ترجمہ و تفسیر — سورۃ النجم (53) — آیت 10

(آیت 10) ➊ {فَاَوْحٰۤى اِلٰى عَبْدِهٖ مَاۤ اَوْحٰى: ” فَاَوْحٰۤى “} (پھر اس نے وحی کی) کی ضمیر اللہ تعالیٰ کی طرف بھی جا سکتی ہے، اس صورت میں مطلب یہ ہو گا کہ پھر اللہ تعالیٰ نے (جبریل علیہ السلام کے واسطے سے) اپنے بندے کی طرف وحی کی اور {” فَاَوْحٰۤى “} کی ضمیر جبریل علیہ السلام کی طرف بھی جا سکتی ہے، مگر اس صورت میں {” عَبْدِهٖ “} میں ضمیر غائب سے مراد اللہ تعالیٰ کی ذات پاک ہو گی، کیونکہ {” عَبْدِهٖ “} سے مراد ”اللہ کے بندے“ کے سوا کوئی ہو ہی نہیں سکتا، کیونکہ آپ صلی اللہ علیہ وسلم ہی نہیں آسمان و زمین کا ہر شخص اللہ کا بندہ ہے، جبریل یا کسی اور کا کوئی بندہ نہیں۔ اس صورت میں مطلب یہ ہو گا کہ ”پھر جبریل نے اس اللہ کے بندے کی طرف وحی کی۔“
➋ {” مَاۤ اَوْحٰى “} (جو وحی کی) کو مبہم رکھ کر اس کی عظمتِ شان کی طرف اشارہ فرمایا ہے۔ مزید دیکھیے سورۂ طٰہٰ کی آیت(۷۸): «‏‏‏‏فَغَشِيَهُمْ مِّنَ الْيَمِّ مَا غَشِيَهُمْ» کی تفسیر۔ اس سے پچھلی آیات کے آخری فائدہ سے معلوم ہوتا ہے کہ اس وحی میں{” يٰۤاَيُّهَا الْمُدَّثِّرُ “} سے {” وَ الرُّجْزَ فَاهْجُرْ “} تک آیات بھی تھیں۔

اس آیت کی تفسیر پچھلی آیت کے ساتھ کی گئی ہے۔

[6] آپ صلی اللہ علیہ وسلم کے سیدنا جبرئیل کو اپنی اصلی شکل میں دیکھنے کی تائید اس حدیث سے بھی ہوتی ہے: سیدنا عبد اللہ بن مسعودؓ فرماتے ہیں کہ: ﴿فَكَانَ قَابَ قَوْسَيْنِ أَوْ أَدْنَىٰ فَأَوْحَىٰ إِلَىٰ عَبْدِهِ مَا أَوْحَىٰ﴾ سے یہ مراد ہے کہ نبی اکرم صلی اللہ علیہ وسلم نے جبرئیل کو (ان کی اصلی شکل میں) دیکھا ان کے چھ سو بازو (پر) تھے۔ [بخاري، كتاب التفسير]
اور یہ وحی غالباً سورۃ مدثر کی وہی آیات ہیں جن کا اوپر ذکر ہوا۔ یہ وحی اللہ تعالیٰ نے اپنے بندے پر جبرئیل کے واسطہ سے کی تھی۔

اس آیت کی تفسیر اگلی آیات کیساتھ ملاحظہ کریں۔