مجمع الزوائد ومنبع الفوائد

سیدنا عتبہ بن عبد رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اگر کوئی شخص اپنی پیدائش کے دن سے ، مرنے کے دن تک ، اللہ تعالیٰ کی رضا مندی کے لیے ، اپنے چہرے کے بل گرا رہے ، تو قیامت کے دن ، وہ اس عمل کو بھی حقیر سمجھے گا ۔ “
یہ روایت امام أحمد نے اور امام طبرانی نے معجم کبیر میں نقل کی ہے ، اس میں ایک راوی بقیہ ہے ، اور وہ تدلیس کرنے والا ہے لیکن یہاں اس نے ” تحدیث “ کی صراحت کی ہے ، اس روایت کے باقی راویوں کی توثیق کی گئی ہے ۔

سیدنا محمد بن ابوعمرہ رضی اللہ عنہ ، جو صحابہ کرام میں سے ہیں ، وہ فرماتے ہیں : ” اگر کوئی شخص اپنی پیدائش کے دن سے لے کر ، بوڑھا ہونے کے بعد مرنے کے دن تک ، اللہ تعالیٰ کی اطاعت میں اپنے چہرے کے بل چلتا رہے ، تو قیامت کے دن وہ اسے بھی حقیر سمجھے گا ، اور یہ آرزو کرے گا : کہ اُسے دنیا کی طرف واپس بھیج دیا جائے ، تاکہ اُس کے اجر و ثواب میں اضافہ ہو۔ “ ۔
یہ روایت امام أحمد نے اور امام طبرانی نے معجم کبیر میں نقل کی ہے ، اور اس کے رجال صحیح کے رجال ہیں ۔

سیدنا جابر بن عبداللہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” ساتوں آسمانوں میں ، ایک قدم جتنی ، یا ایک بالشت جتنی ، یا ایک تھیلی جتنی جگہ ( بھی خالی نہیں ہے ، ہر جگہ پر ) یا کوئی فرشتہ قیام کی حالت میں ، یا کوئی فرشتہ سجدے کی حالت میں ( عبادت کر رہا ہے ) جب قیامت کا دن ہو گا ، تو وہ سب یہی کہیں گے : تو ہر عیب سے پاک ہے ، ہم نے تیری ویسے عبادت نہیں کی ، جو تیری عبادت کا حق ہے ، تاہم ، ہم کسی کو تیرا شریک قرار نہیں دیتے ہیں “ ۔
یہ روایت امام طبرانی نے معجم کبیر میں نقل کی ہے اور اس کی سند میں ایک راوی عروہ بن مروان ہے ، امام دارقطنی رحمہ اللہ فرماتے ہیں : یہ پڑھا لکھا نہیں تھا ، اور قوی نہیں ہے ۔