السنن الكبرى للبيهقي

سلیمان بن بریدہ رحمہ اللہ اپنے والد رضی اللہ عنہ سے نقل فرماتے ہیں کہ ماعز بن مالک رضی اللہ عنہ نبی ﷺ کے پاس آئے اور عرض کی: ”اے اللہ کے رسول! مجھے پاک کر دیں،“ آپ ﷺ نے فرمایا: ”تجھ پر افسوس! لوٹ جا اور اللہ سے توبہ و استغفار کر۔“ وہ تھوڑی دور جا کر پھر واپس پلٹ آئے اور عرض کی: ”اے اللہ کے رسول! مجھے پاک کر دیں،“ آپ ﷺ نے فرمایا: ”تجھ پر افسوس! لوٹ جا اور اللہ سے توبہ و استغفار کر۔“ وہ تھوڑی دور جا کر پھر واپس پلٹ آئے اور کہنے لگے: ”اے اللہ کے رسول! مجھے پاک کر دیں۔“ آپ ﷺ نے پھر اسی طرح فرمایا، جب وہ چوتھی مرتبہ آئے تو رسول اللہ ﷺ نے پوچھا: ”تجھے کس چیز سے پاک کروں؟“ انہوں نے عرض کی: ”زنا سے۔“ آپ ﷺ نے پوچھا: ”کیا یہ مجنون تو نہیں؟“ آپ ﷺ کو بتایا گیا کہ وہ مجنون نہیں ہے۔ آپ ﷺ نے پوچھا: ”کیا اس نے شراب پی ہے؟“ ایک آدمی کھڑا ہوا اور اس نے ماعز رضی اللہ عنہ کے منہ کی بو سونگھنے کی کوشش کی لیکن کچھ محسوس نہ کیا۔ آپ ﷺ نے پوچھا: ”کیا تو شادی شدہ ہے؟“ انہوں نے عرض کی: ”جی ہاں، اے اللہ کے رسول!۔“ پھر آپ ﷺ کے حکم سے انہیں رجم کر دیا گیا۔ اب لوگوں کے دو گروہ بن گئے۔ کچھ یہ کہہ رہے تھے کہ ماعز رضی اللہ عنہ اپنے برے عمل کی وجہ سے ہلاک ہو گئے اور ان کی غلطی نے انہیں گھیر لیا ہے، جبکہ کچھ لوگ کہہ رہے تھے: ”ماعز رضی اللہ عنہ کی توبہ سے افضل کسی کی توبہ نہیں ہو سکتی، کیونکہ انہوں نے خود آکر اپنا ہاتھ رسول اللہ ﷺ کے ہاتھ میں دے دیا اور عرض کی کہ مجھے پتھروں سے رجم کر دیا جائے۔“ راوی کہتے ہیں کہ دو یا تین دن گزرے تو نبی ﷺ تشریف لائے جبکہ صحابہ کرام رضی اللہ عنہم بیٹھے ہوئے تھے، آپ ﷺ نے سلام کیا اور بیٹھ گئے، پھر آپ ﷺ نے فرمایا: ”ماعز کے لیے استغفار کرو۔“ صحابہ کرام رضی اللہ عنہم نے عرض کی: ”کیا اللہ نے ماعز (رضی اللہ عنہ) کو معاف کر دیا ہے؟“ نبی ﷺ نے فرمایا: ”انہوں نے ایسی توبہ کی ہے کہ اگر پوری امت کے درمیان تقسیم کر دی جائے تو ان سب کے لیے کافی ہو جائے۔“ پھر قبیلہ ازد کی ایک عورت لائی گئی، اس نے عرض کی: ”اے اللہ کے رسول! مجھے پاک کر دیں،“ آپ ﷺ نے فرمایا: ”تجھ پر افسوس! لوٹ جا اور اللہ سے توبہ و استغفار کر۔“ وہ کہنے لگی: ”کیا آپ مجھے اس طرح لوٹا رہے ہیں جس طرح ماعز (رضی اللہ عنہ) کو لوٹاتے رہے؟“ آپ ﷺ نے پوچھا: ”تیرا کیا معاملہ ہے؟“ اس نے عرض کی: ”میں زنا کی وجہ سے حاملہ ہوں۔“ آپ ﷺ نے پوچھا: ”کیا تو شادی شدہ ہے؟“ اس نے عرض کی: ”جی ہاں۔“ آپ ﷺ نے فرمایا: ”ہم تجھے اس وقت تک رجم نہیں کریں گے جب تک تیرا وضع حمل (بچے کی پیدائش) نہ ہو جائے۔“ انصار کے ایک آدمی نے اس کی کفالت کا ذمہ لیا، جب اس نے بچہ جن دیا تو وہ نبی ﷺ کی خدمت میں حاضر ہوا۔ اس آدمی (کفیل) نے عرض کی: ”اس غامدیہ عورت نے بچہ جن دیا ہے۔“ آپ ﷺ نے فرمایا: ”ہم اسے اس وقت تک رجم نہیں کریں گے جب تک اس کا بچہ چھوٹا ہے اور اسے دودھ پلانے والا کوئی میسر نہ ہو۔“ انصار کا ایک آدمی کھڑا ہوا اور عرض کی: ”اے اللہ کے نبی! اس کی رضاعت کا میں ذمہ دار ہوں۔“ پھر آپ ﷺ کے حکم سے اسے رجم کر دیا گیا۔

حضرت ابوہریرہ اور زید بن خالد جہنی رضی اللہ عنہما فرماتے ہیں، انہوں نے خبر دی دو آدمیوں کے قصے کی، وہ دونوں اپنا جھگڑا رسول اللہ ﷺ کے پاس لے کر آئے۔ آپ ﷺ نے انیس سلمی کو حکم دیا کہ: ”وہ دوسری عورت کے پاس جائے، اگر وہ اعتراف کرلے تو اس کو رجم کر دے۔“ پس اس نے اعتراف کر لیا تو اسے رجم کر دیا گیا۔

سیدنا انس رضی اللہ عنہ سے روایت ہے کہ ایک لونڈی کو اس حالت میں پایا گیا کہ اس کا سر دو پتھروں کے درمیان رکھ کر کچلا گیا تھا، اسے نبی ﷺ کے پاس لایا گیا، اس سے پوچھا گیا کہ تیرے ساتھ کس نے یہ کیا، فلاں نے؟ فلاں نے؟ یہاں تک کہ اس یہودی کا نام لیا گیا، اس (لونڈی) نے اپنے سر سے اشارہ کیا، اس یہودی کو بلایا گیا، اس نے اعتراف کر لیا، نبی ﷺ نے حکم دیا کہ اس کا سر بھی دو پتھروں میں رکھ کر کچل دیا جائے۔

ابراہیم رحمہ اللہ سے روایت ہے کہ ایک آدمی نے شریح رحمہ اللہ کے پاس اقرار کیا، پھر انکار کرنے لگا، شریح رحمہ اللہ نے اسے کہا: تیری خالہ کی بہن کے بیٹے نے تیرے بارے میں گواہی دی ہے۔