صحیح ابن حبان

سیدنا جابر رضی اللہ عنہ بیان کرتے ہیں: فتح مکہ کے دن سیدنا ابوقحافہ کو (نبی اکرم صلی اللہ علیہ وسلم کی خدمت میں) لایا گیا۔ ان کے سر اور داڑھی (کے بال) ثغامہ پھول کی طرح سفید تھے تو نبی اکرم صلی اللہ علیہ وسلم نے ارشاد فرمایا: تم ان کے سر (کے بالوں کی رنگت) تبدیل کرو البتہ سیاہ رنگ استعمال کرنے سے بچنا۔

سیدنا انس بن مالک رضی اللہ عنہ بیان کرتے ہیں: فتح مکہ کے دن سیدنا ابوبکر رضی اللہ عنہ اور سیدنا ابوقحافہ رضی اللہ عنہ کو ساتھ لے کر آئے تو نبی اکرم صلی اللہ علیہ وسلم نے سیدنا ابوبکر سے فرمایا: اگر تم ان بزرگ کو گھر میں رہنے دیتے اور میں خود ان کے پاس چلا جاتا (تو یہ ٹھیک تھا) (راوی کہتے ہیں:) نبی اکرم صلی اللہ علیہ وسلم نے سیدنا ابوبکر رضی اللہ عنہ کی عزت افزائی کے لئے یہ بات ارشاد فرمائی۔ راوی بیان کرتے ہیں: سیدنا ابوقحافہ رضی اللہ عنہ نے اسلام قبول کر لیا ان کے سر اور داڑھی کے بال ثغامہ پھول کی طرح سفید تھے۔ نبی اکرم صلی اللہ علیہ وسلم نے ارشاد فرمایا: ان کی رنگت تبدیل کر دو البتہ سیاہ رنگ استعمال کرنے سے بچنا۔
(امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ” ان کی رنگت تبدیل کر دو۔ “ یہ لفظی طور پر امر کا صیغہ ہے لیکن اس کی صفت کے بارے میں جو حکم ہے اس میں اختیار دیا گیا ہے۔ آدمی جس چیز کے ذریعے چاہے تبدیل کر دے پھر اس میں سے سیاہ رنگ کا استثناء کر لیا گیا اور نبی اکرم صلی اللہ علیہ وسلم نے اس سے منع کر دیا تو باقی تمام چیزیں اپنی اصل حالت پر برقرار رہیں گی۔