مجمع الزوائد ومنبع الفوائد

سیدنا عمرو بن جموح رضی اللہ عنہ بیان کرتے ہیں : اُنہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بنده صریح ایمان کا حقدار اُس وقت تک نہیں ہوتا ، جب تک وہ اللہ تعالیٰ کے لیے کسی سے محبت نہیں رکھتا ، اور اللہ تعالیٰ کے لیے کسی سے بغض نہیں رکھتا ، جب وہ اللہ تعالیٰ کے لیے کسی سے محبت رکھتا ہے اور اللہ تعالیٰ کے لیے کسی سے بغض رکھتا ہے ، تو وہ اللہ تعالی کی ولایت کا مستحق ہو جاتا ہے ( اور حدیث قدسی میں ، اللہ تعالیٰ فرماتا ہے : ) ” میرے بندوں میں سے ، میرے اولیاء اور میری مخلوق میں سے ، میرے محبوب بندے ، وہ ہیں کہ میرے ذکر کے ہمراہ اُن کا ذکر کیا جاتا ہے ، اور اُن کے ذکر کے ہمراہ ، میرا ذکر کیا جاتا ہے “ ۔
یہ روایت امام أحمد نے نقل کی ہے ، اس کی سند میں ایک راوی کی رشدین بن سعد ہے ، اور وہ منقطع اور ضعیف ہے ۔

سیدنا عمرو بن حمق رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” آدمی ، صریح ایمان کو اُس وقت تک نہیں پا سکتا ، جب تک وہ اللہ تعالیٰ کے لیے کسی کے ساتھ محبت نہیں رکھتا ، اور اللہ تعالی کے لیے کسی کے ساتھ بغض نہیں رکھتا ، جب وہ اللہ تعالیٰ کے لیے محبت رکھتا ہے ، اور اللہ تعالیٰ کے لیے بغض رکھتا ہے ، تو وہ ولایت کا مستحق ہو جاتا ہے ( حدیث قدسی میں ، اللہ تعالیٰ نے یہ ارشاد فرمایا ہے : ) ” میرے بندوں میں سے ، میرے اولیاء اور میری مخلوق میں سے ، میرے محبوب بندے ، وہ ہیں کہ میرے ذکر کے ساتھ اُن کا ذکر کیا جاتا ہے ، اور اُن کے ذکر کے ساتھ میرا ذکر کیا جاتا ہے “ ۔
یہ روایت امام طبرانی نے معجم کبیر میں نقل کی ہے اور اس کی سند میں ایک راوی رشدین ہے اور وہ ضعیف ہے ۔

سیدنا معاذ بن انس رضی اللہ عنہ کے بارے میں یہ بات منقول ہے : اُنہوں نے نبی اکرم صلی اللہ علیہ وسلم سے افضل ایمان کے بارے میں سوال کیا ، تو آپ صلی اللہ علیہ وسلم نے ارشاد فرمایا : یہ کہ تم اللہ تعالیٰ کے لئے محبت رکھو ، اللہ تعالیٰ کے لیے بغض رکھو ، اور اپنی زبان کو اللہ کے ذکر کے لیے استعمال کرو ! سیدنا معاذ بن انس رضی اللہ عنہ نے دریافت کیا : یا رسول اللہ ! وہ کیسے ؟ نبی اکرم صلی اللہ علیہ وسلم نے ارشاد فرمایا : ” یوں کہ تم لوگوں کے لیے وہی چیز پسند کرو ، جو تم اپنے لیے پسند کرتے ہو ، اور تم لوگوں کے لیے وہی چیز ناپسند کرو ، جو تم اپنے لیے ناپسند کرتے ہو “ ۔
ایک اور روایت میں یہ الفاظ آئے ہیں : ” اور یہ کہ تم بھلائی کی بات کہو یا پھر خاموش رہو “ ۔
پہلی روایت میں رشدین بن سعد ہے ، اور دوسری روایت میں ابن لہیعہ ہے ، اور یہ دونوں راوی ضعیف ہیں ، یہ دونوں روایات امام أحمد نے نقل کی ہیں ۔

سیدنا براء بن عازب رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے پاس بیٹھے ہوئے تھے ، آپ نے دریافت کیا : اسلام کی کون سی رسی زیادہ مضبوط ہے ؟ لوگوں نے عرض کی : نماز ، نبی اکرم صلی اللہ علیہ وسلم نے فرمایا : وہ اچھی ہے ، لیکن یہ مراد نہیں ہے ، لوگوں نے عرض کی : رمضان کے روزے ، آپ نے فرمایا : یہ بھی اچھے ہیں لیکن یہ مراد نہیں ہے ، لوگوں نے عرض کی : جہاد کرنا ، آپ نے فرمایا : یہ بھی اچھا ہے ، لیکن یہ مراد نہیں ہے ، پھر آپ نے فرمایا : اسلام کی سب سے مضبوط رسی یہ ہے کہ تم اللہ تعالیٰ کے لئے محبت رکھو اور اللہ کے لیے بغض رکھو ۔
یہ روایت امام أحمد نے نقل کی ہے ، اس کی سند میں ایک راوی لیث بن ابوسلیم ہے ، جسے اکثر حضرات نے ضعیف قرار دیا ہے ۔

سیدنا ابوذر غفاری رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم ہمارے پاس تشریف لائے ، تو آپ نے ارشاد فرمایا : کیا تم لوگ جانتے ہو ؟ کون سا عمل ، اللہ تعالیٰ کے نزدیک سب سے زیادہ پسندیدہ ہے ؟ کسی نے کہا: نماز اور زکوۃ ، کسی نے کہا: جہاد ، نبی اکرم صلی اللہ علیہ وسلم نے ارشاد فرمایا : اللہ تعالیٰ کے نزدیک سب سے زیادہ پسندیدہ عمل یہ ہے کہ اللہ تعالیٰ کی خاطر کسی سے محبت رکھی جائے اور اللہ تعالیٰ کی خاطر کسی سے بغض رکھا جائے ۔
( علامہ ہیثمی فرماتے ہیں : ) میں یہ کہتا ہوں : امام ابوداؤد نے اس روایت کا ایک حصہ نقل کیا ہے ،
یہ روایت امام أحمد نے نقل کی ہے اور اس کی سند میں ایک ایسا شخص ہے ، جس کا نام بیان نہیں کیا گیا ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اللہ تعالیٰ کی خاطر محبت رکھے ۔ یہاں ہاشم نامی راوی نے یہ الفاظ نقل کئے ہیں : ۔ جس شخص کو یہ بات پسند ہو کہ وہ ایمان کا ذائقہ چکھ لے ، اُسے کسی ایسے شخص کے ساتھ محبت رکھنی چاہیے ، جس کے ساتھ ، وہ صرف اللہ تعالیٰ کی خاطر محبت رکھے “ ۔
یہ روایت امام أحمد اور امام بزار نے نقل کی ہے اور اس کے رجال ثقہ ہیں ۔

سیدنا عبداللہ بن مسعود رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، تو آپ صلی اللہ علیہ وسلم نے ارشاد فرمایا : اے ابن مسعود ! ایمان کی کون سی رسی سب سے زیادہ مضبوط ہے ؟ میں نے عرض کی : اللہ اور اس کا رسول زیادہ بہتر جانتے ہیں ، آپ صلی اللہ علیہ وسلم نے ارشاد فرمایا : اسلام کی سب سے مضبوط رسی اللہ تعالیٰ کے لیے دوستی رکھنا ہے ، اللہ تعالیٰ کے لیے محبت رکھنا ہے ، اور اللہ تعالیٰ کے لیے بغض رکھنا ہے ۔ ۔ ۔ ۔ ۔ ۔ ۔ اس کے بعد راوی نے پوری حدیث ذکر کی ہے ، یہ مکمل روایت علم سے متعلق باب میں آئے گی ۔
یہ روایت امام طبرانی نے معجم صغیر میں نقل کی ہے ، اس کی سند میں ایک راوی عقیل بن جعد ہے ، امام بخاری رحمہ اللہ فرماتے ہیں : یہ منکر الحدیث ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص اللہ تعالیٰ کے لیے کسی سے محبت رکھتا ہے ، اللہ تعالیٰ کے لیے بغض رکھتا ہے ، اللہ تعالیٰ کے لیے ( کسی کو کچھ ) دیتا ہے ، اللہ تعالیٰ کے لیے روک لیتا ( یعنی نہیں دیتا ) ہے ، وہ ایمان کو مکمل کر لیتا ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی صدقہ بن عبداللہ سمین ہے ، جسے امام بخاری رحمہ اللہ ، امام أحمد اور دیگر حضرات نے ضعیف قرار دیا ہے ، امام ابوحاتم فرماتے ہیں : اس کا محل صدق ہے ۔

سیدنا عبداللہ بن مسعود رضی اللہ عنہ ارشاد فرماتے ہیں : ایمان میں یہ بات بھی شامل ہے کہ آدمی اپنے بھائی کے ساتھ یوں محبت رکھے کہ وہ اُس کے ساتھ صرف ، اللہ تعالیٰ کی خاطر محبت رکھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی اسحاق طبری ہے ، اور
یہ روایت ” منقطع “ ہے اور یہ ” انقطاع “ عبدالرزاق نامی راوی اور ابواسحاق نامی راوی کے درمیان ہے ۔

مجاہد نے ، سیدنا عبداللہ بن عمر رضی اللہ عنہما کے بارے میں یہ بات نقل کی ہے : اُنہوں نے مجھ سے فرمایا : اللہ تعالیٰ کی خاطر محبت رکھو ! اللہ تعالیٰ کی خاطر بغض رکھو ، اللہ تعالیٰ کی خاطر دوستی رکھو ، اللہ تعالیٰ کی خاطر دشمنی رکھو ، اللہ تعالیٰ کی ولایت تک صرف اس ( عمل ) کے ذریعے ہی پہنچا جا سکتا ہے ، اور آدمی نے خواہ کتنی ہی نمازیں پڑھی ہوں اور روزے رکھے ہوں ، وہ ایمان کا ذائقہ اُس وقت تک نہیں پا سکتا ، جب تک وہ ایسا نہیں ہو جاتا ، لوگوں کا بھائی چارہ ، تو دنیاوی معاملے کے حوالے سے ہوتا ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی لیث بن ابوسلیم ہے ، اکثر حضرات نے اسے ضعیف قرار دیا ہے ، اس سے پہلے سیدنا عمرو بن حمق رضی اللہ عنہ کے حوالے سے حدیث گزر چکی ہے ، جو اُس شخص کے بارے میں ہے ، جو اللہ تعالیٰ کی خاطر غضبناک ہوتا ہے ، اور اللہ تعالیٰ کی خاطر راضی ہوتا ہے ۔