صحیح ابن حبان

سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم کی خدمت میں کھجوروں کا ایک تھال پیش کیا گیا، تو آپ نے یہ آیت پڑھی: ” پاکیزہ کلمے کی مثال پاکیزہ درخت کی مانند ہے، جس کی بنیاد مضبوط ہوتی ہے اور اس کی شاخیں بلند ہوتی ہیں۔ وہ ہر موسم میں اپنے پروردگار کے حکم کے مطابق پھل دیتا ہے ۔“ نبی اکرم صلی اللہ علیہ وسلم نے فرمایا: اس سے مراد کھجور کا درخت ہے (پھر آپ نے یہ آیت پڑھی) ” بری بات کی مثال برے درخت کی طرح ہے، جسے زمین کے اوپر سے اکھاڑ لیا جاتا ہے اور اسے قرار نہیں ہوتا ۔“ آپ نے ارشاد فرمایا: اس سے مراد حنظلہ ہے۔ شعیب نامی کہتے ہیں: میں نے یہ بات ابوالعالیہ کو بتائی، تو انہوں نے فرمایا: ہم نے بھی اسی طرح سنی ہے۔ (امام ابن حبان رحمہ اللہ فرماتے ہیں:) سیدنا انس رضی اللہ عنہ کے یہ الفاظ ” وہ نبی اکرم صلی اللہ علیہ وسلم کی خدمت میں قناع جزء لے کر آئے “ اس سے مراد کھجوروں کا تھال ہے، کیونکہ اہل مدینہ تھال کے لئے لفظ ” قناع “ استعمال کرتے ہیں، اور کھجوروں کے لئے لفظ جزء استعمال کرتے ہیں۔