سنن الدارقطني

سیدنا انس رضی اللہ عنہ بیان کرتے ہیں: ہم لوگ نبی کریم صلی اللہ علیہ وسلم کے زمانہ اقدس میں اپنے امام کو لقمہ دیا کرتے تھے۔

سیدنا علی رضی اللہ عنہ ارشاد فرماتے ہیں: ”جو شخص امام کو لقمہ دے، اس نے کلام کر لیا (یعنی اس کی نماز ٹوٹ جائے گی)۔“ اس روایت کا راوی محمد بن سالم متروک ہے۔

سیدنا علی رضی اللہ عنہ ارشاد فرماتے ہیں: ”یہ کلام ہے (راوی کہتے ہیں) یعنی امام کو لقمہ دینا۔“

سیدنا علی رضی اللہ عنہ ارشاد فرماتے ہیں: ”جب امام تم سے کچھ کھانے کے لیے مانگے، تو اسے کھلا دو (یعنی اسے بھولنے پر لقمہ دو)۔“

سیدنا ابی بن کعب رضی اللہ عنہ بیان کرتے ہیں: نبی کریم صلی اللہ علیہ وسلم ہمیں نماز پڑھا رہے تھے، آپ نے ایک سورت پڑھنی شروع کی، آپ نے اس میں سے ایک آیت کو چھوڑ دیا، جب آپ نماز سے فارغ ہوئے، تو میں نے عرض کیا: یا رسول اللہ! کیا فلاں آیت منسوخ ہو گئی ہے؟ نبی کریم صلی اللہ علیہ وسلم نے فرمایا: ”نہیں۔“ میں نے عرض کیا: آپ نے اس کی قراءت نہیں کی، نبی کریم صلی اللہ علیہ وسلم نے فرمایا: ”تم نے مجھے لقمہ کیوں نہیں دیا؟“

سیدنا انس رضی اللہ عنہ بیان کرتے ہیں: نبی کریم صلی اللہ علیہ وسلم کے اصحاب نماز کے دوران ایک دوسرے کو لقمہ دے دیا کرتے تھے۔