صحيح الادب المفرد

سیدنا محمود بن لبید رضی اللہ عنہ سے روایت ہے، انہوں نے کہا: جب غزوہ خندق کے دن سیدنا سعد (بن معاذ) رضی اللہ عنہ کے بازو کی رگ (اکحل) زخمی ہو گئی اور ان کی حالت بگڑ گئی تو لوگوں نے انہیں ایک عورت کے پاس منتقل کر دیا جسے رفیدہ کہا جاتا تھا، وہ زخمیوں کا علاج کیا کرتی تھی۔ تو نبی صلی اللہ علیہ وسلم جب شام کو ان کے پاس سے گزرتے تو فرماتے: ”تم نے شام کیسے کی؟“ اور جب صبح ہوتی تو فرماتے: ”تم نے صبح کیسے کی؟“ تو وہ آپ کو (اپنا حال) بتا دیتے۔

سیدنا ابن عباس رضی اللہ عنہما سے روایت ہے کہ سیدنا علی بن ابی طالب رضی اللہ عنہ رسول اللہ صلی اللہ علیہ وسلم کے پاس سے اس بیماری کے دوران نکلے جس میں آپ کی وفات ہوئی، تو لوگوں نے کہا: اے ابوالحسن! رسول اللہ صلی اللہ علیہ وسلم نے صبح کیسے کی؟ انہوں نے کہا: ”الحمدللہ، آپ نے صبح اس حال میں کی کہ آپ صحت یاب ہو رہے ہیں ۔“ راوی نے کہا: تو سیدنا عباس بن عبدالمطلب رضی اللہ عنہ نے ان کا ہاتھ پکڑا اور کہا: کیا تم دیکھتے نہیں؟ اللہ کی قسم! تم تین دن کے بعد لاٹھی کے غلام (یعنی دوسروں کے ماتحت) ہو گے، اور اللہ کی قسم! میں دیکھ رہا ہوں کہ رسول اللہ صلی اللہ علیہ وسلم اپنی اس بیماری میں وفات پا جائیں گے، میں موت کے وقت بنو عبدالمطلب کے چہروں کو پہچانتا ہوں، لہٰذا ہمیں رسول اللہ صلی اللہ علیہ وسلم کے پاس لے چلو تاکہ ہم آپ سے پوچھ لیں کہ یہ امر (خلافت) کن لوگوں میں ہو گا؟ اگر ہم میں ہوا تو ہمیں اس کا علم ہو جائے گا، اور اگر ہمارے علاوہ دوسروں میں ہوا تو ہم آپ سے بات کریں گے اور آپ ہمارے بارے میں (انہیں) وصیت فرما دیں گے۔ تو سیدنا علی رضی اللہ عنہ نے کہا: اللہ کی قسم! اگر ہم نے آپ سے اس کا سوال کیا اور آپ نے ہمیں اس سے روک دیا تو لوگ آپ کے بعد ہمیں یہ کبھی نہیں دیں گے، اور اللہ کی قسم! میں رسول اللہ صلی اللہ علیہ وسلم سے کبھی اس کا سوال نہیں کروں گا۔