فضائل الصحابة
فضائل عثمان بن عفان رضي الله عنه— سیدنا عثمان بن عفان رضی اللہ عنہ کے فضائل کا بیان۔
(بَابُ حِصَارِ عُثْمَانَ وَمَا قَالَهُ يَوْمَ الدَّارِ) باب: (سیدنا عثمان رضی اللہ عنہ کے محاصرے اور یومِ دار میں ان کے فرمودات کا بیان)۔
حَدَّثَنَا عَبْدُ اللَّهِ ، قَالَ: أَنَا أَحْمَدُ بْنُ جَمِيلٍ أَبُو يُوسُفَ قَالَ أَنَا ابْنُ الْمُبَارَكِ قَالَ أَنَا يُونُسُ ، عَنِ الزُّهْرِيِّ ، عَنْ أَبِي سَلَمَةَ بْنِ عَبْدِ الرَّحْمَنِ ، أَنَّ أَبَا قَتَادَةَ وَرَجُلًا آخَرَ مَعَهُ مِنَ الْأَنْصَارِ دَخَلَا عَلَى عُثْمَانَ وَهُوَ مَحْصُورٌ، فَاسْتَأْذَنَا فِي الْحَجِّ فَأَذِنَ لَهُمَا، ثُمَّ قَالَا: مَعَ مَنْ نَكُونُ إِنْ ظَهَرَ هَؤُلَاءِ الْقَوْمُ؟ قَالَ: عَلَيْكُمْ بِالْجَمَاعَةِ، قَالَا: أَرَأَيْتَ إِنْ أَصَابَكَ هَؤُلَاءِ الْقَوْمُ، وَكَانَتِ الْجَمَاعَةُ فِيهِمْ؟ قَالَ: الْزَمُوا الْجَمَاعَةَ حَيْثُ كَانَتْ، قَالَ: فَخَرَجْنَا مِنْ عِنْدَهُ، فَلَمَّا بَلَغْنَا بَابَ الدَّارِ لَقِينَا الْحَسَنَ بْنَ عَلِيٍّ دَاخِلًا، فَرَجَعْنَا عَلَى أَثَرِ الْحَسَنِ لِنَنْظُرَ مَا يُرِيدُ، فَلَمَّا دَخَلَ الْحَسَنُ عَلَيْهِ قَالَ: يَا أَمِيرَ الْمُؤْمِنِينَ، إِنَّا طَوْعُ يَدِكَ، فَمُرْنِي بِمَا شِئْتَ، فَقَالَ لَهُ عُثْمَانُ: يَا ابْنَ أَخِي، ارْجِعْ فَاجْلِسْ فِي بَيْتِكَ حَتَّى يَأْتِيَ اللَّهُ بِأَمْرِهِ، فَلَا حَاجَةَ لِي فِي هِرَاقَةِ الدِّمَاءِ.ابو سلمہ بن عبد الرحمن رحمہ اللہ سے روایت ہے کہ سیدنا ابو قتادہ رضی اللہ عنہ اور ان کے ساتھ ایک دوسرے انصاری شخص سیدنا عثمان رضی اللہ عنہ کے پاس اس وقت حاضر ہوئے جب وہ محصور تھے، ان دونوں نے حج کی اجازت مانگی تو انہوں نے انہیں اجازت دے دی۔
پھر ان دونوں نے پوچھا: ”اگر یہ لوگ غالب آ جائیں تو ہم کس کے ساتھ ہوں؟“ انہوں نے فرمایا: ”تم پر جماعت کے ساتھ رہنا لازم ہے۔“ ان دونوں نے عرض کیا: ”بھلا یہ بتائیے کہ اگر یہ لوگ آپ کو (شہید) کر دیں اور جماعت انہی کے پاس ہو؟“ انہوں نے فرمایا: ”جماعت جہاں کہیں بھی ہو، تم اسی کو لازم پکڑنا۔“
(سیدنا ابو قتادہ رضی اللہ عنہ) فرماتے ہیں کہ پھر ہم ان کے پاس سے نکلے، جب ہم گھر کے دروازے پر پہنچے تو ہماری ملاقات سیدنا حسن بن علی رضی اللہ عنہما سے ہوئی جو اندر داخل ہو رہے تھے، تو ہم بھی سیدنا حسن رضی اللہ عنہما کے پیچھے پیچھے واپس مڑ گئے تاکہ دیکھیں کہ وہ کیا ارادہ رکھتے ہیں۔ جب سیدنا حسن رضی اللہ عنہما ان کے پاس داخل ہوئے تو عرض کیا: ”اے امیر المؤمنین! ہم آپ کے زیرِ فرمان ہیں، آپ مجھے جو چاہیں حکم دیں۔“ تب سیدنا عثمان رضی اللہ عنہ نے ان سے فرمایا: ”اے میرے بھتیجے! تم واپس جا کر اپنے گھر میں بیٹھے رہو یہاں تک کہ اللہ اپنا فیصلہ فرما دے، مجھے خون بہانے کی کوئی حاجت نہیں۔“