تفسیر السعدی (عبدالرحمٰن السعدی) — سورۃ الأعراف (7) — آیت 168

﴿وَقَطَّعْنٰهُمْ فِی الْاَرْضِ اُمَمًا﴾ ”اور ہم نے انھیں ٹکڑے ٹکڑے کر کے زمین میں منتشر کر دیا۔“جبکہ پہلے وہ مجتمع تھے۔ ﴿ مِنْهُمُ الصّٰؔلِحُوْنَ ﴾ ”کچھ ان میں نیک ہیں “ ان میں ایسے لوگ بھی ہیں جو اللہ کے حقوق اور بندوں کے حقوق کو پورا کرتے ہیں۔ ﴿ وَمِنْهُمْ دُوْنَ ذٰلِكَ ﴾ ”اور بعض اور طرح کے ہیں۔“ اور ان میں کچھ لوگ ایسے بھی ہیں جو نیکی کے کم تر درجے پر فائز ہیں یا تو وہ نیکی میں متوسط قسم کے لوگ ہیں یا وہ اپنی جانوں پر ظلم کرتے ہیں۔ ﴿وَبَلَوْنٰهُمْ ﴾ اور ہم نے اپنی عادت اور سنت کے مطابق ان کو آزمایا ﴿ بِالْحَسَنٰتِ وَالسَّیِّاٰتِ ﴾ ”خوبیوں میں اور برائیوں میں “ یعنی آسانی اور تنگی کے ذریعے سے ﴿ لَعَلَّهُمْ یَرْجِعُوْنَ ﴾ ”شاید کہ وہ لوٹ آئیں۔“ شاید کہ وہ ہلاکت کی وادی سے واپس لوٹ آئیں جس میں وہ مقیم ہیں اور اس ہدایت کی طرف رجوع کریں جس کے لیے ان کو پیدا کیا گیا ہے۔ پس ان میں ہمیشہ سے نیک، بد اور متوسط لوگ موجود رہے ہیں۔