صحیح ابن حبان

سیدنا معاویہ بن حکم سلمی رضی الله عنہ بیان کرتے ہیں: میری کچھ بکریاں تھیں جنہیں میری ایک کنیز ” احد “ اور ” جوانیہ “ کی طرف چرایا کرتی تھی۔ ایک دن میں وہاں پہنچا، تو پتہ چلا کہ ان میں سے ایک بکری کو بھیٹریا لے گیا ہے۔ میں بھی انسان ہوں، مجھے بھی اسی طرح غصہ آ گیا، جس طرح لوگوں کو غصہ آتا ہے، تو میں نے اسے مکا مارا۔ پھر میں نبی اکرم صلی اللہ علیہ وسلم کی خدمت میں حاضر ہوا اور میں نے عرض کی: کیا میں اسے آزاد نہ کر دوں؟ نبی اکرم صلی اللہ علیہ وسلم نے فرمایا: تم اسے میرے پاس لے کر آؤ۔ میں اسے لے کر نبی اکرم صلی اللہ علیہ وسلم کی خدمت میں حاضر ہوا۔ نبی اکرم صلی اللہ علیہ وسلم نے دریافت کیا:اللہ تعالیٰ کہاں ہے؟ اس نے عرض کی: آسمان میں۔ نبی اکرم صلی اللہ علیہ وسلم نے دریافت کیا: میں کون ہوں؟ اس نے عرض کی: آپ اللہ کے رسول ہیں۔ نبی اکرم صلی اللہ علیہ وسلم نے فرمایا: تم اسے آزاد کر دو۔ وہ مومن ہے۔