ترجمہ و تفسیر — سورۃ التين (95) — آیت 8

(آیت 8){ اَلَيْسَ اللّٰهُ بِاَحْكَمِ الْحٰكِمِيْنَ:} کوئی معمولی سا انصاف کرنے والا ہو وہ بھی اپنے اختیار میں جزا و سزا کا اہتمام کیے بغیر نہیں رہے گا، تو اللہ جو سب حاکموں سے بڑا حاکم ہے، وہ اس کا اہتمام کیوں نہیں کرے گا؟
ترمذی وغیرہ میں ابوہریرہ رضی اللہ عنہ سے ایک روایت ہے کہ رسول اللہ صلی اللہ علیہ وسلم نے فرمایا: ”جب تم میں سے کوئی سورت {” وَ التِّيْنِ وَ الزَّيْتُوْنِ “} پڑھے اور {” اَلَيْسَ اللّٰهُ بِاَحْكَمِ الْحٰكِمِيْنَ “} پر پہنچے تو کہے: [بَلٰی وَ أَنَا عَلٰی ذٰلِكَ مِنَ الشَّاهِدِيْنَ] [ترمذي، تفسیر القرآن، باب و من سورۃ والتین: ۳۳۴۷] ”کیوں نہیں! اور میں اس پر شہادت دینے والوں میں سے ہوں۔“ مگر یہ روایت صحیح نہیں، کیونکہ ترمذی رحمہ اللہ نے فرمایا کہ ابوہریرہ رضی اللہ عنہ سے ایک اعرابی نے یہ روایت بیان کی ہے جس کا نام ہی معلوم نہیں۔

8۔ 1 جو کسی پر ظلم نہیں کرتا اور اس کے عدل ہی کا یہ تقاضا ہے کہ وہ قیامت برپا کرے اور ان کی داد رسی کرے جن پر دنیا میں ظلم ہوا۔

[9] یعنی دنیا کے بادشاہوں میں بھی عدل کا یہ قانون رائج ہے کہ مجرموں کو سزا دیتے ہیں اور اچھے اور نمایاں کام کرنے والوں کو انعام دیتے ہیں۔ تو اللہ جو سب بادشاہوں کا بادشاہ ہے اس کے ہاں ہی یہ قانون رائج نہ ہو گا؟ ہاں یہ بات ضرور ہے کہ یہ دنیا چونکہ دار العمل ہے اس لیے ان گروہوں کا حساب اسی دنیا میں فوراً نہیں چکا دیا جاتا بلکہ اس جزا و سزا کو آخرت پر مؤخر کر دیا گیا ہے جو دار الجزاء ہے۔ البتہ اگر کسی فرد یا کسی قوم کا ظلم حد سے تجاوز کر جائے تو اللہ باقی لوگوں کو اس کے ظلم سے بچانے کی خاطر اس دنیا میں بھی اسے عذاب سے دو چار کر کے اور تباہ کر کے دوسروں کو اس سے بچا لیتا ہے۔ سیدنا ابوہریرہؓ فرماتے ہیں کہ جو شخص یہ سورت پڑھے تو جب: ﴿اَلَيْسَ اللّٰهُ بِاَحْكَمِ الْحٰكِمِيْنَ﴾ پر پہنچے تو اس کے بعد کہے: ﴿بَلٰي وَاَنَاعَلٰي ذٰلِكَ مِنَ الشَّاهِدِيْنَ﴾ [ترمذي۔ ابواب التفسير]

اس آیت کی تفسیر اگلی آیات کیساتھ ملاحظہ کریں۔