السنن الكبرى للبيهقي

امام شافعی رحمہ اللہ نے فرمایا: ”وہ (ام ولد) اپنی حالت میں مملوکہ (لونڈی) ہی ہے، البتہ اس کے آقا کے لیے اسے بیچنا جائز نہیں اور نہ ہی آزاد کرنے کے سوا کسی اور طریقے سے اسے اپنی ملکیت سے نکالنا جائز ہے، اور جب وہ (آقا) فوت ہو جائے تو وہ (لونڈی) اصل مال (ترکے) میں سے آزاد ہو جائے گی۔“
(امام شافعی رحمہ اللہ نے) فرمایا: ”یہ (مؤقف) سیدنا عمر بن خطاب رضی اللہ عنہ کی تقلید میں ہے۔“

عبداللہ بن عمر رضی اللہ عنہما، حضرت عمر بن خطاب رضی اللہ عنہ سے نقل فرماتے ہیں کہ جس لونڈی نے اپنے آقا کی اولاد کو جنم دیا اس کو فروخت، ہبہ اور وراثت نہ بنایا جائے، مالک اس سے فائدہ اٹھا سکتا ہے، اس کی موت کے بعد آزاد ہے۔

ابن عمر رضی اللہ عنہما فرماتے ہیں کہ حضرت عمر رضی اللہ عنہ نے امہات الاولاد کو فروخت کرنے سے منع کیا ہے، آپ رضی اللہ عنہ فرماتے ہیں: نہ فروخت کیا جائے گا، نہ ہبہ کیا جائے گا اور نہ وراثت بنائی جائے گی، اس کا مالک اس سے فائدہ اٹھا سکتا ہے، جب وہ فوت ہو گا تو وہ آزاد ہو جائے گی۔

عبداللہ بن دینار رحمہ اللہ فرماتے ہیں کہ دو آدمی سیدنا عبداللہ بن عمر رضی اللہ عنہما کے پاس آئے۔ سیدنا عبداللہ بن عمر رضی اللہ عنہما نے پوچھا: تم کہاں سے آئے ہو؟ وہ کہنے لگے: سیدنا عبداللہ بن زبیر رضی اللہ عنہما کے پاس سے اور انہوں نے ہمارے لیے کچھ اشیاء حلال قرار دی ہیں جو ہم پر حرام تھیں۔ سیدنا عبداللہ بن عمر رضی اللہ عنہما نے پوچھا: اس نے تمہارے لیے کیا حلال قرار دیا جو تم پر حرام قرار دی گئی؟ وہ کہنے لگے: اس نے امہات الاولاد کی بیع کو جائز قرار دیا ہے؟ فرمانے لگے: کیا تم ابوحفص سیدنا عمر رضی اللہ عنہ کو جانتے ہو؟ انہوں نے کہا: ہاں۔ فرمایا: وہ امہات الاولاد کی فروخت، ہبہ یا وراثت بنانے سے منع کرتے تھے، اس کا مالک اس سے اپنی زندگی میں فائدہ اٹھا سکتا ہے، جب وہ فوت ہو جائے تو وہ آزاد ہے۔
جماعت نے عبداللہ بن دینار سے اسی طرح روایت کیا ہے، اور بعض راویوں نے عبداللہ بن دینار سے اس میں غلطی کی اور اسے نبی ﷺ تک مرفوع کر دیا، اور یہ وہم ہے جس کا ذکر کرنا جائز نہیں۔

حضرت علی رضی اللہ عنہ نے فرمایا کہ «أُمَّهَاتِ الْأَوْلَادِ» ”امہاتِ اولاد“ کی بیع کے بارے میں حضرت عمر بن خطاب رضی اللہ عنہ نے مجھ سے مشورہ کیا، میں اور وہ دونوں اس کو آزاد خیال کرتے تھے تو حضرت عمر رضی اللہ عنہ نے اور ان کے بعد حضرت عثمان رضی اللہ عنہ نے بھی یہی فیصلہ فرمایا، جب میں خلیفہ بنا تو میں ان کو غلام خیال کرتا تھا، محمد بن سیرین رحمہ اللہ نے حضرت عبیدہ رحمہ اللہ سے اس کے بارے میں سوال کیا کہ کون سی رائے آپ کو زیادہ محبوب ہے؟ فرمایا: حضرت عمر اور حضرت علی رضی اللہ عنہما کی (مشترکہ) رائے کو میں حضرت علی رضی اللہ عنہ کی (اکیلی) رائے سے زیادہ محبوب جانتا ہوں، جب حضرت علی رضی اللہ عنہ نے اختلاف کو پا لیا۔

سیدنا علی رضی اللہ عنہ فرماتے ہیں کہ سیدنا عمر بن خطاب رضی اللہ عنہ نے مجھ سے امہات الاولاد کی بیع کے بارے میں مناظرہ کیا، میں نے کہا: فروخت کی جائے گی، اور وہ فرماتے تھے: فروخت نہ کی جائے گی، ہمیشہ سیدنا عمر رضی اللہ عنہ مجھ سے مراجعت فرماتے رہے یہاں تک کہ میں نے ان کی بات مان لی، انہوں نے اپنی زندگی میں ایسا ہی فیصلہ فرمایا۔ جب میں خلیفہ بنا تو میرا خیال تھا کہ ان کو فروخت کیا جائے، محمد بن سیرین رحمہ اللہ سیدنا عبیدہ رحمہ اللہ سے نقل فرماتے ہیں کہ میں نے سیدنا علی رضی اللہ عنہ سے کہا: آپ کی اجتماعی سوچ مجھے آپ کی اکیلے کی رائے سے زیادہ محبوب ہے۔

زید بن وہب کہتے ہیں کہ سیدنا عمر رضی اللہ عنہ نے امہات الاولاد کو فروخت کیا، بعد میں رجوع کر لیا۔

سعید بن مسیب رحمہ اللہ فرماتے ہیں کہ سیدنا عمر رضی اللہ عنہ نے حکم دیا کہ امہات الاولاد کی ان کے بیٹوں کے مال (حصے) میں عدل والی قیمت لگائی جائے پھر آزاد کردی جائیں، یہ ان کی خلافت کی ابتدا میں تھا، پھر ایک قریشی مرد فوت ہوگیا، اس کی ام ولد سے ایک بیٹا تھا، سیدنا عمر رضی اللہ عنہ اس بچے کو پسند کرتے تھے، یہ بچہ اپنے باپ کی وفات کے چند راتوں بعد سیدنا عمر رضی اللہ عنہ کے پاس سے مسجد میں گزرا۔ سیدنا عمر رضی اللہ عنہ نے پوچھا: ”اے بھتیجے! تو نے اپنی والدہ کے بارے میں کیا کیا؟“ وہ کہنے لگا: ”اے امیر المؤمنین! جب میرے بھائیوں نے مجھے اختیار دیا کہ وہ میری والدہ کو لونڈی رکھیں یا مجھے میرے والد کی وراثت سے نکال دیں، تو میرے والد کی میراث سے نکلنا مجھ پر اس سے زیادہ آسان تھا کہ میری والدہ کو لونڈی بنایا جائے۔“ سیدنا عمر رضی اللہ عنہ نے فرمایا: ”کیا میں نے اس بارے میں عدل کی قیمت مقرر کرنے کا حکم نہیں دیا تھا؟ میں جو بھی رائے قائم کروں یا جو بھی حکم دوں تم اس میں باتیں بناتے ہو؟“ پھر سیدنا عمر رضی اللہ عنہ منبر پر تشریف فرما ہوئے، لوگ ان کے پاس جمع ہوئے، جب وہ ان کی جماعت (کی تعداد) سے مطمئن ہو گئے تو فرمانے لگے: ”امہات الاولاد کے بارے میں تم میرے حکم کو جانتے ہو، پھر مجھے دوسرا خیال آیا، جس کے پاس ام ولد ہو وہ اپنی زندگی تک اس کا مالک ہے، جب فوت ہوجائے تو وہ آزاد ہے۔“

ابن شہاب کہتے ہیں کہ میں دمشق آیا تو عبد الملک ان دنوں اپنے کام میں مصروف تھے۔ میں ایک مجلس میں بیٹھ گیا جس کے لوگوں کو میں نہیں جانتا تھا۔ ایک آدمی آیا تو لوگوں نے اس کے لیے جگہ کشادہ کر دی۔ اس نے کہا: تمہارا اس بات کے بارے میں کیا خیال ہے جو امیر المومنین نے ابھی ذکر کی، جو مدینہ منورہ کی طرف سے «أُمَّهَاتُ الْأَوْلَادِ» (امہات الاولاد) کے بارے میں ان کے پاس آئی کہ انہیں غلام رکھا جائے یا آزاد کیا جائے؟ میں نے کہا: سعید بن مسیب رحمہ اللہ نے ذکر کیا کہ قریش کا ایک آدمی تھا جس کی عقل اور زبان پسند کی جاتی تھی۔ پھر اس کا باپ فوت ہو گیا اور مال چھوڑ گیا، اور اس کی والدہ «أُمُّ وَلَدٍ» (ام ولد) تھی۔ انہوں نے اس کی والدہ کی قیمت لگائی اور اس کی والدہ کے بارے میں اس پر بولی بڑھاتے رہے یہاں تک کہ اسے اس کی وراثت سے نکال دیا۔ وہ سیدنا عمر رضی اللہ عنہ کے پاس سے گزرا تو انہوں نے اسے بلایا اور پوچھا کہ اسے اپنے باپ کی وراثت میں سے کیا ملا؟ اس نے کہا: میں اپنے باپ کی وراثت میں سے (صرف) اپنی والدہ کو لے کر نکلا ہوں۔ فرمایا: اللہ کی قسم! میں اس بارے میں ضرور ایسی بات کہوں گا جس کے ذریعے لوگوں کو اس سے بچاؤں گا۔ پھر کھڑے ہوئے اور لوگوں کو خطبہ دیا، پھر فرمایا: اے لوگو! جو بھی آزاد آدمی ایسی «أُمُّ وَلَدٍ» (ام ولد) چھوڑ جائے جس نے اس سے بچہ جنا ہو تو وہ آزاد ہے۔ (ابن شہاب) کہتے ہیں: پھر اس (آدمی) نے میرا ہاتھ پکڑا، تو وہ قبیصہ بن ذویب تھے، یہاں تک کہ مجھے عبد الملک بن مروان کے پاس لے گئے۔ عبد الملک نے قبیصہ سے ذکر کیا تھا کہ یہ (روایت) سعید بن مسیب کی ہے، لیکن انہیں اس کا یقین نہ تھا۔ چنانچہ مجھے ان کے پاس لے جایا گیا اور (قبیصہ نے) انہیں یہ حدیث بتائی جو میں نے انہیں بتائی تھی۔ انہوں نے ابتدا میں مجھ سے میرا نسب پوچھا، جب میں اپنے باپ کے نام پر پہنچا تو کہنے لگے: تمہارا باپ تو فتنے میں شور برپا کرنے والا تھا۔ سعید کی وہ کون سی حدیث ہے جو قبیصہ نے مجھے تمہارے حوالے سے بتائی ہے؟ تو میں نے انہیں بھی وہی بتایا جو قبیصہ کو بتایا تھا۔ انہوں نے اس کا حکم دیا تو اسے نافذ کر دیا گیا، اور کہنے لگے: جو آدمی تم جیسا (بیٹا) چھوڑ جائے وہ مرا نہیں۔

سعید بن مسیب رحمہ اللہ فرماتے ہیں کہ رسول اللہ ﷺ نے حکم دیا کہ: ”امہات الاولاد کو آزاد کر دیا جائے، ان کو ثلث میں نہ رکھا جائے اور قرض میں فروخت نہ کیا جائے۔“
جعفر کہتے ہیں: اس حدیث کو ان (عبدالرحمن بن زیاد) کے علاوہ کسی نے روایت نہیں کیا۔
(ب) سعید بن مسیب رحمہ اللہ امہات الاولاد کے بارے میں فرماتے ہیں کہ لوگوں نے کہا کہ سیدنا عمر رضی اللہ عنہ کا پہلا حکم امہات الاولاد کے بارے میں تھا کہ آزاد کی جائیں، لیکن ایسا نہ تھا۔ سب سے پہلے تو نبی ﷺ نے ان کو آزاد کیا، ثلث میں ان کو نہ رکھا اور قرض میں فروخت بھی نہ کیا۔

سعید بن مسیب رحمہ اللہ فرماتے ہیں کہ سیدنا عمر رضی اللہ عنہ نے امہات الاولاد کو آزاد کیا۔ فرماتے ہیں: ”رسول اللہ ﷺ نے بھی آزاد کیا تھا۔“

سیدنا عبداللہ بن بریدہ رحمہ اللہ اپنے والد رضی اللہ عنہ سے نقل فرماتے ہیں کہ میں سیدنا عمر بن خطاب رضی اللہ عنہ کے پاس بیٹھا ہوا تھا، اچانک انہوں نے ایک چیخ سنی، کہنے لگے: اے یرفئا! دیکھو یہ آواز کیسی ہے؟ وہ دیکھ کر آئے اور کہنے لگے کہ قریش کی ایک لڑکی ہے جس کی والدہ کو فروخت کیا جا رہا ہے۔ سیدنا عمر رضی اللہ عنہ نے فرمایا: بلاؤ، یا فرمایا: مہاجرین و انصار کو بلاؤ، تھوڑی دیر میں گھر اور حجرہ بھر گیا، تو سیدنا عمر رضی اللہ عنہ نے اللہ کی حمد و ثنا بیان کی، پھر فرمایا: کیا تم جانتے ہو کہ قطع رحمی بھی ان چیزوں میں سے ہے جو محمد ﷺ لے کر آئے؟ انہوں نے کہا: نہیں۔ فرمایا: حالانکہ وہ تمہارے معاشرے میں عام ہو چکی ہے۔ پھر یہ آیت تلاوت کی: ﴿فَهَلْ عَسَيْتُمْ إِنْ تَوَلَّيْتُمْ أَنْ تُفْسِدُوا فِي الْأَرْضِ وَتُقَطِّعُوا أَرْحَامَكُمْ﴾ [سورة محمد: 22] ”عنقریب اگر تم پھر گئے کہ تم زمین میں فساد کرو اور اپنی رشتہ داریوں کو کاٹو۔“
پھر فرمایا: اس سے بڑی قطع رحمی کیا ہے کہ تم میں سے کسی کی ماں کو فروخت کیا جائے، حالانکہ اللہ نے تمہارے اوپر وسعت کی ہے، لوگوں نے کہا: جو چاہو فیصلہ کرو، تو انہوں نے علاقوں میں خط لکھوا دیے کہ آزاد آدمی کی ماں کو فروخت نہ کیا جائے۔ یہ قطع رحمی ہے اور جائز نہیں ہے۔

عبداللہ بن سعید رحمہ اللہ اپنے دادا سے نقل فرماتے ہیں کہ انہوں نے سیدنا عمر بن خطاب رضی اللہ عنہ کو رسول اللہ ﷺ کے منبر پر فرماتے سنا: ”اے مسلمانوں کی جماعت! اللہ نے عجمیوں کے علاقوں سے ان کی عورتیں اور اولادیں تمہیں مال فے کے طور پر دی ہیں، جو رسول اللہ ﷺ اور سیدنا ابوبکر رضی اللہ عنہ کو نہیں دی تھیں۔ میں جانتا ہوں کہ لوگ ان عورتوں سے مجامعت کریں گے، تو جس مرد کے ہاں عجمی عورتوں میں سے کوئی عورت بچہ جنے تو تم «أُمَّهَاتِ الْأَوْلَادِ» ”امہات الاولاد“ کو فروخت نہ کرو، کیونکہ اگر تم نے ایسا کیا تو قریب ہے کہ آدمی اپنی محرم سے مجامعت کر بیٹھے اور اسے شعور بھی نہ ہو۔“

محمد بن زیاد رحمہ اللہ فرماتے ہیں کہ میری دادی عثمان بن مظعون رضی اللہ عنہ کی امِ ولد تھیں، تو عثمان بن مظعون رضی اللہ عنہ کی وفات کے بعد ان کے بیٹے نے انہیں فروخت کرنا چاہا۔ وہ سیدہ عائشہ رضی اللہ عنہا کے پاس آئیں کہ عثمان بن مظعون کا بیٹا مجھے فروخت کرنا چاہتا ہے حالانکہ اس کے باپ کی اولاد مجھ سے ہے، اگر آپ ان سے بات کریں تو وہ مجھے درست جگہ رکھیں، تو سیدہ عائشہ رضی اللہ عنہا نے فرمایا: ”کیا تو نے اس کے باپ کی اولاد کو جنم دیا ہے؟“ کہتی ہیں: ہاں۔ کہنے لگی: ”آپ امیر المؤمنین سیدنا عمر رضی اللہ عنہ کے پاس جاؤ وہ تمہیں آزاد کر دیں گے۔“ وہ سیدنا عمر رضی اللہ عنہ کے پاس آئیں اور خبر دی کہ عثمان کی اولاد مجھ سے ہے اور اس کا بیٹا مجھے فروخت کرنا چاہتا ہے، تو سیدنا عمر رضی اللہ عنہ نے عثمان بن مظعون کے بیٹے کو پیغام دیا: ”کیا آپ کا یہی ارادہ ہے؟“ اس نے کہا: ہاں۔ سیدنا عمر رضی اللہ عنہ نے فرمایا: ”تمہارے لیے یہ جائز نہیں، یہ آزاد ہے“، میری دادی نے پوچھا: ”مجھے کس نے آزاد کیا؟“ فرمایا: ”تیری اولاد نے جو عثمان سے ہے“، کہنے لگی: اس نے اپنے باپ کی وفات کے بعد مجھے یہ زخم لگائے ہیں، تو سیدنا عمر رضی اللہ عنہ نے فرمایا: ”اس کا تاوان دو جو آپ نے اس کے ساتھ سلوک کیا ہے۔“

قتادہ رحمہ اللہ بیان کرتے ہیں کہ سیدنا عمر بن خطاب رضی اللہ عنہ اور عمر بن عبدالعزیز رحمہ اللہ کے درمیان جتنے خلیفہ تھے، وہ امہات الاولاد کو آزاد کر دیتے تھے۔

سلامہ بنت معقل رضی اللہ عنہا فرماتی ہیں کہ میں حباب بن عمرو رضی اللہ عنہ کی لونڈی تھی، وہ فوت ہو گئے، ان کا ایک بچہ بھی تھا۔ ان کی بیوی نے کہا: اس کے قرض میں تجھے فروخت کیا جائے گا۔ میں نے رسول اللہ ﷺ کے سامنے اس کا تذکرہ کیا تو رسول اللہ ﷺ نے فرمایا: ”حباب بن عمرو کے ترکہ کا وارث کون ہے؟“ انھوں نے کہا: اس کا بھائی ابوالیسر کعب بن عمرو رضی اللہ عنہ، تو رسول اللہ ﷺ نے اس کو بلایا اور فرمایا: ”اس کو آزاد کر دو، فروخت نہ کرنا۔ جب تم غلام کے بارے میں سنو تو میرے پاس لاؤ۔ میں تمہیں معاوضہ دوں گا۔“ انھوں نے ایسا ہی کیا۔ انھوں نے رسول اللہ ﷺ کی وفات کے بعد اختلاف کیا۔ کچھ کہتے ہیں کہ ام ولد لونڈی ہے، اگر ایسا نہ ہوتا تو رسول اللہ ﷺ انہیں اس کا معاوضہ نہ دیتے۔ بعض نے کہا: یہ آزاد ہے کیونکہ رسول اللہ ﷺ نے اس کو آزاد کر دیا تھا۔

بسر بن سعید رحمہ اللہ، خوات بن جبیر رضی اللہ عنہ سے نقل فرماتے ہیں کہ ایک انصاری نے وصیت کی، ان کی ایک ام ولد اور ایک آزاد عورت تھی۔ آزاد عورت اور ام ولد کے درمیان کچھ معاملہ تھا تو آزاد عورت نے کہا: اے کمینی! تجھے فروخت کیا جائے گا، تو خوات رضی اللہ عنہ رسول اللہ ﷺ کے پاس آئے۔ رسول اللہ ﷺ نے فرمایا: ”اسے فروخت نہیں کیا جائے گا“ اور آپ ﷺ نے اس کی آزادی کا حکم دے دیا۔

بسر بن سعید، خوات بن جبیر رضی اللہ عنہ سے نقل فرماتے ہیں کہ ایک آدمی نے انہیں وصیت کی۔

سابقہ حدیث ہی کی ایک اور سند ہے۔

عکرمہ رحمہ اللہ ابن عباس رضی اللہ عنہما سے نقل فرماتے ہیں کہ نبی ﷺ نے فرمایا: ”جس مرد کی ام ولد ہو وہ اس کی موت کے بعد آزاد ہے۔“
حسین بن عبداللہ بن عبیداللہ بن عباس ہاشمی کو اکثر محدثین نے ضعیف قرار دیا ہے۔

عکرمہ ابن عباس رضی اللہ عنہما سے نقل فرماتے ہیں کہ رسول اللہ ﷺ نے فرمایا: ”جب ام ابراہیم نے بچے کو جنم دیا تو اس کے بچے نے اس کو آزاد کر دیا ہے۔“
ابوبکر بن ابی سبرہ ضعیف ہے، اس سے دلیل نہیں لی جاتی، البتہ یہ روایت حسین سے دوسروں کے واسطے سے بھی انہی الفاظ کے ساتھ مروی ہے۔

عکرمہ سیدنا ابن عباس رضی اللہ عنہما سے نقل فرماتے ہیں کہ جب امِ ابراہیم نے نبی ﷺ کے بیٹے کو جنم دیا تو رسول اللہ ﷺ نے فرمایا: ”بچے نے اس کو آزاد کر دیا ہے۔“

عکرمہ، سیدنا ابن عباس رضی اللہ عنہما سے نقل فرماتے ہیں کہ جب ماریہ رضی اللہ عنہا نے جنم دیا تو رسول اللہ ﷺ نے فرمایا: ”اس کے بچے نے اس کو آزاد کر دیا ہے۔“
علی (دارقطنی) کہتے ہیں: ابن ابی حسین کی حدیث کو بیان کرنے میں زیاد بن ایوب منفرد ہیں، اور زیاد ثقہ ہیں، اور عکرمہ کی حدیث میں ایک عجیب علت ہے، اگرچہ ان تک سند صحیح ہے۔

عکرمہ رحمہ اللہ سیدنا عمر رضی اللہ عنہ سے نقل فرماتے ہیں کہ ام ولد کو اس کا بچہ آزاد کروا دیتا ہے، اگرچہ وہ مردہ ہی پیدا ہو۔

سیدنا ابن عباس رضی اللہ عنہما فرماتے ہیں کہ سیدنا عمر بن خطاب رضی اللہ عنہ نے فرمایا: جب ام ولد اپنے آقا کی اولاد کو جنم دے تو وہ آزاد ہو جاتی ہے، اگرچہ بچہ مردہ ہی پیدا ہو۔

حکم بن ابان رحمہ اللہ فرماتے ہیں کہ حضرت عکرمہ رحمہ اللہ سے امہات الاولاد کے بارے میں پوچھا گیا تو انہوں نے فرمایا: وہ آزاد ہیں، انہوں نے کہا: آپ کیوں یہ بات کہتے ہیں؟ فرمایا: قرآن کی وجہ سے۔ انہوں نے کہا: قرآن میں کیا ہے؟ انہوں نے فرمایا: ﴿يَا أَيُّهَا الَّذِينَ آمَنُوا أَطِيعُوا اللَّهَ وَأَطِيعُوا الرَّسُولَ وَأُولِي الْأَمْرِ مِنْكُمْ﴾ [سورة النساء: 59] اللہ اور رسول کی اطاعت کرو اور حکمرانوں کی۔ سیدنا عمر رضی اللہ عنہ بھی اولوالامر میں سے تھے۔ فرماتے ہیں: وہ آزاد ہوگی اگرچہ بچہ مردہ بھی ہو۔
(ب) سیدنا ابن عباس رضی اللہ عنہما نبی کریم ﷺ سے نقل فرماتے ہیں کہ: ”ام الولد آزاد ہے اگرچہ بچہ مردہ ہی کیوں نہ ہو۔“

عبیداللہ بن ابی جعفر رسول اللہ ﷺ سے نقل فرماتے ہیں کہ رسول اللہ ﷺ نے امِ ابراہیم سے فرمایا: ”تجھے تیرے بچے نے آزاد کر دیا۔“
یہ روایت منقطع ہے۔
سیدہ عائشہ رضی اللہ عنہا فرماتی ہیں کہ نبی ﷺ فوت ہوئے تو کوئی درہم و دینار یا غلام و لونڈی نہ چھوڑی۔

ابو سعید خدری رضی اللہ عنہ فرماتے ہیں کہ وہ نبی ﷺ کے پاس تشریف فرما تھے، ایک انصاری آیا اور کہا: اے اللہ کے رسول! ہماری لونڈیاں ہیں، ہم قیمت کو پسند کرتے ہیں، کیا ان سے عزل کر لیا کریں؟ آپ ﷺ نے پوچھا: ”تم یہ کیوں کرتے ہو؟“ پھر فرمایا: ”تم پر لازم نہیں، جس جان نے پیدا ہونا ہے وہ ہو کر ہی رہے گی تم کچھ بھی کرو۔“

ابن محیریز، سیدنا ابو سعید خدری رضی اللہ عنہ، سیدنا ابو صرمہ رضی اللہ عنہ سے نقل فرماتے ہیں کہ انہیں غزوہ بنو مصطلق میں لونڈیاں ملیں، ہم میں سے بعض انہیں اپنی بیویاں بنانا چاہتے تھے اور بعض فروخت کرنا چاہتے تھے، وہ ایک دوسرے سے کہنے لگے کہ یہ جائز نہیں ہے، رسول اللہ ﷺ سے اس بارے میں پوچھا گیا تو آپ ﷺ نے فرمایا: ”تم عزل نہ کرو، جو اللہ نے لکھ چھوڑا ہے کہ جس نے قیامت تک پیدا ہونا ہے وہ ہو کر رہے گا۔“