تفسیر السعدی (عبدالرحمٰن السعدی) — سورۃ يونس (10) — آیت 54

﴿وَ ﴾ ”اور“ جب قیامت برپا ہوگی ﴿لَوْ اَنَّ لِكُ٘لِّ نَ٘فْ٘سٍ ظَلَمَتْ ﴾ اگر ہو ہر گناہ گار کے پاس جس نے کفر و معاصی کے ذریعے سے ظلم کیا ﴿ مَا فِی الْاَرْضِ﴾ ”جو کچھ زمین میں ہے“ یعنی زمین میں جو سونا چاندی وغیرہ ہے تو وہ سب کا سب اپنے کو اللہ تعالیٰ کے عذاب سے بچانے کے لیے فدیہ میں دے دے۔ ﴿لَافْتَدَتْ بِهٖ﴾ ”تو وہ ضرور فدیے میں دے دے۔“ مگر یہ فدیہ دینا اس کے کسی کام نہ آئے گا کیونکہ نفع و نقصان اور ثواب و عذاب تو نیک اور برے اعمال پر منحصر ہے۔ ﴿ وَاَسَرُّوا النَّدَامَةَ لَمَّؔا رَاَوُا الْعَذَابَ﴾ ”اور چھپے چھپے پچھتائیں گے وہ جب دیکھیں گے عذاب“ یعنی وہ لوگ جنھوں نے ظلم کیا دل ہی دل میں اپنے اعمال پر پچھتائیں گے مگر اب رہائی کا کوئی وقت نہیں ہو گا۔ ﴿ وَقُ٘ضِیَ بَیْنَهُمْ بِالْقِسْطِ ﴾ ”اور ان میں انصاف کے ساتھ فیصلہ کردیا جائے گا۔“ یعنی کامل انصاف کے ساتھ ان کے درمیان فیصلہ کیا جائے گا۔ جس میں کسی پہلو سے بھی ظلم و جور نہیں ہوگا۔