ترجمہ و تفسیر القرآن الکریم (عبدالسلام بھٹوی) — سورۃ النبأ (78) — آیت 14

(آیت 14تا16) {وَ اَنْزَلْنَا مِنَ الْمُعْصِرٰتِ مَآءً ثَجَّاجًا …: ” الْمُعْصِرٰتِ “} وہ بادل جو پانی سے بھرے ہوئے ہوں۔ {”ثَجٌّ“} شدت اور کثرت سے بہنا یا بہانا۔ یہ لازم و متعدی دونوں معنوں میں آتا ہے۔ {” ثَجَّاجًا “} کثرت سے برسنے والا۔ {” اَلْفَافًا “} ابوعبیدہ نے فرمایا: ”یہ {” لَفِيْفٌ “ } کی جمع ہے، جیسا کہ {”شَرِيْفٌ“} کی جمع {”أَشرَافٌ“} ہے۔“ (المراغی) اس کا معنی ہے گھنے، ایک دوسرے سے لپٹے ہوئے، جن میں کوئی فاصلہ نہیں۔