہ علیہ وسلم نے یہ بھی ارشاد فرمایا : ) میں نے اپنے پروردگار سے دعا مانگی کہ وہ میری امت سے چار چیزیں اُٹھا لے ، تو اُس نے اُن لوگوں سے دو چیزیں اٹھا لیں ، اور دو چیزیں اُن سے اُٹھانے سے انکار کر دیا ، میں نے اپنے پروردگار سے دعا کی : کہ وہ اُن سے یہ اُٹھا لے کہ انہیں آسمان سے سنگسار کیا جائے ، یا انہیں زمین میں ڈبو ( یعنی دھنسا ) دیا جائے ( اور یہ دعا مانگی : ) کہ اللہ تعالیٰ انہیں مختلف گروہوں میں تقسیم نہ کرے ، اور انہیں ایک دوسرے کے ذریعے ہلاکت کا شکار نہ کرے ، تو اللہ تعالیٰ نے ان سے یہ چیز اٹھا لی کہ انہیں آسمان سے سنگسار کیا جائے ، یا زمین میں پھنسایا جائے ، اور اللہ تعالیٰ نے اُن سے دو چیزیں اٹھانے سے انکار کر دیا ، قتل اور ہرج ۔ ( راوی بیان کرتے ہیں : ) نبی اکرم صلی اللہ علیہ وسلم اپنی والدہ کی قبر پر جانے کے لیے عام گزرگاہ سے ہٹ گئے تھے ، کیونکہ آپ کی والدہ فلاں جگہ پر دفن تھیں ، اور یہ ” عسفان “ کے مقام کی بات ہے ۔
یہ روایت امام طبرانی نے معجم کبیر میں نقل کی ہے ، اس کی سند میں یہ مذکور ہے : اسے ابودرداء اور عبدالغفار بن غنیم نامی راویوں نے اسحاق بن عبداللہ کے حوالے سے ، اُن کے والد کے حوالے سے ، عکرمہ سے روایت کیا ہے ، لیکن عکرمہ کے علاوہ باقی راویوں میں سے میں کسی سے واقف نہیں ہوں ، اور نہ ہی میں نے کسی کو ان کا ذکر کرتے ہوئے دیکھا ہے ۔

سیدنا عمران بن حصین رضی اللہ عنہ بیان کرتے تھے : اُن کے والد حصین نبی اکرم صلی اللہ علیہ وسلم کی خدمت میں حاضر ہوئے ، اور بولے : اپنے شخص کے بارے میں آپ کی کیا رائے ہے ؟ جو مہمان نوازی اور صلہ رحمی کرتا تھا ، اور اُس کا انتقال آپ سے پہلے ہو گیا اور وہ شخص آپ کا والد ہے ، تو نبی اکرم صلی اللہ علیہ وسلم نے ارشاد فرمایا : میرا باپ ، تمہارا باپ اور تم جہنم میں ہو گے ۔ راوی بیان کرتے ہیں : تو حصین کا انتقال مشرک ہونے کے عالم میں ہوا تھا ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا سعد بن ابی وقاص رضی اللہ عنہ بیان کرتے ہیں : ایک دیہاتی نبی اکرم صلی اللہ علیہ وسلم کی خدمت میں حاضر ہوا اور بولا: یا رسول اللہ ! میرا باپ کہاں ہے ؟ آپ نے فرمایا : جہنم میں ، اُس نے دریافت کیا : آپ کے والد کہاں ہیں ؟ نبی اکرم صلی اللہ علیہ وسلم نے ارشاد فرمایا : تم جب بھی کسی کافر کی قبر کے پاس سے گزرو ، تو اسے جہنم کی اطلاع دے دینا ۔
یہ روایت امام بزار نے نقل کی ہے ، امام طبرانی نے اسے معجم کبیر میں نقل کیا ہے ، اور انہوں نے یہ الفاظ زائد نقل کیے ہیں : ” اُس دیہاتی نے اطلاع قبول کر لیا ، اُس کا یہ کہنا تھا : نبی اکرم صلی اللہ علیہ وسلم نے مجھے ایک مشقت والے کام کا پابند کیا ہے ، میں جب بھی کسی کافر کی قبر کے پاس سے گزرتا ہوں ، تو اُسے جہنم کی اطلاع دے دیتا ہوں “ ۔ اس کے رجال صحیح کے رجال ہیں ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن ، ایک شخص اپنے باپ کا ہاتھ پکڑے گا ، تاکہ اسے جہنم میں جانے سے روک لے ، وہ یہ ارادہ کرے گا : کہ اُسے جنت میں داخل کرے ، تو یہ اعلان کیا جائے گا : جنت میں کوئی مشرک داخل نہیں ہو گا ، بے شک اللہ تعالیٰ نے ہر مشرک پر جنت کو حرام قرار دے دیا ہے ، تو وہ شخص کہے گا : اے میرے پروردگار ! میرا باپ ( یعنی اُس کا کیا بنے گا ؟ ) تو اُس کے باپ کی شکل تبدیل کر کے انتہائی بدصورت کر دی جائے گی اور اُس کی بو ، بدبودار ہو جائے گی ، تو وہ شخص اسے ( یعنی اپنے باپ کو چھوڑ دے گا ) “ ۔ راوی بیان کرتے ہیں : نبی اکرم صلی اللہ علیہ وسلم کے اصحاب اس بات کے قائل تھے کہ اُس شخص سے مراد ، سیدنا ابراہیم علیہ السلام ہیں ، لیکن نبی اکرم صلی اللہ علیہ وسلم نے صرف وہی ارشاد فرمایا تھا ( جس کے الفاظ ہم نے نقل کر دیے ہیں ) ۔
یہ روایت امام ابویعلیٰ اور امام بزار نے نقل کی ہے اور ان دونوں کے رجال صحیح کے رجال ہیں ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن ، ایک شخص اپنے باپ کو ملے گا ، اور یہ کہے گا : اے ابا جان ! کیا آپ آج میری اطاعت کریں گے ؟ کیا آپ آج میری پیروی کریں گے ؟ تو اُس کا باپ جواب دے گا : جی ہاں ! تو وہ شخص اپنے باپ کا ہاتھ پکڑ کر اسے ساتھ لے کر ، اللہ تعالیٰ کی بارگاہ میں حاضر ہو گا ، جو مخلوق کی طرف متوجہ ہو گا ، وہ شخص کہے گا : اے میرے پروردگارا ! تو نے میرے ساتھ یہ وعدہ کیا تھا کہ تو مجھے رسوا نہیں کرے گا ، تو پروردگار اس شخص سے منہ پھیرے گا ، پھر وہ شخص اسی کی مانند بات کہے گا ، تو اللہ تعالیٰ اس کے باپ کو گوہ کی شکل میں مسخ کر دے گا ، اور پھر اسے جہنم میں ڈال دے گا ، اُس کا باپ کہے گا : میں تمہارا باپ ہوں ، تو وہ کہے گا : میں تمہیں نہیں پہچانتا ہوں“ ۔
یہ روایت امام بزار نے نقل کی ہے اور اس کے رجال ثقہ ہیں ۔

سیدہ ام سلمہ رضی اللہ عنہا ، جو نبی اکرم صلی اللہ علیہ وسلم کی زوجہ محترمہ ہیں ، وہ بیان کرتی ہیں : ” حارث بن ہشام ، حجۃ الوداع کے دن ، نبی اکرم صلی اللہ علیہ وسلم کی خدمت میں حاضر ہوئے اور بولے : یا رسول اللہ ! آپ صلہ رحمی کرنے ، پڑوسی کے ساتھ اچھائی کرنے ، یتیم کی دیکھ بھال کرنے ، مہمان کو کھانا کھلانے ، غریب کو کھانا کھلانے کی ترغیب دیتے ہیں ، تو یہ سب کام تو ( میرے والد ) ہشام بن مغیرہ بھی کیا کرتے تھے ، یا رسول اللہ ! ان کے بارے میں آپ کی کیا رائے ہے ؟ نبی اکرم صلی اللہ علیہ وسلم نے ارشاد فرمایا : جس بھی قبر والا ( یعنی مرنے والوں میں سے جو بھی ) شخص اس بات کی گواہی نہیں دیتا تھا کہ اللہ تعالیٰ کے علاوہ اور کوئی معبود نہیں ہے تو وہ قبر جہنم کا ٹکڑا ہو گی ، میں نے اپنے چچا جناب ابوطالب کو جہنم کے سب سے گہرے حصے میں پایا ، اُن کی مجھ سے نسبت اور ان کے میرے ساتھ اچھے سلوک کی وجہ سے ، اللہ تعالیٰ نے انہیں اس مقام سے نکالا اور اُنہیں جہنم کے اوپر والے حصے میں رکھ دیا “ ۔
یہ روایت امام طبرانی نے معجم اوسط اور معجم کبیر میں نقل کی ہے اس کی سند میں ایک راوی عبداللہ بن محمد بن عقیل ہے ، جو منکر الحدیث ہے ، لوگ اس کی حدیث سے استدلال نہیں کرتے ہیں ، ویسے اس کی توثیق کی گئی ہے ۔

سیدہ ام سلمہ رضی اللہ عنہا بیان کرتی ہیں : میں نے عرض کی : یا رسول اللہ ! میرا چچا ہشام بن مغیرہ کھانا کھلایا کرتا تھا ، صلہ رحمی کرتا تھا ، یہ کرتا تھا ، اور وہ کرتا تھا ، اگر وہ آپ صلی اللہ علیہ وسلم کا زمانہ پا لیتا تو وہ مسلمان بھی ہو جاتا ، نبی اکرم صلی اللہ علیہ وسلم نے ارشاد فرمایا : وہ دنیا کے لیے دنیا کی تعریف کے لیے ، دنیا میں چرچے کے لئے دیا کرتا تھا ، اُس نے کبھی ایک دن بھی یہ نہیں کہا: اے اللہ : قیامت کے دن میری خطاؤں کی مغفرت کر دینا ۔
یہ روایت امام طبرانی نے معجم کبیر میں اور امام ابویعلیٰ نے نقل کی ہے اور اس کے رجال صحیح کے رجال ہیں ۔

سیدنا سلمہ بن یزید جعفی رضی اللہ عنہ بیان کرتے ہیں : میں ، میرے بھائی اور میرے والد ، نبی اکرم صلی اللہ علیہ وسلم کی خدمت میں حاضری کے لیے روانہ ہوئے ، ہم نے عرض کی : یا رسول اللہ ! ہماری والدہ ملیکہ صلہ رحمی کیا کرتی تھی ، مہمان نوازی کرتی تھی ، یہ کرتی تھی وہ کرتی تھی اُن کا انتقال زمانہ جاہلیت میں ہو گیا تھا ، تو کیا یہ چیز ( یعنی بھلائی کے کام کرنا ) انہیں نفع دے گی ، نبی اکرم صلی اللہ علیہ وسلم نے ارشاد فرمایا : جی نہیں ! راوی بیان کرتے ہیں : ہم نے کہا: اُس خاتون نے اپنی ایک بہن کو زندہ درگور ہونے سے بچا لیا تھا ، تو کیا یہ چیز انہیں کچھ فائدہ دے گی ؟ نبی اکرم صلی اللہ علیہ وسلم نے فرمایا : ” زندہ درگور کرنے والی ، زندہ درگور ہونے والی جہنم میں جائیں گے ، البتہ اگر زندہ درگور کرنے والی عورت اسلام کو پا لے تو ہو سکتا ہے کہ اللہ تعالیٰ اس سے درگزر کرے “ ۔
یہ روایت امام أحمد نے نقل کی ہے اور اس کے رجال صحیح کے رجال ہیں ، امام طبرانی نے معجم کبیر میں اس کی مانند روایت نقل کی ہے ۔

سیدنا عدی بن حاتم رضی اللہ عنہ بیان کرتے ہیں : میں نے عرض کی : یا رسول اللہ ! میرے والد صلہ رحمی کیا کرتے تھے اور فلاں فلاں کام کرتے تھے ، نبی اکرم صلی اللہ علیہ وسلم نے ارشاد فرمایا : تمہارے والد نے ایک چیز کا ارادہ کیا اور اُس کو پا لیا ۔ ( راوی بیان کرتے ہیں : ) نبی اکرم صلی اللہ علیہ وسلم کی مراد ، تذکرہ ( یعنی شہرت تھی ) ۔
یہ روایت امام أحمد نے نقل کی ہے ، اس کے رجال ثقہ ہیں ، اسے امام طبرانی نے معجم کبیر میں نقل کیا ہے ۔

سیدنا سہل بن سعد رضی اللہ عنہ بیان کرتے ہیں : عدی بن حاتم ، نبی اکرم صلی اللہ علیہ وسلم کی خدمت میں حاضر ہوئے اور بولے : یا رسول اللہ ! میرے والد صلہ رحمی کرتے تھے ، دوسروں کا بوجھ اُٹھاتے تھے ، کھانا کھلاتے تھے ، نبی اکرم صلی اللہ علیہ وسلم نے دریافت کیا : کیا انہوں نے اسلام کا زمانہ پایا ہے ؟ سیدنا عدی رضی اللہ عنہ نے جواب دیا : جی نہیں ! نبی اکرم صلی اللہ علیہ وسلم نے فرمایا : تمہارے والد اس چیز کو پسند کرتے تھے کہ ان کا ذکر کیا جائے ، تو اُن کا ذکر ہو گیا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی رشدین بن سعد ہے اور وہ متروک الحدیث ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم کے سامنے حاتم طائی کا ذکر کیا گیا ، تو آپ نے ارشاد فرمایا : وہ ایک ایسا شخص تھا ، جس نے ایک چیز ( یعنی شہرت کے حصول ) کا ارادہ کیا ، تو اُس نے اس چیز کو پا لیا ۔
یہ روایت امام بزار نے نقل کی ہے ، اس کی سند میں ایک راوی عبید بن واقد قیسی ہے ، جسے ابوحاتم نے ضعیف قرار دیا ہے ۔

سیدنا سلمہ بن عامر ضبی رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، میں نے عرض کی : یا رسول اللہ ! میرے والد صلہ رحمی کرتے تھے ، مہمان نوازی کرتے تھے ، ذمہ کو پورا کرتے تھے ، نبی اکرم صلی اللہ علیہ وسلم نے دریافت کیا : انہوں نے اسلام کا زمانہ نہیں پایا ؟ میں نے جواب دیا : جی نہیں ! جب میں مڑ کر جانے لگا ، تو نبی اکرم صلی اللہ علیہ وسلم نے ارشاد فرمایا : اس بوڑھے کو میرے پاس لاؤ آپ نے فرمایا : یہ ( یعنی سخاوت کی عادت ) تمہارے بعد والوں میں رہے گی ، تم ہمیشہ اس پر رہو گے اور کبھی جدا نہیں ہو گے ۔
یہ روایت امام طبرانی نے معجم کبیر میں نقل کی ہے اور اس کے رجال کی توثیق کی گئی ہے ۔

سیدنا عفیف کندی رضی اللہ عنہ بیان کرتے ہیں : ایک مرتبہ ہم لوگ نبی اکرم صلی اللہ علیہ وسلم کے پاس موجود تھے ، یمن کا وفد آ گیا ، اُن لوگوں نے ( زمانہ جاہلیت کے مشہور شاعر ) امراء القیس بن حجر کندی کا ذکر کیا ، اُس کے اشعار میں سے دو مصرعے ذکر کیے ، جن میں عرب کے پانیوں میں سے ایک پانی کے چشمے کا ذکر تھا ، تو نبی اکرم صلی اللہ علیہ وسلم نے ارشاد فرمایا : وہ ایک ایسا شخص تھا ، جس کا ذکر دنیا میں ہے اور آخرت میں اُسے بھلا دیا جائے گا ، وہ دنیا میں معزز ہے اور آخرت میں بے عزت ہو گا ، جب وہ قیامت کے دن آئے گا ، تو اُس کے پاس شعراء کا جھنڈا ہو گا ، اور وہ ان ( شعراء ) کی قیادت کرتا ہوا جہنم کی طرف ( ان شعراء کو ) لے جائے گا ۔
یہ روایت امام طبرانی نے معجم کبیر میں ، سعد بن فروہ بن عفیف کے حوالے سے ، اُن کے والد اور دادا سے روایت کی ہے ، اور میں نے کسی کو ان کے حالات ذکر کرتے ہوئے نہیں دیکھا ہے ۔