المستدرك على الصحيحين

سیدنا عمرو بن شعیب اپنے والد اور وہ اپنے دادا سے روایت کرتے ہیں کہ رسول اللہ ﷺ نے فرمایا: ”تم کھاؤ، پیو اور صدقہ کرو بشرطیکہ اس میں فضول خرچی اور تکبر نہ ہو، کیونکہ اللہ تعالیٰ اس بات کو پسند فرماتا ہے کہ اس کی نعمت کا اثر اس کے بندے پر (ظاہری طور پر) نظر آئے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا ابو ایوب انصاری رضی اللہ عنہ سے روایت ہے کہ انہوں نے رسول اللہ ﷺ کی خدمت میں کچھ سبزیاں بھیجیں جن میں پیاز یا گندنا (لہسن کی مشابہت رکھنے والی سبزی) تھی، جب انہوں نے دیکھا کہ رسول اللہ ﷺ نے اس میں سے کچھ تناول نہیں فرمایا تو انہوں نے بھی اسے کھانے سے انکار کر دیا، رسول اللہ ﷺ نے ان سے فرمایا: ”تمہیں اسے کھانے سے کیا چیز روک رہی ہے؟“ انہوں نے عرض کیا: میں نے اس میں رسول اللہ ﷺ کے کھانے کا اثر نہیں پایا، تو رسول اللہ ﷺ نے فرمایا: ”میں اللہ کے فرشتوں سے حیا کرتا ہوں (جو میرے پاس وحی لے کر آتے ہیں) جبکہ یہ (پیاز وغیرہ کھانا) حرام نہیں ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔