مجمع الزوائد ومنبع الفوائد

سیدنا جابر رضی اللہ عنہ سے روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” کبیرہ گناہوں سے اجتناب کرو ! “ ۔
یہ روایت امام أحمد نے نقل کی ہے ، اور اس کی سند میں ایک راوی ابن لہیعہ ہے ۔

سیدنا ابوہریرہ رضی اللہ عنہ سے روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص ایسی حالت میں ، اللہ تعالیٰ کی بارگاہ میں حاضر ہو ، کہ وہ کسی کو اُس کا شریک قرار نہ دیتا ہو ، اور وہ ثواب کی امید رکھتے ہوئے ، اپنی خوشی کے ساتھ اپنے مال کی زکوۃ ادا کرتا ہو ، وہ اطاعت و فرمانبرداری کرتا ہو ، تو اُسے جنت نصیب ہو گی ( راوی کو شک ہے یا شاید یہ الفاظ ہیں : ) وہ جنت میں داخل ہو گا ، اور پانچ کام ایسے ہیں ، جن کا کوئی کفارہ نہیں ہے ، ( کسی کو ) اللہ تعالیٰ کا شریک قرار دینا ، کسی کو ناحق طور پر قتل کرنا ، مؤمن پر بہتان لگانا ، میدان جنگ سے راہ فرار اختیار کرنا اور جھوٹی قسم اٹھانا ، جس کے ذریعے آدمی ناحق طور پر کسی کا مال ہتھیا لے “ ۔
یہ روایت امام أحمد نے نقل کی ہے ، اس کی سند میں ایک راوی بقیہ ہے ، جو تدریس کرنے والا ہے اور اس نے
یہ روایت ” عنعنہ “ کے طور پر نقل کی ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” اللہ تعالیٰ اُس شخص پر لعنت کرے ، جو غیر اللہ کے نام پر ( جانور کو ) ذبح کرتا ہے ، اللہ تعالیٰ اُس شخص پر لعنت کرے ، جو زمین کے نشانات کو تبدیل کرتا ہے ، اللہ تعالیٰ اُس شخص پر لعنت کرے ، جو کسی نابینا کو راستے سے بھٹکا دیتا ہے ، اللہ تعالیٰ اُس شخص پر لعنت کرے ، جو اپنے ماں باپ کو برا کہتا ہے ، اللہ تعالیٰ اس شخص پر لعنت کرے ، جو اپنے حقیقی آقا کی بجائے ، کسی اور کی طرف نسبت ولاء ظاہر کرتا ہے “ ۔
یہی روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” کبیرہ گناہوں میں ، پہلا گناہ کسی کو اللہ کا شریک قرار دینا ہے ( اور دوسرے کبیرہ گناہ یہ ہیں : ) کسی کو ناحق طور پر قتل کرنا ، سود کھانا ، یتیم کا مال کھانا ، میدان جنگ سے راہ فرار اختیار کرنا ، پاک دامن عورتوں پر الزام لگانا ، اور ہجرت کر لینے کے بعد ، دیہاتی زندگی کی طرف لوٹ جانا “ ۔
یہ روایت امام بزار نے نقل کی ہے ، اس کی سند میں ایک راوی عمر بن ابوسلمہ ہے ، جسے شعبہ اور دیگر حضرات نے ضعیف قرار دیا ہے ، جبکہ ابوحاتم ، ابن حبان اور دیگر حضرات نے اُسے ثقہ قرار دیا ہے ۔

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” کیا میں تم لوگوں کو سب سے بڑے کبیرہ گناہ کے بارے میں نہ بتاؤں ؟ کسی کو اللہ کا شریک قرار دینا ، اور والدین کی نافرمانی کرنا ، راوی بیان کرتے ہیں : نبی اکرم صلی اللہ علیہ وسلم ” اقعاء “ کے طور پر بیٹھے ہوئے تھے ، آپ نے حبوہ کو کھولا اور اپنی زبان کا کنارہ پکڑ کر ارشاد فرمایا : خبردار ! جھوٹی بات ( بھی ، سب سے بڑے کبیرہ گناہوں میں سے ایک ہے ) “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عمر بن مساور ہے اور وہ منکر الحدیث ہے ۔

سیدنا عمران بن حصین رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” زانی ، چور اور شراب نوشی کرنے والے شخص کے بارے میں ، تم لوگوں کی کیا رائے ہے ؟ لوگوں نے عرض کی : اللہ اور اُس کا رسول زیادہ بہتر جانتے ہیں ، نبی اکرم صلی اللہ علیہ وسلم نے فرمایا : یہ برائیاں ہیں اور ان کی سزا بھی ہے ، لیکن کیا میں تمہیں سب سے بڑے کبیرہ گناہوں کے بارے میں نہ بتاؤں ؟ ( وہ یہ ہیں : ) کسی کو اللہ کا شریک قرار دینا ، پھر نبی اکرم صلی اللہ علیہ وسلم نے یہ آیت تلاوت کی : ” جو شخص کسی کو اللہ کا شریک قرار دیتا ہے ، وہ بڑے گناہ کا الزام عائد کرتا ہے “ ۔ ( اور دوسرا بڑا گناہ ) والدین کی نافرمانی کرنا ہے ، پھر آپ نے یہ آیت تلاوت کی : ” تم میری اور اپنے والدین کی شکر گزاری کرو اور میری ہی طرف لوٹنا ہے “ ۔ ( راوی بیان کرتے ہیں : ) نبی اکرم صلی اللہ علیہ وسلم ٹیک لگا کر بیٹھے ہوئے تھے ، آپ صلی اللہ علیہ وسلم سیدھے ہو کر بیٹھ گئے اور ارشاد فرمایا : خبردار ! اور جھوٹی بات بھی ( کبیرہ گناہوں میں سے ایک ہے ) “ ۔ سیدنا عبداللہ بن عباس رضی اللہ عنہما فرماتے ہیں : ہر وہ چیز ، جس سے اللہ تعالیٰ نے منع کیا ہو ( اس کا ارتکاب ) کبیرہ گناہ شمار ہو گا ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ، البتہ حسن نامی راوی تدلیس کرنے والا ہے ، اور یہ روایت اس نے ” عنعنہ “ کے ساتھ نقل کی ہے ۔

سیدنا سہل بن ابوحثمہ رضی اللہ عنہ اپنے والد کا یہ بیان نقل کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” سات کبیرہ گناہوں سے اجتناب کرو ! لوگ خاموش رہے ، کسی نے کوئی بات نہیں کی ، تو نبی اکرم صلی اللہ علیہ وسلم نے فرمایا : کیا تم لوگ مجھ سے ان کے ( یعنی کبیرہ گناہوں کے ) بارے میں دریافت نہیں کرو گے ؟ ( وہ یہ ہیں : ) اللہ تعالیٰ کے ساتھ شرک کرنا ، کسی کو قتل کرنا ، میدان جنگ سے راہ فرار اختیار کرنا ، یتیم کا مال کھانا ، سود کھانا ، پاک دامن عورت پر الزام لگانا ، اور ہجرت کر لینے کے بعد دیہاتی زندگی اختیار کرنا “ ۔
یہ روایت امام طبرانی نے معجم کبیر میں نقل کی ہے اور اس کی سند میں ایک راوی ابن لہیعہ ہے ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم منبر پر چڑھے اور آپ نے ارشاد فرمایا : میں قسم اٹھاتا ہوں ! میں قسم اٹھاتا ہوں ! پھر آپ منبر سے نیچے تشریف لے آئے اور ارشاد فرمایا : تم لوگ یہ خوش خبری حاصل کرو ! تم لوگ یہ خوشخبری حاصل کرو ! کہ جو شخص پانچ نمازیں ادا کرے ، اور کبیرہ گناہوں سے اجتناب کرے ، وہ جنت کے جس بھی دروازے سے چاہے گا ، اندر داخل ہو جائے گا ، مطلب نامی راوی بیان کرتے ہیں : میں نے ایک شخص کو سیدنا عبداللہ بن عمرو رضی اللہ عنہ سے یہ سوال کرتے ہوئے سنا : کیا آپ نے نبی اکرم صلی اللہ علیہ وسلم کو ان ( کبیرہ گناہوں ) کا ذکر کرتے ہوئے سنا ہے ، تو سیدنا عبداللہ رضی اللہ عنہ نے جواب دیا : جی ہاں ! وہ کبیرہ گناہ یہ ہیں ) والدین کی نافرمانی کرنا ، اللہ تعالیٰ کے ساتھ شرک کرنا ، کسی کو قتل کرنا ، پاک دامن عورتوں پر الزام لگانا ، یتیم کا مال کھانا ، میدان جنگ سے راہ فرار اختیار کرنا اور سود کھانا ۔
یہ روایت امام طبرانی نے معجم کبیر میں نقل کی ہے ، اور اس کی سند میں ایک راوی مسلم بن ولید بن عباس ہے ، میں نے کسی کو اس کا ذکر کرتے ہوئے نہیں دیکھا ہے ۔

سیدنا ثوبان رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تین چیزوں کے ہمراہ ، کوئی عمل فائدہ نہیں دے گا ، اللہ تعالیٰ کے ساتھ شرک کرنا ، والدین کی نافرمانی کرنا ، اور میدان جنگ سے راہ فرار اختیار کرنا “ ۔
یہ روایت امام طبرانی نے معجم کبیر میں نقل کی ہے ، اُس کی سند میں ایک راوی یزید بن ربیع ہے ، جو انتہائی ضعیف ہے ۔

سیدنا سلمہ بن قیس رضی اللہ عنہ روایت کرتے ہیں : نبی اکرم صلی اللہ علیہ وسلم نے فرمایا ہے : ( شاید راوی بیان کرتے ہیں : وہ چار چیزیں ہیں جب سے میں نے ، نبی اکرم صلی اللہ علیہ وسلم کی زبانی ان کے بارے میں سنا ہے ، ( نبی اکرم صلی اللہ علیہ وسلم نے ارشاد فرمایا : خبردار ! تم لوگ کسی کو اللہ کا شریک قرار نہ دینا ، اور اُس جان کو قتل نہ کرنا ، جسے اللہ تعالیٰ نے حرام قرار دیا ہو ، البتہ حق کا معاملہ مختلف ہے ، اور تم زنا نہ کرنا ، اور تم چوری نہ کرنا ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” تین چیزیں ایسی ہیں کہ اگر کسی شخص میں ان میں سے کوئی ایک بھی چیز نہ ہو ، تو پھر ( اُس کے علاوہ ، اُس شخص کے گناہوں میں سے ) اللہ تعالیٰ جس کی چاہے گا ، مغفرت کر دے گا ، جو شخص ایسی حالت میں انتقال کرتا ہے ، کہ وہ کسی کو اللہ تعالیٰ کا شریک قرار نہ دیتا ہو ، اور وہ جادو کرنے والا نہ ہو کہ جادوگروں کے پیچھے جاتا ہو ، اور وہ اپنے بھائی کے خلاف دشمنی کا اظہار نہ کرے “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی لیث بن ابی سلیم ہے ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” کبیرہ گناہ سات ہیں ، اللہ تعالیٰ کے ساتھ شرک کرنا ، اُس جان کو قتل کرنا ، جسے اللہ تعالیٰ نے حرام قرار دیا ہے ، البتہ اُس کے حق کا معاملہ مختلف ہے ، پاک دامن عورت پر الزام لگانا ، میدان جنگ سے راہ فرار اختیار کرنا ، سود کھانا ، یتیم کا مال کھانا ، اور ہجرت کرنے کے بعد دیہاتی زندگی کی طرف لوٹ جانا “ ۔
یہ روایت امام طبرانی نے معجم اوسط میں نقل کی ہے اور اُس کی سند میں ایک راوی ابوبلال اشعری ہے اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : ایک شخص نے دریافت کیا : یا رسول اللہ ! کبیرہ گناہ کون سے ہیں ؟ نبی اکرم صلی اللہ علیہ وسلم نے ارشاد فرمایا : اللہ تعالیٰ کے ساتھ شرک کرنا اللہ تعالیٰ کی رحمت سے مایوس ہونا ۔
یہ روایت امام بزار اور امام طبرانی نے نقل کی ہے اور اس کے رجال کی توثیق کی گئی ہے ۔

سیدنا عبداللہ بن مسعود رضی اللہ عنہ فرماتے ہیں : کبیرہ گناہ یہ ہیں : اللہ کے ساتھ شرک کرنا ، اللہ تعالیٰ کی تدبیر سے ( خود کو ) محفوظ سمجھنا ، اللہ تعالیٰ کی رحمت سے مایوس ہونا اور اس کی مہربانی سے ناامید ہونا ۔
ایک روایت میں یہ الفاظ ہیں : ” سب سے بڑے کبیرہ گناہ “ اس کی سند صحیح ہے ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے اپنے اصحاب سے فرمایا : میں تم لوگوں سے اس بات پر بیعت لوں گا کہ تم کسی کو اللہ کا شریک قرار نہیں دو گے ، اور تم کسی ایسی جان کو قتل نہیں کرو گے ، جسے اللہ تعالیٰ نے حرام قرار دیا ہو ، البتہ حق کا معاملہ مختلف ہے ، اور تم زنا نہیں کرو گے ، اور تم چوری نہیں کرو گے ، اور تم نشہ آور چیز نہیں پیو گے ، جو شخص ان میں سے کوئی کام کرے گا اور پھر اُس پر حد قائم ہو جائے ، تو وہ کفارہ بن جائے گی ، اور جس شخص کی اللہ تعالیٰ پردہ پوشی کر لے ، تو اُس کا حساب اللہ تعالیٰ کے ذمہ ہو گا ، جو شخص ان میں سے کوئی بھی کام نہیں کرے گا ، تو میں اللہ تعالیٰ کی طرف سے اُسے جنت کی ضمانت دیتا ہوں ۔
یہ روایت امام طبرانی نے معجم اوسط میں نقل کی ہے ، اس کے رجال کی توثیق کی گئی ہے ، البتہ اسے عمرو بن شعیب نے ، اپنے والد کے حوالے سے ، اپنے دادا سے نقل کیا ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اس شخص کی آگ نہیں بجھے گی ، اُس کا کام ختم نہیں ہو گا ، اور اس کے عذاب میں تخفیف نہیں ہو گی ، وہ شخص جو کسی کو اللہ کا شریک قرار دیتا ہو ، یا وہ شخص جو کسی بے گناہ کو پکڑ کر حاکم وقت کے پاس لے جاتا ہے ، اور وہ حاکم کی سے قتل کر دیتا ہے ، اور وہ شخص جو اپنے والدین کا نافرمان ہو “ ۔
یہ روایت امام طبرانی نے معجم اوسط میں نقل کی ہے اور اس کی سند میں ایک راوی علی بن سنان ہے ، اسے امام أحمد نے ضعیف قرار دیا ہے ۔

سیدنا عبداللہ بن انیس جہنی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بڑے کبیرہ گناہوں میں ، اللہ کے ساتھ شرک کرنا اور جھوٹی قسم اٹھانا شامل ہیں “ ۔
یہ روایت امام طبرانی نے معجم اوسط میں نقل کی ہے ، اور یہ مکمل روایت ، قسموں اور نذروں سے متعلق باب میں آئے گی ، اس کے رجال کی توثیق کی گئی ہے ۔

سیدنا معاذ بن جبل رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اور بولا: یا رسول اللہ ! آپ مجھے کسی ایسے عمل کی تعلیم دیجیے ! کہ جب میں اس پر عمل کر لوں ، تو میں جنت میں داخل ہو جاؤں ، نبی اکرم صلی اللہ علیہ وسلم نے فرمایا : تم کسی کو اللہ کا شریک قرار نہ دو ! خواہ تمہیں عذاب دیا جائے ، یا تمہیں جلا دیا جائے ، اور اپنے ماں باپ کی اطاعت کرو ! اگرچہ وہ تمہیں تمہارے مال سے اور تمہاری ہر چیز سے باہر نکال دیں ، اور تم جان بوجھ کر نماز ترک نہ کرنا ، کیونکہ جو شخص جان بوجھ کر نماز ترک کر دیتا ہے ، اُس سے اللہ تعالیٰ کا ذمہ لاتعلق ہو جاتا ہے ، اور تم شراب نہ پینا ، کیونکہ یہ تمام برائیوں کی کنجی ہے ، اور تم حکومت کے بارے میں ، اُس کے متعلقہ افراد سے جھگڑا نہ کرنا ، اگرچہ تم یہ سمجھ رہے ہو کہ تمہیں اُس کا حق ہے ، اور تم اپنی گنجائش میں سے ، اپنے اہل خانہ پر خرچ کرنا ، اور اُن سے اپنا عصا نہ اُٹھانا ، انہیں اللہ تعالیٰ کا ڈر دلاتے رہنا ۔
یہ روایت امام طبرانی نے معجم اوسط میں نقل کی ہے اور اس کی سند میں ایک راوی عمرو بن واقد ہے ، جسے امام بخاری رحمہ اللہ اور ایک جماعت نے ضعیف قرار دیا ہے ، ثوری فرماتے ہیں : وہ صدوق تھا ۔

سیدنا بریدہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بڑے کبیرہ گناہ یہ ہیں ، اللہ تعالیٰ کے ساتھ شرک کرنا ، والدین کی نافرمانی کرنا ، اضافی پانی نہ دینا ، اور نر جانور کو ( جفتی کے لیے ) نہ دینا “ ۔
یہ روایت امام بزار نے نقل کی ہے ، اور اس کی سند میں ایک راوی صالح بن حیان ہے ، وہ ضعیف ہے ، کسی نے اُس کی توثیق نہیں کی ہے ۔

سیدنا فضالہ بن عبید رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تین افراد ہیں ، جن کے بارے میں سوال نہیں کیا جائے گا وہ شخص جو جماعت سے الگ ہو جائے ، اپنے امام کی نافرمانی کرے ، اور گناہ گار ہونے کے عالم میں مر جائے ، وہ کنیز یا غلام ، جو اپنے آقا کو چھوڑ کر مفرور ہو جائے ، اور اسی حالت میں مر جائے ، وہ عورت جس کا شوہر اس کے پاس موجود نہ ہو ، اور شوہر نے اُس عورت کی ضروریات فراہم کی ہوئی ہوں ، تو شوہر کی غیر موجودگی میں وہ زینت کا اظہار کرے ، تین افراد ہیں ، جن کے بارے میں سوال نہیں کیا جائے گا ، وہ شخص ، جو اللہ تعالیٰ کی چادر کے بارے میں اُس کا مقابلہ کرتا ہے ، اُس کی چادر کبریائی ہے اور اس کا تہبند ، عزت ( غلبہ ) ہے وہ شخص ، جو اللہ تعالیٰ کے حکم کے بارے میں شک کرتا ہے ، اور وہ شخص ، جو اللہ تعالیٰ کی رحمت سے مایوس ہو “ ۔
یہ روایت امام بزار اور امام طبرانی نے معجم کبیر میں نقل کی ہے انہوں نے اسے دو مختلف احادیث کے طور پر نقل کیا ہے اس کے رجال ثقہ ہیں ۔

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” عورت پر فرشتے مسلسل لعنت کرتے رہتے ہیں ( راوی کو شک ہے ، یا شاید یہ الفاظ ہیں : ) اُس پر اللہ تعالیٰ ، اس کے فرشتے ، رحمت کے نگران فرشتے ، عذاب کے نگران فرشتے لعنت کرتے ہیں ، جب تک وہ اللہ تعالیٰ کی نافرمانی میں سے ، کسی بھی چیز کا ارتکاب کرتی ہے “ ۔
یہ روایت امام بزار نے نقل کی ہے ، اس کی سند میں ایک راوی عبیداللہ بن سلمان اغر ہے ، جسے امام ابن حبان رحمہ اللہ نے ثقہ قرار دیا ہے ، امام بخاری رحمہ اللہ نے اس کا ذکر کتاب ” الضعفاء “ میں کیا ہے ، ابوحاتم فرماتے ہیں : اس کو کتاب ” الضعفاء “ سے منتقل کر دیا جائے گا کیونکہ میں نے اس کے حوالے سے کوئی منکر حدیث نہیں دیکھی ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا ہے : ” گندگی والے لوگ ، ہلاکت کا شکار ہو گئے “ ۔
( علامہ ہیثمی فرماتے ہیں : ) : ابن اثیر نے کتاب ” النہایہ “ میں یہ بات بیان کی ہے : گندگی والے لوگوں سے مراد ، وہ لوگ ہیں ، جو گندی عورتوں کے پاس جاتے ہیں ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبداللہ بن سعید مقبری ہے اور وہ انتہائی ضعیف ہے ۔

سیدنا ابوسعید خدری رضی اللہ عنہ فرماتے ہیں : تم لوگ کچھ ایسے عمل کرتے ہو ! جو تمہارے نزدیک بال سے زیادہ باریک ہوتے ہیں اور نبی اکرم صلی اللہ علیہ وسلم کے زمانے میں ، ہم لوگ انہیں ہلاکت کا شکار کر دینے والے اعمال شمار کرتے تھے ۔
یہ روایت امام بزار نے نقل کی ہے ، اس کی سند میں ایک راوی عباد بن راشد ہے ، جسے یحیی بن معین اور دیگر حضرات نے ثقہ قرار دیا ہے ، جبکہ امام ابوداؤد اور دیگر حضرات نے اسے ضعیف قرار دیا ہے ۔
( علامہ ہیثمی فرماتے ہیں : ) : اس حدیث کے مختلف طرق ، توبہ سے متعلق باب میں آئیں گے ، ان شاء اللہ ۔