صحيح الادب المفرد

سیدنا علی رضی اللہ عنہ سے روایت ہے کہ رسول اللہ صلی اللہ علیہ وسلم رات کے وقت ان کے اور نبی صلی اللہ علیہ وسلم کی بیٹی فاطمہ (رضی اللہ عنہا) کے پاس تشریف لائے اور فرمایا: ”کیا تم (تہجد کی) نماز نہیں پڑھتے؟“ میں نے عرض کیا: اللہ کے رسول! ہماری جانیں تو اللہ کے ہاتھ میں ہیں، جب وہ ہمیں اٹھانا چاہے گا اٹھا دے گا! تو نبی صلی اللہ علیہ وسلم واپس چلے گئے اور مجھے کوئی جواب نہیں دیا۔ پھر میں نے سنا کہ آپ پیٹھ پھیر کر جاتے ہوئے اپنی ران پر ہاتھ مار رہے تھے اور فرما رہے تھے: «وكان الإنسان أكثر شيء جدلا» ”اور انسان سب سے بڑھ کر جھگڑالو ہے۔“ [الکہف: 54]

سیدنا ابوہریرہ رضی اللہ عنہ سے روایت ہے، (راوی نے) کہا: میں نے انہیں دیکھا کہ وہ اپنی پیشانی پر ہاتھ مار رہے تھے اور کہہ رہے تھے: اے اہل عراق! کیا تم یہ سمجھتے ہو کہ میں رسول اللہ صلی اللہ علیہ وسلم پر جھوٹ باندھتا ہوں؟ کیا تمہارے لیے آسانی ہو اور مجھ پر گناہ؟ میں گواہی دیتا ہوں کہ میں نے رسول اللہ صلی اللہ علیہ وسلم کو فرماتے ہوئے سنا: ”جب تم میں سے کسی کے جوتے کا تسمہ ٹوٹ جائے تو وہ دوسرے جوتے میں نہ چلے یہاں تک کہ اسے درست کر لے۔“