تفسیر السعدی (عبدالرحمٰن السعدی) — سورۃ الروم (30) — آیت 19

﴿یُخْرِجُ الْحَیَّ مِنَ الْمَیِّتِ ﴾ ”وہی زندہ کو مردہ سے نکالتا ہے۔“ جیسے زندہ نباتات مردہ زمین سے، خوشہ بیج کے دانے سے، درخت گٹھلی سے، چوزہ انڈے سے اور مومن کافر سے نکلتا ہے۔ ﴿وَیُخْرِجُ الْمَیِّتَ مِنَ الْحَیِّ ﴾ ”اور وہی مردہ کو زندہ سے نکالتا۔“ متذکرہ بالا چیزوں کے برعکس ﴿وَیُحْیِ الْاَرْضَ بَعْدَ مَوْتِهَا ﴾ اللہ تعالیٰ زمین پر بارش برساتا ہے جبکہ زمین خشک اور مردہ پڑی ہوتی ہے۔ جب اللہ تعالیٰ اس پر بارش برساتا ہے تو وہ لہلہا اٹھتی، پھول جاتی اور ہر قسم کی خوش منظر نباتات اگاتی ہے۔ ﴿وَؔكَذٰلِكَ تُخْرَجُوْنَ ﴾ ”اور اسی طرح تمھیں بھی نکالا جائے گا“ تمھاری قبروں سے۔ یہ قطعی اور بہت بڑی دلیل و برہان ہے کہ وہ ہستی جس نے زمین کو اس کے مردہ ہو جانے کے بعد زندگی عطا کی، وہ مردوں کو زندہ کرے گی۔ عقل کے لحاظ سے دونوں امور کے مابین کوئی فرق نہیں، ایک چیز کے مشاہدے کے بعد دوسرے کے بعید ہونے کا کوئی موجب نہیں۔