صحیح ابن حبان

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ” تم سے پہلے کے زمانے میں تین لوگ اپنے گھر کی طرف واپس جا رہے تھے راستے میں بارش شروع ہو گئی۔ وہ پہاڑ کی پناہ میں آ گئے ان پر ایک پتھر آ کر گر گیا۔ ان میں سے ایک نے دوسرے سے کہا: ہمارے قدموں کے نشانات ختم ہو گئے ہیں۔ اور پتھر آ کر گر گیا ہے۔ اب تمہاری اس جگہ کے بارے میںاللہ تعالیٰ کے علاوہ کسی کو کچھ پتہ نہیں ہے، تو تم اپنے سب سے زیادہ قابل اعتماد وسیلے کے ذریعےاللہ تعالیٰ سے دعا کرو۔ ان میں سے ایک شخص نے کہا: اے اللہ! تو یہ بات جانتا ہے، ایک عورت مجھے بہت پسند تھی میں نے اس کے قرب کا مطالبہ کیا لیکن اس نے میری بات نہیں مانی۔ پھر میں نے اسے معاوضہ دیا جب وہ میرے قریب آئی، تو میں نے اسے چھوڑ دیا اگر تو یہ بات جانتا ہے، میں نے تیری رحمت کی امید کرتے ہوئے اور تیرے خوف سے ڈرتے ہوئے ایسا کیا تھا، تو ہمیں کشادگی نصیب کر۔ نبی اکرم صلی اللہ علیہ وسلم فرماتے ہیں، تو ایک تہائی پہاڑ (یعنی پتھر) اپنی جگہ سے ہٹ گیا۔ دوسرے شخص نے کہا: اے اللہ! اگر تو یہ بات جانتا ہے، میرے ماں باپ تھے میں ان کے لئے ان کے برتن میں دودھ دوھ لیا کرتا تھا جب میں ان کے پاس آیا، تو وہ دونوں سوئے ہوئے تھے۔ میں کھڑا ہوا انتظار کرتا رہا یہاں تک کہ جب وہ بیدار ہوئے، تو انہوں نے اسے پی لیا اگر تو یہ بات جانتا ہے، میں نے ایسا تیری رحمت کی امید رکھتے ہوئے اور تیرے عذاب سے ڈرتے ہوئے کیا تھا، تو ہم سے اس مشکل صورتحال کو دور کر دے۔ تو (مزید) ایک تہائی پتھر ہٹ گیا۔ تیسرے شخص نے کہا: اے اللہ! تو یہ بات جانتا ہے، میں نے ایک دن ایک شخص کو مزدور رکھا تھا۔ اس نے نصف دن تک میرے لیے کام کیا میں نے اسے اس کا معاوضہ دیا تو اس نے اس پر ناراضگی کا اظہار کیا اور اسے وصول نہیں کیا، تو میں نے اس معاوضے کے ذریعے آگے کام شروع کر دیا یہاں تک کہ وہ بہت سا مال ہو گیا وہ شخص اپنا معاوضہ وصول کرنے کے لئے آیا، تو میں نے کہا: یہ ساری چیزیں تم لے لو اگر میں چاہتا، تو میں اس وقت اس کو صرف اس کا معاوضہ دے سکتا تھا اگر تو یہ بات جانتا ہے، میں نے تیری رحمت کی امید رکھتے ہوئے اور تیرے عذاب سے ڈرتے ہوئے ایسا کیا تھا، تو ہمیں کشادگی نصیب کر۔ نبی اکرم صلی اللہ علیہ وسلم فرماتے ہیں، تو وہ پتھر ہٹ گیا اور وہ لوگ چلتے ہوئے باہر آ گئے۔
(امام ابن حبان رحمہ اللہ فرماتے ہیں:) روایت کے یہ الفاظ ” تو میں نے اس پر زیادہ کئے ۔“ اس کا مطلب یہ ہے، میں نے اس کے لئے زیادہ کیا، کیونکہ عرب اپنے محاور ے میں لفظ ” علی “ کو ” لہ “ کے معنی میں استعمال کرتے ہیں۔ سعید بن ابوالحسن نے سیدنا ابوہریرہ رضی اللہ عنہ سے مدینہ منورہ میں احادیث کا سماع کیا ہے، کیونکہ ان کی نشو و نما وہیں ہوئی تھی، اور حسن ان سے احادیث کا سماع اس لئے نہیں کر سکے، کیونکہ وہ بچپن میں مدینہ منورہ سے چلے گئے تھے۔