ترجمہ و تفسیر — سورۃ الرحمٰن (55) — آیت 78

(آیت 78) {تَبٰرَكَ اسْمُ رَبِّكَ ذِي الْجَلٰلِ وَ الْاِكْرَامِ:” تَبٰرَكَ “} باب تفاعل ہے، جب اس میں تشارک مقصود نہ ہو تو مبالغہ مراد ہوتا ہے، یعنی بہت برکت والا ہے تیرے رب کا نام۔ پھر جب اس کا نام بہت برکت والا ہے تو اس کی ذات پاک کس قدر بابرکت ہو گی۔ ثوبان رضی اللہ عنہ بیان کرتے ہیں کہ رسول اللہ صلی اللہ علیہ وسلم جب نماز سے فارغ ہوتے تو تین دفعہ استغفار کرتے اور یوں کہتے: [اَللّٰهُمَّ أَنْتَ السَّلَامُ وَ مِنْكَ السَّلاَمُ تَبَارَكْتَ يَا ذَا الْجَلاَلِ وَالإِْكْرَامِ] [مسلم، المساجد، باب استحباب الذکر بعد الصلاۃ …:۵۹۱] ”اے اللہ! تو ہی سلامتی والا ہے اور تجھی سے سلامتی ہے اے جلال اور اکرام والے!“ اس دعا میں کئی لوگ ان الفاظ کا اضافہ کرتے ہیں: {” وَإِلَيْكَ يُرْجَعُ السَّلاَمُ حَيِّنَا رَبَّنَا بِالسَّلاَمِ وَ أَدْخِلْنَا دَارَ السَّلاَمِ۔“} یہ الفاظ حدیث سے ثابت نہیں ہیں۔
{” ذِي الْجَلٰلِ وَ الْاِكْرَامِ “} اللہ تعالیٰ کا ایسا بابرکت نام ہے کہ رسول اللہ صلی اللہ علیہ وسلم نے اسے کثرت سے پڑھنے کی تاکید فرمائی ہے۔ انس رضی اللہ عنہ فرماتے ہیں کہ نبی صلی اللہ علیہ وسلم نے فرمایا: [أَلِظُّوْا بِيَا ذَا الْجَلاَلِ وَالإِْكْرَامِ] [ترمذي، الدعوات، باب: ۳۵۲۴، وقال الألباني صحیح] {” يَا ذَا الْجَلَالِ وَ الإِْكْرَامِ “} سے چمٹ جاؤ، اسے لازم پکڑ لو۔“ {”أَلِظُّوْا“ ”أَلَظَّ يُلِظُّ إِلْظَاظًا“} سے ہے جس کا معنی ”چمٹ جانا“ ہے۔ رسول اللہ صلی اللہ علیہ وسلم کے اس کو لازم پکڑنے کے حکم سے ظاہر ہو رہا ہے کہ یہ کس قدر بابرکت نام ہے۔

78۔ 1 تَبَارَکَ، برکت سے ہے جس کے معنی دوام و ثبات کے ہیں۔ مطلب یہ ہے اس کا نام ہمیشہ رہنے والا ہے، یا اس کے پاس ہمیشہ خیر کے خزانے ہیں۔ بعض نے اس کے معنی بلندی اور علوشان کے کئے ہیں اور جب اس کا نام اتنا بابرکت یعنی خیر اور بلندی کا حامل ہے تو اس کی ذات کتنی برکت اور عظمت و رفعت والی ہوگی۔

[47] پروردگار کا ذاتی نام اللہ ہے اور رحمٰن ذاتی بھی ہے اور صفاتی بھی۔ باقی اللہ کے سب نام صفات «» ی ہیں۔ ان میں سے ذوالجلال والا کرام بڑا بابرکت صفاتی نام ہے۔ یعنی اللہ تعالیٰ خود بھی بڑی بزرگی اور عزت والا ہے اور دوسروں کو عزت عطا کرنے والا اور ان پر لطف و احسان کرنے والا ہے۔ جیسا کہ اہل جنت پر اس کے لطف و احسان کا ذکر ان آیات میں آیا ہے، پھر جب اس کا نام ہی بڑا بابرکت ہے تو اس کی ذات مقدس کس قدر بابرکت ہو گی اور حدیث میں ہے کہ رسول اللہ ہر نماز سے سلام پھیرنے کے بعد پہلے اللہ اکبر پھر تین بار استغفر اللہ کہتے۔ پھر اس کے بعد یہ ذکر فرماتے: ﴿اللّٰھُمَّ أنْتَ السَّلاَمُ وَمِنْکَ السَّلاَمُ تَبَارَکْتَ یَا ذَالْجَلاَلِ وَالاِکْرَام﴾ [مسلم، کتاب المساجد ومواضع الصلوٰۃ، باب استحباب الذکر بعد الصلوۃ و بیان صفۃ]

اس آیت کی تفسیر اگلی آیات کیساتھ ملاحظہ کریں۔