صحیح ابن حبان

ابوسعید بن معلی بیان کرتے ہیں: میں مسجد میں نماز ادا کر رہا تھا نبی اکرم صلی اللہ علیہ وسلم نے مجھے آواز دی میں آپ کی طرف نہیں گیا (جب میں آپ کی خدمت میں حاضر ہوا)، تو میں نے عرض کی: یا رسول اللہ! میں نماز ادا کر رہا تھا، نبی اکرم صلی اللہ علیہ وسلم نے ارشاد فرمایا:اللہ تعالیٰ نے یہ ارشاد نہیں فرمایا ہے: ” جب اللہ اور اس کا رسول تم کو بلائیں، تو تم ان کی طرف جاؤ ۔“ پھر نبی اکرم صلی اللہ علیہ وسلم نے فرمایا: کیا میں تمہیں ایسی سورۃ کی تعلیم نہ دوں جو قرآن میں موجود سب سے عظیم سورت ہے؟ میں نے عرض کی: جی ہاں! نبی اکرم صلی اللہ علیہ وسلم نے فرمایا: الحمدلله رب العلمین یہی سبع مثانی ہے اور وہ قرآن ہے، جو مجھے دیا گیا ہے ۔“
(امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان ” یہ سب سے عظیم سورت ہے “ اس سے مراد اجر کے اعتبار سے (سب سے عظیم ہونا) ہے۔ ایسا نہیں ہے، قرآن کا ایک حصہ دوسرے سے افضل ہو۔ سیدنا ابوسعید بن معلی رضی اللہ عنہ کا نام رافع بن معلی بن لوذان بن حارثہ ہے۔ ان کا انتقال 74 ہجری میں ہوا۔