مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : ایک مرتبہ نبی اکرم صلی اللہ علیہ وسلم کا گزر ( رئیس المنافقین ) عبداللہ بن ابی بن سلول کے پاس سے ہوا ، جو سائے میں موجود تھا ، اُس نے کہا: اے ابوکبشہ کے صاحبزادے ! آپ نے ہم پر غبار ڈال دیا ہے ( بعد میں ) اس کے بیٹے سیدنا عبداللہ رضی اللہ عنہ ( جو صحابی رسول ہیں ، ) انہوں نے ( نبی اکرم صلی اللہ علیہ وسلم سے ) کہا: اس ذات کی قسم ! جس نے آپ کو عزت عطا کی ہے اور آپ پر کتاب نازل کی ہے ، اگر آپ چاہیں ، تو میں آپ کے پاس اُس کا ( یعنی اپنے باپ عبداللہ بن ابی بن سلول کا ) سر لے آتا ہوں ، تو نبی اکرم صلی اللہ علیہ وسلم نے فرمایا : جی نہیں ! تم اپنے باپ کے ساتھ نیکی کرو ! اور اُس کے ساتھ اچھے طریقے سے رہو ! ۔
یہ روایت امام طبرانی نے معجم اوسط میں نقل کی ہے ، وہ فرماتے ہیں : زید بن بشر حضرمی اسے نقل کرنے میں منفرد ہے ۔ ( علامہ ہیثمی فرماتے ہیں : ) میں یہ کہتا ہوں : ابن حبان نے اسے ثقہ قرار دیا ہے ، اس روایت کے بقیہ رجال ثقہ ہیں ۔

صلہ بن زفر بیان کرتے ہیں : ہم نے سیدنا حذیفہ رضی اللہ عنہ سے کہا: آپ نے منافقین کے معاملے کو کیسے پہچان لیا ؟ جبکہ نبی اکرم صلی اللہ علیہ وسلم کے اصحاب میں سے کوئی بھی اُسے نہیں پہچان سکا ، یہاں تک کہ سیدنا ابوبکر رضی اللہ عنہ اور سیدنا عمر رضی اللہ عنہ بھی ( اُسے نہیں پہچان سکے ) تو سیدنا حذیفہ رضی اللہ عنہ نے فرمایا : ایک مرتبہ میں ، نبی اکرم صلی اللہ علیہ وسلم کے پیچھے چلتا ہوا جا رہا تھا ، نبی اکرم صلی اللہ علیہ وسلم اپنی سواری پر سو گئے ، اس دوران میں نے کچھ لوگوں کو یہ کہتے ہوئے سنا : اگر ہم انہیں ( یعنی نبی اکرم صلی اللہ علیہ وسلم کو ) ان کی سواری سے گرا دیں ، تو ان کی گردن ٹوٹ جائے گی اور ہمیں ان سے نجات مل جائے گی تو میں اُن لوگوں اور نبی اکرم صلی اللہ علیہ وسلم کے درمیان چلتا رہا ، میں نے بلند آواز میں تلاوت شروع کر دی ، تو نبی اکرم صلی اللہ علیہ وسلم بیدار ہو گئے ، آپ نے دریافت کیا : کون ہے ؟ میں نے عرض کی : حذیفہ ! آپ نے دریافت کیا : یہ کون لوگ ہیں ؟ میں نے بتایا : فلاں ہے ، اور فلاں ہے ، یہاں تک کہ میں نے اُن سب کے بارے میں بتا دیا ، نبی اکرم صلی اللہ علیہ وسلم نے دریافت کیا : اُنہوں نے جو کہا: ہے ، وہ تم نے سنا ؟ میں نے عرض کی : جی ہاں ! اسی لئے میں آپ کے اور ان لوگوں کے درمیان چل رہا ہوں ، تو آپ صلی اللہ علیہ وسلم نے فرمایا : وہ لوگ فلاں اور فلاں ہیں ، یہاں تک کہ نبی اکرم صلی اللہ علیہ وسلم نے اُن کے نام گنوائے اور فرمایا : یہ منافقین ہیں ، تم کسی کو نہ بتانا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی مجالد بن سعید ہے ، جو اختلاط کا شکار ہو گیا تھا ، ایک جماعت نے اسے ضعیف قرار دیا ہے ۔

سیدنا حذیفہ رضی اللہ عنہ بیان کرتے ہیں : میں ، نبی اکرم صلی اللہ علیہ وسلم کی اونٹنی کی لگام پکڑے ہوئے تھا ، اور اُسے لے کے چل رہا تھا جبکہ سیدنا عمار رضی اللہ عنہ اُسے پیچھے سے ہانک رہے تھے ( راوی کو شک ہے ، یا شاید یہ الفاظ ہیں : ) سیدنا عمار رضی اللہ عنہ اُسے لے کر چل رہے تھے ، اور میں اُسے پیچھے سے ہانک رہا تھا ، اسی دوران ہمارے سامنے 12 افراد آئے ، جنہوں نے دھاٹے باندھے ہوئے تھے ۔ نبی اکرم صلی اللہ علیہ وسلم نے ارشاد فرمایا : یہ قیامت کے دن تک کے لئے منافق ہیں ، میں نے عرض کی : یا رسول اللہ ! آپ ان میں سے ہر ایک کی طرف کسی شخص کو بھیج کر انہیں قتل کیوں نہیں کروا دیتے ؟ نبی اکرم صلی اللہ علیہ وسلم نے ارشاد فرمایا : مجھے یہ بات ناپسند ہے کہ لوگ یہ بات کریں کہ سیدنا محمد صلی اللہ علیہ وسلم اپنے ساتھیوں کو قتل کروا دیتے ہیں عنقریب ” دبیلہ “ ان کے لئے کفایت کر جائے گا ، ہم نے عرض کی : ” دبیلہ “ سے مراد کیا ہے ؟ نبی اکرم صلی اللہ علیہ وسلم نے فرمایا : آگ کا انگارہ ، جو ان میں سے کسی ایک کے دل پر رکھا جائے گا اور اسے قتل کر دے گا ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس ( روایت ) کا کچھ حصہ منقول ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبداللہ بن سلمہ ہے ، ایک جماعت نے اُسے ثقہ قرار دیا ہے ، امام بخاری رحمہ اللہ فرماتے ہیں : اس کی نقل کردہ حدیث کی متابعت نہیں کی جاتی ہے ۔

سیدنا حذیفہ رضی اللہ عنہ بیان کرتے ہیں : نبی اکرم صلی اللہ علیہ وسلم وادی کے نشیبی حصے میں آئے اور لوگ گھاٹی کی طرف چلے گئے ، اسی دوران سات افراد آئے ، جو دھاٹے باندھے ہوئے تھے ، جب نبی اکرم صلی اللہ علیہ وسلم نے انہیں ملاحظہ فرمایا ، تو اُس وقت سیدنا حذیفہ رضی اللہ عنہ جانور کو آگے لے کر چل رہے تھے اور سیدنا عمار رضی اللہ عنہ اُسے پیچھے سے ہانک رہے تھے ، نبی اکرم صلی اللہ علیہ وسلم نے فرمایا : تم اپنے درمیان کی چیز کا خیال رکھنا ، اُن لوگوں نے کچھ بھی نہیں کیا ، نبی اکرم صلی اللہ علیہ وسلم نے اُن لوگوں کی طرف دیکھا اور پھر ارشاد فرمایا : اے حذیفہ ! کیا تم جانتے ہو ؟ یہ کون لوگ ہیں ؟ میں نے عرض کی : میں ان میں سے صرف سرخ اونٹ والے شخص کو پہچانتا ہوں ، مجھے پتا ہے کہ یہ فلاں ہے ۔
( علامہ ہیثمی فرماتے ہیں : ) : اُن کے حوالے سے ” صحیح “ میں حدیث منقول ہے جو اس کے علاوہ ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی تلید بن سلیمان ہے ، جیسے عجلی نے ثقہ قرار دیا ہے اور یہ کہا: ہے : اس میں کوئی حرج نہیں ہے ، اس میں تشیع پایا جاتا تھا اور یہ تدلیس کرتا تھا ، ایک جماعت نے اسے ضعیف قرار دیا ہے ۔

سیدنا جابر رضی اللہ عنہ بیان کرتے ہیں : ایک مرتبہ سیدنا عمار بن یاسر رضی اللہ عنہ اور ودیعہ بن ثابت کے درمیان تلخ کلامی ہو گئی تو ودیعہ نے سیدنا عمار رضی اللہ عنہ سے کہا: آپ ابوحذیفہ بن مغیرہ کے غلام ہیں ، اور اس نے آپ کو آزاد نہیں کیا تھا ، تو سیدنا عمار رضی اللہ عنہ نے فرمایا : عقبہ والے افراد کتنے تھے ؟ ( یعنی وہ لوگ ، جنہوں نے ایک گھاٹی میں ، اللہ کے رسول کو شہید کرنے کا منصوبہ بنایا تھا ، کیونکہ ودیعہ بھی اُن افراد میں سے ایک تھا ) ودیعہ نے جواب دیا : اللہ بہتر جانتا ہے ، سیدنا عمار رضی اللہ عنہ نے فرمایا : تم مجھے اپنے علم کے حوالے سے جواب دو ! تو ودیعہ خاموش رہا ، حاضرین میں سے ایک صاحب نے یہ کہا: یہ ( یعنی سیدنا عمار رضی اللہ عنہ ) تم سے جس چیز کے بارے میں پوچھ رہے ہیں ، تم انہیں بتا دو ! سیدنا عمار رضی اللہ عنہ کا ارادہ یہ تھا کہ ودیعہ انہیں یہ بتائے گا کہ وہ بھی اُن افراد میں سے ایک تھا ، ودیعہ نے کہا: ہم یہ بات چیت کیا کرتے تھے کہ وہ چودہ افراد تھے ، سیدنا عمار رضی اللہ عنہ نے فرمایا : اگر تم بھی اُن میں ہوتے ، تو وہ پندرہ افراد ہوتے ، تو ودیعہ بولا: اے ابویقظان ! آپ ٹھہر جائیں ! میں آپ کو اللہ کا واسطہ دیتا ہوں ، آج آپ نے مجھے شرمندہ کر دیا ہے ، تو سیدنا عمار رضی اللہ عنہ نے فرمایا : اللہ کی قسم میں نے کسی کا نام نہیں لیا اور نہ ہی میں کبھی کسی کا نام لوں گا ، لیکن میں یہ گواہی دیتا ہوں ، کہ اُن 15 افراد میں سے ، 12 افراد ایسے ہیں ، جو دنیاوی زندگی میں اور اُس دن جب گواہ کھڑے ہوں گے ۔ ( وہ 12 افراد ) اللہ اور اُس کے رسول کا گروہ ہوں گے ۔
یہ روایت امام طبرانی نے معجم کبیر میں نقل کی ہے ، ” صحیح “ میں اس کا ایک حصہ منقول ہے ، اس کی سند میں ایک راوی واقدی ہے ، جو ضعیف ہے ۔

سیدنا ابوطفیل رضی اللہ عنہ بیان کرتے ہیں : نبی اکرم صلی اللہ علیہ وسلم غزوہ تبوک کے لیے روانہ ہوئے ، آپ ایک گھاٹی کے پاس پہنچے ، تو آپ نے اعلان کرنے والے شخص کو حکم دیا ، تو اُس نے یہ اعلان کیا : کوئی شخص گھاٹی کی طرف نہ جائے ، کیونکہ اللہ کے رسول وہاں جانے لگے ہیں ، نبی اکرم صلی اللہ علیہ وسلم سفر کر رہے تھے ، سیدنا حذیفہ رضی اللہ عنہ آپ کے جانور کے آگے چل رہے تھے ، اور سیدنا عمار رضی اللہ عنہ اسے پیچھے سے ہانک رہے تھے ، اسی دوران کچھ لوگ سواریوں پر سوار ہو کر آئے ، انہوں نے دھاٹے باندھے ہوئے تھے ، نبی اکرم صلی اللہ علیہ وسلم کو گھیر لیا ، سیدنا عمار رضی اللہ عنہ مڑے اور اُنہوں نے اُن لوگوں کی سواریوں کے منہ پر مارا ، نبی اکرم صلی اللہ علیہ وسلم نے سیدنا حذیفہ سے کہا: تم ( جانور کو لے کر ) چلتے رہو ! چلتے رہو ! پھر سیدنا عمار رضی اللہ عنہ آپ کے پاس پہنچے ، تو آپ صلی اللہ علیہ وسلم نے فرمایا : تم ( جانور کو ہانکتے رہو ! ہانکتے رہو ! یہاں تک کہ ( ذرا آگے جا کر ) نبی اکرم صلی اللہ علیہ وسلم نے سواری کو بٹھا لیا آپ صلی اللہ علیہ وسلم نے سیدنا عمار رضی اللہ عنہ سے دریافت کیا : کیا تم ان لوگوں کو پہچانتے ہو ؟ سیدنا عمار رضی اللہ عنہ نے عرض کی : جی نہیں ! اُنہوں نے منہ پر کپڑا لپیٹا ہوا تھا ، البتہ میں اُن میں سے زیادہ تر کی سواریوں کو پہچان لوں گا ، نبی اکرم صلی اللہ علیہ وسلم نے دریافت کیا : کیا تم جانتے ہو ؟ وہ لوگ اللہ کے رسول کے بارے میں کیا ارادہ رکھتے تھے ؟ میں نے عرض کی : اللہ اور اُس کا رسول بہتر جانتے ہیں ، نبی اکرم صلی اللہ علیہ وسلم نے فرمایا : اُن کا یہ ارادہ تھا کہ وہ اللہ کے رسول کو لے جائیں گے اور انہیں گھاٹی سے نیچے گرا دیں گے ۔ ( راوی بیان کرتے ہیں : ) بعد میں ، ایک مرتبہ سیدنا عمار رضی اللہ عنہ اور اُن لوگوں میں سے ، ایک شخص کے درمیان تلخ کلامی ہو گئی ، جس طرح لوگوں کے درمیان ہو جاتی ہے ، تو سیدنا عمار رضی اللہ عنہ نے فرمایا : میں تمہیں اللہ کا واسطہ دے کر یہ دریافت کرتا ہوں کہ گھنٹی والے افراد کتنے تھے ؟ جنہوں نے اللہ کے رسول کو دھوکہ دینے کا ارادہ کیا تھا ، تو اس شخص نے کہا: ہم یہ سمجھتے ہیں کہ وہ چودہ افراد تھے ، سیدنا عمار رضی اللہ عنہ نے فرمایا : اگر تم بھی اُن میں ہو ، تو وہ پندرہ ہوں گے ۔ سیدنا عمار رضی اللہ عنہ نے اس بات کی گواہی دی کے 12 افراد دنیاوی زندگی میں ، اور قیامت کے دن ، اللہ تعالیٰ اور اس کے رسول کا گروہ شمار ہوں گے ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔

امام طبرانی بیان کرتے ہیں : علی بن عبدالعزیز نے ہمیں یہ بات بیان کی ہے : زبیر بن بکار بیان کرتے ہیں : ” گھاٹی والے افراد ( جنہوں نے نبی اکرم صلی اللہ علیہ وسلم کو شہید کرنے کا منصوبہ بنایا تھا ، ) ان کے نام یہ ہیں : معتب بن قشیر بن ملیل ، اس کا تعلق بنو عمرو بن عوف سے ہے ، اس نے غزوہ بدر میں شرکت کی تھی ، یہ وہ شخص ہے ، جس نے یہ کہا: تھا : سیدنا محمد صلی اللہ علیہ وسلم ہمارے ساتھ کسری اور قیصر کے خزانوں کا وعدہ کرتے ہیں جبکہ ہم میں سے کوئی ایک اپنے خلای کے حوالے سے بھی محفوظ نہیں ہے ۔ یہی وہ شخص ہے جس نے یہ کہا: تھا : اگر ہمارے بس میں ہوتا ، تو ہم یہاں قتل نہ ہوتے ، زہیر بن بکار فرماتے ہیں : اس کلام کے حوالے سے ، سیدنا زبیر رضی اللہ عنہ نے اسی شخص کے خلاف گواہی دی تھی ۔ ودیعہ بن ثابت بن عمرو بن عوف ، یہ وہ شخص ہے ، جس نے یہ کہا: تھا : پہلے ہم کھیل کود کیا کرتے تھے ، اور یہی وہ شخص ہے ، جس نے یہ کہا: تھا : کیا وجہ ہے کہ میں یہ دیکھتا ہوں کہ ہمارے یہ قاری صاحبان ، پیٹ کی طرف سب سے زیادہ رغبت رکھتے ہیں اور دشمن کا سامنا کرنے کے وقت سب سے زیادہ بزدل ہوتے ہیں ۔ جد بن عبداللہ بن نبتل بن حارث ، اس کا تعلق بنو عمرو بن عوف سے ہے ، یہ وہ شخص ہے جس کے بارے میں سیدنا جبرائیل علیہ السلام نے یہ کہا: تھا : اے سیدنا محمد صلی اللہ علیہ وسلم ! بہت سے بالوں والا یہ شخص کون ہے ؟ جس کی آنکھیں پیتل کی ہنڈیاؤں جیسی ہیں ، وہ شیطان کی آنکھوں کے ساتھ دیکھتا ہے اور اس کا جگر گدھے کا جگر ہے ، یہ منافقین کو آپ کی خبریں پہنچاتا ہے ۔ حارث بن یزید طائی ، یہ بنوعمرو بن عوف کا حلیف ہے ، یہ وہ شخص ہے ، جو اس کنویں کے پاس پہلے چلا گیا تھا ، جس کے بارے میں نبی اکرم صلی اللہ علیہ وسلم نے منع کیا تھا کہ کوئی آپ سے پہلے وہاں تک جائے ، اس نے وہاں سے پانی حاصل کیا تھا ۔ اوس بن قبطی ، اس کا تعلق بنو حارثہ سے ہے ، یہ وہی شخص ہے ، جس نے یہ کہا: تھا : ہمارے گھر پردہ کی چیز ہیں ، یہ یحیی بن سعید بن قیس کا دادا ہے ۔ جلاس بن سوید بن صامت ، اس کا تعلق بنو عمرو بن عوف سے ہے ، ہم تک
یہ روایت پہنچی ہے کہ اس نے بعد میں توبہ کر لی تھی ۔ سعد بن زرارہ ، اس کا تعلق بنو مالک بن نجار سے ہے ، یہ وہ شخص جس نے نبی اکرم کے خلاف دھواں پھیلایا تھا ، یہ اُن لوگوں میں ، عمر میں سب سے چھوٹا تھا اور سب سے زیادہ خبیث تھا ۔ سوید اور راعش ، ان دونوں کا تعلق بلحبلی سے تھا ، یہ دونوں ان افراد میں سے ہیں ، جنہیں عبداللہ بن اُبی نے غزوہ تبوک کے موقع پر سامان فراہم کیا تھا ، تاکہ یہ لوگوں کو سوا کریں ۔ قیس بن عمرو بن فہد زید بن لصیب ، اس کا تعلق قینقاع کے یہودیوں سے تھا ، اور اس نے خود کو مسلمان ظاہر کیا تھا ، اس میں یہودیوں کا کھوٹ تھا اور منافقین کا نفاق تھا ۔ سلالہ بن حمام ، اس کا تعلق بنو قینقاع سے تھا ، اس نے خود کو مسلمان ظاہر کیا تھا ۔
یہ روایت امام طبرانی نے معجم کبیر میں ، زبیر بن بکار کے قول کے طور پر نقل کی ہے ، جیسا کہ آپ ملاحظہ فرما رہے ہیں ۔

سیدنا ابوطفیل رضی اللہ عنہ بیان کرتے ہیں : غزوہ تبوک کے موقع پر ، نبی اکرم صلی اللہ علیہ وسلم کے منادی نے یہ اعلان کیا : پانی تھوڑا ہے ، تو کوئی بھی شخص مجھ سے ( یعنی نبی اکرم صلی اللہ علیہ وسلم سے ) پہلے اُس ( چشمے ) تک نہ جائے ، جب نبی اکرم صلی اللہ علیہ وسلم اُس چشمے کے پاس تشریف لائے ، تو کچھ لوگ آپ صلی اللہ علیہ وسلم سے پہلے اُس تک پہنچ چکے تھے ، تو نبی اکرم صلی اللہ علیہ وسلم نے ان لوگوں پر لعنت کی ۔
یہ روایت امام طبرانی نے معجم کبیر میں نقل کی ہے ، اس کی سند میں یہ مذکور ہے : اس کو یحیی بن محمد بن سکن نے بکر بن بکار سے روایت کیا ہے ، میں نے ان دونوں کے حالات ( کسی کتاب میں ) نہیں دیکھے ہیں ۔

عبداللہ بن عثمان بن خثیم بیان کرتے ہیں : میں سیدنا ابوطفیل رضی اللہ عنہ کی خدمت میں حاضر ہوا ، تو میں نے اُن کا مزاج خوشگوار پایا ، میں نے سوچا میں اس موقع کو غنیمت سمجھوں گا ، میں نے کہا: اے سیدنا ابوطفیل ! وہ افراد کون تھے ؟ جن پر نبی اکرم صلی اللہ علیہ وسلم نے لعنت کی تھی ، آپ اُن کے نام بیان کیجیے کہ وہ کون تھے ؟ راوی بیان کرتے ہیں : اُنہوں نے مجھے اُن کے نام بیان کرنے کا ارادہ کیا ، تو اُن کی اہلیہ سیدہ سودہ نے اُن سے کہا: اے ابوطفیل ! آپ رُک جائیے ! کیا آپ تک
یہ روایت نہیں پہنچی ہے کہ نبی اکرم صلی اللہ علیہ وسلم نے ارشاد فرمایا ہے : ” اے اللہ ! میں ایک بشر ہوں ، اہل ایمان میں سے ، جس بھی شخص کے خلاف میں دعا کر دوں ( اور وہ اس کا مستحق نہ ہو ) تو تو اُس دعائے ضرر کو اُس شخص کے حق میں ، پاکیزگی اور رحمت کا باعث بنا دینا “ ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا ابومسعود رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں خطبہ دیا ، آپ صلی اللہ علیہ وسلم نے اللہ تعالیٰ کی حمد و ثناء بیان کرنے کے بعد ارشاد فرمایا : تم لوگوں میں کچھ منافقین موجود ہیں ، جس بھی شخص کا میں نام لوں ، وہ اُٹھ جائے ( اور اُٹھ کر چلا جائے ) پھر آپ نے ارشاد فرمایا : اے فلاں ! تم کھڑے ہو جاؤ ! اے فلاں ! تم کھڑے ہو جاؤ ! اے فلاں ! تم کھڑے ہو جاؤ ! یہاں تک کہ نبی اکرم صلی اللہ علیہ وسلم نے 36 افراد کے نام لیے ، پھر آپ صلی اللہ علیہ وسلم نے ارشاد فرمایا : بے شک تم میں ( راوی کو شک ہے ، یا شاید یہ الفاظ ہیں : ) تم میں سے ( یعنی تم میں یہ لوگ منافق تھے ) راوی بیان کرتے ہیں : سیدنا عمر رضی اللہ عنہ کا گزر ایک ایسے شخص کے پاس سے ہوا ، جس کا نام نبی اکرم صلی اللہ علیہ وسلم نے لیا تھا اُس نے سر جھکایا ہوا تھا ، سیدنا عمر رضی اللہ عنہ اس کے واقف تھے ، اُنہوں نے دریافت کیا : تمہیں کیا ہوا ہے ؟ تو اُس نے انہیں نبی اکرم صلی اللہ علیہ وسلم کے ارشاد کے بارے میں بتایا ، تو سیدنا عمر رضی اللہ عنہ نے فرمایا : تم ہمیشہ کے لیے دور ہو جاؤ ( یا تم ہمیشہ کے لیے برباد ہو گئے ) ۔
یہ روایت امام أحمد نے اور امام طبرانی نے معجم کبیر میں نقل کی ہے ، اس کی سند میں ایک راوی عیاض بن عیاض ہے ، جس نے اسے اپنے والد سے نقل کیا ہے ( ( علامہ ہیثمی فرماتے ہیں : ) میں نے کسی ( محدث ) کو ان دونوں کے حالات ذکر کرتے ہوئے نہیں دیکھا ہے ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” میرے ساتھ والوں میں ، ایسا فرد بھی ہے کہ میرے مرنے کے بعد ، اُسے میں کبھی نہیں دیکھوں گا اور وہ مجھے کبھی نہیں دیکھے گا “ ۔ راوی بیان کرتے ہیں : جب سیدنا عمر رضی اللہ عنہ کو اس بات کی اطلاع ملی ، تو وہ جلدی سے سیدہ ام سلمہ رضی اللہ عنہا کی خدمت میں حاضر ہوئے اور ان سے کہا: میں آپ کو اللہ کا واسطہ دے کر دریافت کرتا ہوں ، کیا میں ان لوگوں میں سے ایک ہوں ؟ سیدہ ام سلمہ رضی اللہ عنہا نے جواب دیا : جی نہیں ! البتہ آپ کے بعد میں کسی اور کو لاتعلق قرار نہیں دوں گی ۔
یہ روایت امام أحمد ، امام ابویعلیٰ اور امام طبرانی نے معجم کبیر میں نقل کی ہے ، امام ابویعلیٰ اور امام أحمد کی ایک اور روایت ، جو اُنہوں نے سیدہ ام سلمہ رضی اللہ عنہا کے حوالے سے نقل کی ہے ( اس میں یہ الفاظ ہیں : ) سیدنا عبدالرحمان بن عوف رضی اللہ عنہ سیدہ ام سلمہ رضی اللہ عنہا کی خدمت میں حاضر ہوئے اور بولے : اے امی جان ! مجھے یہ اندیشہ ہے کہ میرے مال کی کثرت مجھے ہلاکت کا شکار کر دے گی ، کیونکہ میرے پاس قریش میں سب سے زیادہ مال ہے ، تو سیدہ ام سلمہ رضی اللہ عنہا نے فرمایا : اے میرے بیٹے ! تم ( اللہ کی راہ میں ) خرچ کرو ! کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” میرے ساتھیوں میں ایک ایسا فرد بھی ہے کہ جب میں اُس سے جدا ہو جاؤں گا ، تو اُس کے بعد وہ مجھے کبھی نہیں دیکھے گا “ اُس کے بعد راوی نے ، حسب سابق حدیث ذکر کی ہے ، اس کی سند میں ایک راوی عاصم بن بہدلہ ہے ، یہ ثقہ ہے ، لیکن غلطی کر جاتا ہے ۔

سیدنا عبداللہ بن عمرو رضی اللہ عنہ بیان کرتے ہیں : ایک مرتبہ ہم لوگ نبی اکرم صلی اللہ علیہ وسلم کے پاس بیٹھے ہوئے تھے ، سیدنا عمرو بن العاص رضی اللہ عنہ لباس تبدیل کرنے کے لیے چلے گئے ، اُن کا مجھ سے آ کے ملنے کا ارادہ تھا ، ہم نبی اکرم صلی اللہ علیہ وسلم کے پاس بیٹھے ہوئے تھے ، آپ نے ارشاد فرمایا : ابھی تمہارے سامنے ایک ملعون شخص آئے گا ، سیدنا عبداللہ رضی اللہ عنہ فرماتے ہیں : اللہ کی قسم ! میں مسلسل پریشانی کا شکار رہا اور آنے جانے والے کا منتظر رہا ، یہاں تک کہ وہ شخص اندر آیا ( راوی بیان کرتے ہیں : ) ان کی مراد حکم تھا ۔
یہ روایت امام أحمد نے نقل کی ہے ، اور اس کے رجال صحیح کے رجال ہیں ۔

اُن کے حوالے سے یہ بات منقول ہے : نبی اکرم صلی اللہ علیہ وسلم نے ارشاد فرمایا : ” ابھی تمہارے سامنے ایک ایسا شخص آئے گا ، جسے قیامت کے دن ، میری سنت ( راوی کو شک ہے ، یا شاید یہ الفاظ ہیں : ) میرے مذہب کے علاوہ پر زندہ کیا جائے گا “ ۔ سیدنا عبداللہ رضی اللہ عنہ کہتے ہیں : میں اپنے والد کو گھر چھو کر آیا تھا ، مجھے یہ اندیشہ ہوا کہ کہیں وہ مراد نہ ہوں ، لیکن پھر ان کی بجائے کوئی اور شخص آ گیا ، تو نبی اکرم صلی اللہ علیہ وسلم نے ارشاد فرمایا : وہ ، یہ ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال صحیح کے رجال ہیں ، البتہ اس کی سند میں ایک راوی کا نام بیان نہیں کیا گیا ہے ۔

اُن کے حوالے سے یہ بات منقول ہے : نبی اکرم صلی اللہ علیہ وسلم نے ارشاد فرمایا : ” اس راستے سے ایک جہنمی شخص تم لوگوں کے سامنے آئے گا ، سیدنا عبداللہ رضی اللہ عنہ کہتے ہیں : میں اپنے والد کو گھر وضو کرتا ہوا چھوڑ کر آیا تھا ، مجھے یہ اندیشہ ہوا کہ کہیں وہ نہ آ جائیں ، لیکن پھر کوئی اور شخص سامنے آ گیا ، تو نبی اکرم صلی اللہ علیہ وسلم نے ارشاد فرمایا : وہ ، یہ ہے “ ۔ اس روایت کے رجال صحیح کے رجال ہیں ۔

سیدنا ابن زبیر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اس دروازے سے آنے والا پہلا شخص جہنمی ہو گا“ راوی بیان کرتے ہیں : تو فلاں شخص سامنے آیا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے اور وہ ضعیف ہے ۔

سیدنا عبداللہ بن عباس رضی اللہ عنہما فرماتے ہیں : اب کوئی شخص اُٹھ کر یہ کہہ دیتا ہے : میرے والد اللہ کے رسول کے ساتھ رہے ہیں ، یا وہ اللہ کے رسول کے ساتھ تھے ، حالانکہ ایک پرانا جوتا بھی اس کے باپ سے زیادہ بہتر ہو گا ۔
یہ روایت امام بزار نے نقل کی ہے اور اس کے رجال صحیح کے رجال ہیں ۔

سیدنا امام حسن بن علی رضی اللہ عنہما کے بارے میں یہ بات منقول ہے : اُنہوں نے ابواعور سلمی سے یہ کہا: تمہارا ستیاناس ہو ! کیا اللہ کے رسول نے رعل اور ذکوان ( قبیلوں ) اور عمرو بن سفیان پر لعنت نہیں کی ہے ؟
یہ روایت امام ابویعلیٰ نے نقل کی ہے ، اس کے رجال صحیح کے رجال ہیں ، صرف عبدالرحمن بن ابوعوف نامی راوی کا معاملہ مختلف ہے ( یعنی وہ صحیح کے رجال میں سے تو نہیں ہے ، لیکن ) ویسے وہ ثقہ ہے ۔ انہوں نے ایک اور سند کے ساتھ ، سیدنا امام حسن رضی اللہ عنہ کے حوالے سے یہ بات نقل کی ہے : وہ فرماتے ہیں : ایک مرتبہ نبی اکرم صلی اللہ علیہ وسلم ہمارے ہاں یعنی سیدہ فاطمہ رضی اللہ عنہا کے گھر تشریف لائے ۔ ۔ ۔ ۔ ۔ ۔ اُس کے بعد راوی نے پوری حدیث ذکر کی ہے ، ہم نے اسے ابن زبیر کی نقل کردہ ان احادیث میں نوٹ کیا ہے جو املاء کے طور پر نقل کی گئی ہیں ۔

سیدنا سفینہ رضی اللہ عنہ بیان کرتے ہیں : نبی اکرم صلی اللہ علیہ وسلم بیٹھے ہوئے تھے ، ایک شخص اونٹ پر سوار گزرا ، جس کے آگے ایک شخص جانور کو چلا رہا تھا اور ایک شخص پیچھے سے اسے ہانک رہا تھا ، نبی اکرم صلی اللہ علیہ وسلم نے ارشاد فرمایا : اللہ تعالیٰ اس آگے سے چلانے والے ، پیچھے سے ہانکنے والے ، اور سوار شخص ( یعنی ان تینوں افراد پر ) لعنت کرے ۔
یہ روایت امام بزار نے نقل کی ہے اور اس کے رجال ثقہ ہیں ۔

سیدنا مہاجر بن قنفذ رضی اللہ عنہ بیان کرتے ہیں : نبی اکرم صلی اللہ علیہ وسلم نے تین افراد کو ایک اونٹ پر سوار دیکھا ، تو آپ نے ارشاد فرمایا : تیسرا فرد ، ملعون ہے ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔

سعد بن حذیفہ بیان کرتے ہیں : جنگ صفین کے موقع پر ، سیدنا عمار بن یاسر رضی اللہ عنہ نے فرمایا : انہوں نے ان لوگوں کا معاملہ اور صلح کا معاملہ ذکر کرتے ہوئے ، یہ بات ارشاد فرمائی : اللہ کی قسم ! یہ لوگ مسلمان نہیں ہوئے ، انہوں نے اسلام ظاہر کیا اور کفر کو پوشیدہ رکھا ، جب اُنہیں اس حوالے سے مدد گار مل گئے ، تو اُنہوں نے اسے ظاہر کر دیا ۔
یہ روایت امام طبرانی نے معجم کبیر میں نقل کی ہے ، میں نے کسی کو سعد بن حذیفہ نامی راوی کے حالات بیان کرتے ہوئے نہیں دیکھا ہے ۔

سیدنا عبداللہ بن عمرو رضی اللہ عنہ فرماتے ہیں : مؤذن ، اذان دیتا ہے ، اور پھر کچھ ایسے لوگ بھی نماز پڑھتے ہیں ، جو ( درحقیقت ) مؤمن نہیں ہوتے ہیں ۔
یہ روایت امام طبرانی نے معجم کبیر میں نقل کی ہے ، اور اس کی سند میں ایک ایسا شخص ہے ، جس کا نام بیان نہیں کیا گیا ۔

سیدنا عبدالرحمان بن عوف رضی اللہ عنہ بیان کرتے ہیں : میں سیدنا عمر رضی اللہ عنہ کی خدمت میں حاضر ہوا ، تو انہوں نے فرمایا : اے عبدالرحمن بن عوف ! کیا تمہیں یہ اندیشہ ہے کہ لوگ اسلام کو ترک کر دیں گے اور اُس میں سے نکل جائیں گے ؟ میں نے جواب دیا : جی نہیں ! اگر اللہ نے چاہا ( تو ایسا نہیں ہو گا ) لوگ اسے کیسے چھوڑ سکتے ہیں ؟ جبکہ ان کے درمیان ، اللہ کی کتاب اور اللہ کے رسول کی سنتیں موجود ہیں ، تو سیدنا عمر رضی اللہ عنہ نے فرمایا : اگر ایسا ہی ہونا ہوتا ، تو بنوفلاں نے ہونا تھا ( یعنی انہوں نے کتاب و سنت کی موجودگی میں مسلمان رہنا تھا ) ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔