صحیح ابن حبان

سیدنا عبداللہ بن عباس رضی اللہ عنہما بیان کرتے ہیں: نبی اکرم صلی اللہ علیہ وسلم رات کے وقت جب تہجد کی نماز ادا کرنے کے لیے کھڑے ہوتے تھے، تو یہ پڑھتے تھے۔ ” اے اللہ! حمد تیرے ہی لیے مخصوص ہے، تو آسمانوں اور زمین میں موجود ہر چیز کا نور ہے حمد تیرے لیے مخصوص ہے، تو آسمانوں اور زمین میں موجود ہر چیز کو قائم رکھنے والا ہے۔ حمد تیرے لیے مخصوص ہے، تو آسمانوں اور زمین میں موجود ہر چیز کا بادشاہ ہے، حمد تیرے لیے مخصوص ہے، تو حق ہے تیری بارگاہ میں حاضری حق ہے تیرا وعدہ حق ہے جنت حق ہے، جہنم حق ہے، قیامت حق ہے، انبیاء حق ہیں، سیدنا محمد صلی اللہ علیہ وسلم حق ہیں، اے اللہ! میں تجھ پر ہی ایمان لایا اور تیرے ہی لیے اسلام قبول کیا تجھ پر ہی توکل کیا تیری طرف رجوع کیا تیری مدد سے میں جھگڑا کرتا ہوں تجھے ہی ثالث مقرر کرتا ہوں میں نے جو پہلے کیا جو بعد میں کروں گا، جو پوشیدہ طور پر کیا جو علانیہ طور پر کیا ان سب کی مغفرت کر دے تو ہی آگے کرنے والا ہے، تو ہی پیچھے کرنے والا ہے صرف توں ہی معبود ہے تیرے علاوہ اور کوئی معبود نہیں ہے ۔“ سفیان نامی راوی بیان کرتے ہیں: اس میں عبدالکریم نامی راوی نے یہ الفاظ زائد نقل کیے ہیں۔ ” تیرے علاوہ اور کوئی معبود نہیں ہےاللہ تعالیٰ کی مدد کے بغیر کچھ نہیں ہو سکتا ۔“ سفیان نامی راوی کہتے ہیں: میں نے یہ الفاظ عبدالکریم ابوامیہ کے سامنے بیان کیے، تو وہ بولے: تم یہ پڑھو۔ ” تو میرا معبود ہے صرف تو ہی معبود ہے تیرے علاوہ اور کوئی معبود نہیں ہے ۔“