صحیح ابن حبان

سیدنا عبداللہ بن عمرو رضی اللہ عنہ بیان کرتے ہیں: نبی اکرم صلی اللہ علیہ وسلم کے زمانہ اقدس میں سورج گرہن ہو گیا۔ نبی اکرم صلی اللہ علیہ وسلم نماز ادا کرنے کے لیے کھڑے ہوئے یوں محسوس ہوتا تھا جیسے آپ رکوع میں جائیں گے ہی نہیں پھر آپ رکوع میں چلے گئے، تو یوں محسوس ہوا، آپ سر کو اٹھائیں گے ہی نہیں پھر آپ نے سر کو اٹھایا اور گریہ وزاری شروع کی اور رونا شروع کیا آپ یہ فرما رہے تھے۔ ” اے میرے پروردگار کیا تم نے مجھ سے یہ وعدہ نہیں کیا تھا تو ان لوگوں کو اس وقت تک عذاب نہیں دے گا، جب تک میں ان کے درمیان موجود ہوں کیا تو نے مجھ سے یہ وعدہ نہیں کیا تھا، تو ان لوگوں کو اس وقت تک عذاب نہیں دے گا، جب تک ہم تجھ سے مغفرت طلب کرتے رہیں گے ۔“ جب نبی اکرم صلی اللہ علیہ وسلم نے نماز ادا کر لی، تو سورج روشن ہو گیا نبی اکرم صلی اللہ علیہ وسلم کھڑے ہو گئے آپ صلی اللہ علیہ وسلم نےاللہ تعالیٰ کی حمد و ثناء بیان کی اور یہ بات ارشاد فرمائی: ” بے شک سورج اور چانداللہ تعالیٰ کی دو نشانیاں ہیں جب یہ دونوں گرہن ہو جائیں، تو اللہ کے ذکر کی طرف جاؤ ۔“ پھر آپ صلی اللہ علیہ وسلم نے یہ ارشاد فرمایا: ” میرے سامنے جنت کو پیش کیا گیا یہاں تک کہ اگر میں چاہتا تو اس کا کوئی گچھا حاصل کر سکتا تھا اور میرے سامنے جہنم کو پیش کیا گیا یہاں تک کہ میں نے اس سے بچنے کی کوشش کی مجھے یہ اندیشہ ہوا، کہیں وہ تمہیں اپنی لپیٹ میں نہ لے، تو میں نے یہ کہنا شروع کیا، کیا تو نے مجھ سے یہ وعدہ نہیں کیا تھا، تو اس وقت تک عذاب نہیں دے گا، جب تک میں ان کے درمیان موجود ہوں اے میرے پروردگار! کیا تو نے مجھ سے یہ وعدہ نہیں کیا تھا، تو انہیں اس وقت تک عذاب نہیں دے گا، جب تک ہم تجھ سے مغفرت طلب کرتے رہیں گے۔ “ نبی اکرم صلی اللہ علیہ وسلم نے فرمایا: میں نے اس میں ایک سیاہ فام حمیری عورت کو دیکھا جوبلی کی مالک تھی اس نے اس بلی کو باندھ دیا تھا اور اسے کھانے کے لیے کچھ نہیں دیتی تھی اور پینے کے لیے کچھ نہیں دیتی تھی، اس نے اسے چھوڑا بھی نہیں تھا کہ وہ خود ہی کچھ کھا لیتی، تو میں نے اس عورت کو دیکھا، وہ جب بھی آتی تھی اس کے چہرے کو نوچ لیا جاتا تھا میں نے جہنم میں (دعدع قبیلے سے تعلق رکھنے والے) اس شخص کو بھی دیکھا جو اللہ کے رسول کے قربانی کے دو جانوروں کا نگران تھا اسے دو کناروں والی دو ڈنڈیوں کے ذریعے جہنم میں ڈالا جا رہا تھا میں نے لاٹھی والے شخص کو بھی دیکھا میں نے اسے جہنم میں دیکھا، وہ اپنی لاٹھی سے ٹیک لگائے ہوئے تھا۔