صحیح ابن حبان

سیدنا ابوعیاش زرقی رضی اللہ عنہ بیان کرتے ہیں: نبی اکرم صلی اللہ علیہ وسلم عسفان کے مقام پر موجود تھے، جبکہ مشرکین ضجنان کے مقام پر موجود تھے جب نبی اکرم صلی اللہ علیہ وسلم نے ظہر کی نماز ادا کی تو مشرکین نے آپ صلی اللہ علیہ وسلم کو رکوع اور سجدہ کرتے دیکھا تو انہوں نے آپس میں یہ مشورہ کیا، وہ آپ صلی اللہ علیہ وسلم پر حملہ کر دیں گے جب عصر کی نماز کا وقت ہوا، تو لوگوں نے آپ صلی اللہ علیہ وسلم کے پیچھے دو صفیں بنا لیں نبی اکرم صلی اللہ علیہ وسلم نے تکبیر کہی تو سب لوگوں نے بھی تکبیر کہی نبی اکرم صلی اللہ علیہ وسلم نے رکوع کیا، تو سب لوگوں نے رکوع کیا، پھر نبی اکرم صلی اللہ علیہ وسلم سجدے میں گئے، تو وہ صف سجدے میں گئی جو آپ صلی اللہ علیہ وسلم کے قریب کھڑی ہوئی تھی اور دوسری صف اپنے ہتھیار لے کر دشمن کی طرف رخ کر کے کھڑی رہی جب نبی اکرم صلی اللہ علیہ وسلم نے اپنا سر اٹھایا، تو دوسری صف نے بھی سجدہ کر لیا جب ان لوگوں نے اپنا سر اٹھا لیا تو نبی اکرم صلی اللہ علیہ وسلم نے رکوع کیا، تو ان سب لوگوں نے رکوع کیا نبی اکرم صلی اللہ علیہ وسلم نے سجدہ کیا، تو اس صف نے سجدہ کیا جو آپ صلی اللہ علیہ وسلم کے قریب کھڑی ہوئی تھی اور دوسری صف اپنے ہتھیار لے کر دشمن کی طرف رخ کر کے کھڑی رہی جب نبی اکرم صلی اللہ علیہ وسلم نے اپنا سر اٹھایا، تو دوسری صف نے بھی سجدہ کیا۔ (امام ابن حبان رحمہ اللہ فرماتے ہیں:) ابوعیاش زرقی نامی راوی کے نام کے بارے میں اختلاف پایا جاتا ہے۔ بعض حضرات نے یہ کہا: ہے کہ ان کا نام زید بن نعمان ہے اور بعض حضرات نے یہ کہا: ہے کہ زید بن صامت ہے۔ بعض نے یہ کہا: ہے عبید بن معاویہ بن صامت ہے جبکہ بعض نے یہ کہا: ہے عبید بن معاذ بن صامت ہے۔