صحیح ابن حبان

سیدنا رافع بن خدیج رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ” پچھنے لگانے والے اور لگوانے والے کا روزہ ٹوٹ جاتا ہے ۔“ (امام ابن حبان رحمہ اللہ فرماتے ہیں:): ان دونوں روایات نے ایک عالم کو غلط فہمی کا شکار کیا کہ یہ دونوں متضاد ہیں، حالانکہ ایسا نہیں ہے کیونکہ جب نبی اکرم صلی اللہ علیہ وسلم نے پچھنے لگوائے تھے۔ اس وقت آپ روزے کی حالت میں تھے احرام باندھے ہوئے تھے۔ اور کسی بھی مستند روایت میں نبی اکرم صلی اللہ علیہ وسلم کے بارے میں یہ بات نقل نہیں کی گئی ہے کہ آپ نے احرام کے علاوہ روزے کی حالت میں پچھنے لگوائے ہوں اور نبی اکرم صلی اللہ علیہ وسلم احرام اسی وقت باندھے ہوئے تھے جب آپ مسافر تھے مسافر شخص کے لیے روزے کو ختم کرنا مباح ہوتا ہے۔ خواہ وہ پچھنے لگوا کر کرے۔ خواہ وہ پانی کا گھونٹ پی کر کرے۔ اگر وہ چاہے، تو وہ دودھ کا گھونٹ پی کر یا کوئی اور چیز (کھا یا پی کر) روزے کو ختم کر سکتا ہے۔ نبی اکرم صلی اللہ علیہ وسلم کا یہ فرمان ” پچھنے لگانے والے اور لگوانے والے کا روزہ ٹوٹ گیا “ لفظی طور پر کسی فعل کے بارے میں اطلاع دینا ہے لیکن اس کے ذریعے مراد یہ ہے: اس فعل پر عمل کرنے سے منع کیا جائے۔