صحیح ابن حبان

سیدہ عائشہ صدیقہ رضی اللہ عنہا بیان کرتی ہیں: جب نبی اکرم صلی اللہ علیہ وسلم مدینہ منورہ تشریف لائے، تو سیدنا ابوبکر رضی اللہ عنہ اور سیدنا بلال رضی اللہ عنہ کو بخار ہو گیا۔ سیدہ عائشہ رضی اللہ عنہا کہتی ہیں میں ان کے پاس آئی۔ میں نے پوچھا: ابا جان آپ کا کیا حال ہے؟ اے بلال آپ کا کیا حال ہے؟ سیدہ عائشہ رضی اللہ عنہا بیان کرتی ہیں: جب سیدنا ابوبکر رضی اللہ عنہ کو بخار ہوا، تو وہ یہ شعر پڑھتے تھے۔ ” ہر شخص اپنے گھر والوں کے پاس صبح کرتا ہے، حالانکہ موت اس کے جوتے کے تسمے سے بھی زیادہ قریب ہوتی ہے ۔“ جب سیدنا بلال رضی اللہ عنہ، اللہ تعالیٰ ان پر رحم کرے، ان کی طبیعت کچھ بہت ہوتی تھی، تو وہ بلند آواز میں یہ پڑھتے تھے۔ ” ہائے افسوس کیا میں اس وادی میں کبھی رات بسر کر سکوں گا کہ میرے ارد گرد اذخر اور جلیل (مکہ کی مخصوص گھاس) ہو گی کیا میں کبھی کسی دن مجنہ کے پانی تک پہنچ پاؤں گا کیا شامہ اور طفیل (نامی پہاڑ) میرے سامنے آئیں گے ۔“ سیدہ عائشہ رضی اللہ عنہا بیان کرتی ہیں: میں نبی اکرم صلی اللہ علیہ وسلم کی خدمت میں حاضر ہوئی میں نے آپ کو اس بارے میں بتایا، تو آپ نے دعا کی: ” اے اللہ! تو مدینہ کو بھی ہمارے نزدیک اسی طرح محبوب کر دے جس طرح ہمیں مکہ سے محبت ہے بلکہ (مدینہ کو) زیادہ محبوب کر دے اور اسے ہمارے لیے صحت افزاء بنا دے اور ہمارے لیے اس کے صاع اور اس کے مد میں برکت دیدے اور یہاں کے بخار کو یہاں سے منتقل کر دے اسے حجفہ منتقل کر دے ۔“ (امام ابن حبان رحمہ اللہ فرماتے ہیں:): نبی اکرم صلی اللہ علیہ وسلم کے، بخار کے حجفہ کی طرف منتقل ہونے، کی دعا کرنے کی علت یہ ہے: ان دنوں حجفہ یہودیوں کی بستی تھی۔ وہاں کوئی مسلمان نہیں تھا۔ اس لیے نبی اکرم صلی اللہ علیہ وسلم نے یہ بات ارشاد فرمائی ” کہ اس کے بخار کو حجفہ کی طرف منتقل کر دے۔ “