صحيح الادب المفرد

سیدنا علی بن ابی طالب رضی اللہ عنہ سے روایت ہے، انہوں نے کہا: نبی صلی اللہ علیہ وسلم کچھ لوگوں کے پاس سے گزرے جن میں ایک آدمی نے خلوق (زعفران ملی خوشبو) لگا رکھی تھی، آپ صلی اللہ علیہ وسلم نے ان کی طرف دیکھا، انہیں سلام کہا اور اس آدمی سے منہ پھیر لیا۔ اس آدمی نے کہا: آپ نے مجھ سے منہ پھیر لیا !؟ آپ صلی اللہ علیہ وسلم نے فرمایا : ”اس کی دونوں آنکھوں کے درمیان انگارہ ہے ۔“

سیدنا عبداللہ بن عمرو بن العاص بن وائل سہمی رضی اللہ عنہما سے روایت ہے کہ ایک آدمی نبی صلی اللہ علیہ وسلم کے پاس آیا اور اس کے ہاتھ میں سونے کی انگوٹھی تھی، تو نبی صلی اللہ علیہ وسلم نے اس سے منہ پھیر لیا۔ جب اس آدمی نے آپ کی ناپسندیدگی دیکھی تو جا کر انگوٹھی پھینک دی اور لوہے کی ایک انگوٹھی لے کر پہن لی اور نبی صلی اللہ علیہ وسلم کے پاس آیا تو آپ صلی اللہ علیہ وسلم نے فرمایا : ”یہ (اس سے بھی) بری ہے، یہ جہنمیوں کا زیور ہے ۔“ وہ واپس گیا، اسے پھینک دیا اور چاندی کی انگوٹھی پہن لی تو نبی صلی اللہ علیہ وسلم اس کے بارے میں خاموش رہے ۔