صحیح ابن حبان

ابوقیس جو سیدنا عمرو بن العاص رضی اللہ عنہ کے غلام ہیں بیان کرتے ہیں: سیدنا عمرو بن العاص رضی اللہ عنہ بھی ایک مہم پر تھے۔ لوگوں کو اتنی شدید سردی کا سامنا کرنا پڑا کہ اس طرح کی سردی انہوں نے پہلے کبھی نہیں دیکھی تھی۔ سیدنا عمرو بن العاص صبح کی نماز کے لئے تشریف لائے اور فرمایا گزشتہ رات مجھے احتلام ہو گیا تھا، تو انہوں نے اپنی شرم گاہ کو دھویا اور نماز کے وضو کی طرح وضو کر کے لوگوں کو نماز پڑھا دی۔ جب وہ نبی اکرم صلی اللہ علیہ وسلم کی خدمت میں حاضر ہوئے، تو نبی اکرم صلی اللہ علیہ وسلم نے اپنے اصحاب سے دریافت کیا تم نے عمرو اور اس کے ساتھیوں کو کیسا پایا تو لوگوں نے ان کی تعریف کی اور یہ بات کہی۔ یا رسول اللہ انہوں نے جنابت کی حالت میں ہمیں نماز پڑھا دی تو نبی اکرم صلی اللہ علیہ وسلم نے سیدنا عمرو کو بلوایا اور ان سے دریافت کیا، تو سیدنا عمرو نے آپ کو بتایا اور جس سردی کا سامنا کرنا پڑا اس کے بارے میں بتایا: انہوں نے عرض کی: یا رسول اللہ!اللہ تعالیٰ نے یہ بات ارشاد فرمائی ہے: ” تم اپنے آپ کو قتل نہ کرو “ اگر میں غسل کر لیتا تو میں مر جاتا نبی اکرم صلی اللہ علیہ وسلم سیدنا عمرو کی اس بات پر ہنس پڑے۔