صحیح ابن حبان

سیدنا ابی بن کعب رضی اللہ عنہ فرماتے ہیں، نبی اکرم نے ارشاد فرمایا ہے: ”اللہ تعالیٰ فرماتا ہے، تورات میں اور انجیل میں ام القرآن (یعنی سورہ فاتحہ کی) مانند اور کوئی سورت نہیں ہے یہی سبع مثانی ہے یہ میرے اور میرے بندے کے درمیان تقسیم ہوئی ہیں اور میرا بندہ جو مانگتا ہے وہ اسے ملے گا ۔“ (امام ابن حبان رحمہ اللہ فرماتے ہیں:) روایت کے یہ الفاظ ” تورات اور انجیل میں ام القرآن (یعنی سورہ فاتحہ) کی مانند کوئی چیز نہیں ہے “ اس کا مطلب یہ ہے، تورات اور انجیل کی تلاوت کرنے والے کواللہ تعالیٰ اتنا اجر عطا نہیں کرتا۔ جتنا سورہ فاتحہ کی تلاوت کرنے والے کو عطا کرتا ہے۔ کیونکہاللہ تعالیٰ نے اپنے فضل کے تحت اس امت کو باقی تمام امتوں پر فضیلت عطا کی ہے اور اس (امت کو)اللہ تعالیٰ کے کلام کی تلاوت کرنے پر اس سے زیادہ فضیلت عطا کی ہے، جو دوسری (امتوں کو ان پر نازل ہونیوالے)اللہ تعالیٰ کے کلام کی تلاوت پر عطا کی تھی اور یہ اس امت پراللہ تعالیٰ کا فضل ہے اور دوسری امتوں کے لئے یہ اس کا عدل ہے۔