صحیح ابن حبان

عون بن ابوجحیفہ اپنے والد کا یہ بیان نقل کرتے ہیں: نبی اکرم صلی اللہ علیہ وسلم نے سیدنا سلمان فارسی رضی اللہ عنہ اور سیدنا ابودرداء رضی اللہ عنہ کے درمیان بھائی چارہ قائم کر دیا۔ ایک دن سیدنا سلمان فارس رضی اللہ عنہ سیدنا ابودرداء رضی اللہ عنہ سے ملنے کے لئے آئے، تو سیدہ ام درداء رضی اللہ عنہا کو بکھرے ہوئے حلیے میں دیکھا تو دریافت کیا: آپ کو کیا ہوا ہے؟ انہوں نے جواب دیا: آپ کے بھائی کو دنیا کی کوئی ضرورت نہیں ہے۔ جب سیدنا ابودرداء رضی اللہ عنہ آئے، تو سیدنا سلمان رضی اللہ عنہ کو انہوں نے خوش آمدید کہا: اور ان کے سامنے کھانا رکھ دیا، تو سیدنا سلمان رضی اللہ عنہ نے کہا: آپ کھائیے۔ سیدنا ابودرداء رضی اللہ عنہ نے جواب دیا: ہم نے، تو روزہ رکھا ہوا ہے۔ سیدنا سلمان رضی اللہ عنہ نے کہا: میں آپ کو قسم دیتا ہوں کہ آپ کھائیں، کیونکہ میں بھی اس وقت تک نہیں کھاؤں گا، جب تک آپ نہیں کھائیں گے۔ راوی بیان کرتے ہیں، تو سیدنا ابودرداء رضی اللہ عنہ نے ان کے ساتھ کھانا کھا لیا پھر وہ رات کو ان کے پاس ہی ٹھہر گئے جب رات کا وقت ہوا، تو سیدنا ابودرداء رضی اللہ عنہ اٹھ کر نوافل ادا کرنے لگے، تو سیدنا سلمان رضی اللہ عنہ نے انہیں روک دیا، انہوں نے فرمایا: اے ابودرداء! تمہارے پروردگار کا بھی تم پر حق ہے تمہاری بیوی کا بھی تم پر حق ہے۔ تمہارے جسم کا بھی تم پر حق ہے۔ تم ہر حق دار کو اس کا حق دو تم نفلی روزہ رکھو اور چھوڑ بھی دیا کرو تم نوافل ادا کیا بھی کرو اور سو بھی جایا کرو اور تم اپنی بیوی کے پاس بھی جایا کرو۔ جب صبح صادق کا وقت قریب آیا، تو سیدنا سلمان رضی اللہ عنہ نے کہا: اب آپ اٹھ جائیں پھر یہ دونوں حضرات اٹھ کھڑے ہوئے ان دونوں نے نوافل ادا کئے اور نماز ادا کرنے کے لئے چلے گئے۔ جب نبی اکرم صلی اللہ علیہ وسلم نے نماز ادا کی تو سیدنا ابودرداء رضی اللہ عنہ آپ کی خدمت میں حاضر ہوئے اور آپ کو سیدنا سلمان رضی اللہ عنہ کی بات کے بارے میں بتایا تو نبی اکرم صلی اللہ علیہ وسلم نے ان سے وہی بات کہی جو سیدنا سلمان رضی اللہ عنہ نے کہی تھی۔