المستدرك على الصحيحين

سیدنا کعب بن مالک رضی اللہ عنہ سے روایت ہے کہ رسول اللہ ﷺ نے فرمایا: ”قیامت کے دن لوگوں کو اٹھایا جائے گا تو میں اور میری امت ایک ٹیلے پر ہوں گے، اور میرا رب مجھے سبز رنگ کا جوڑا پہنائے گا، پھر مجھے (شفاعت کی) اجازت دی جائے گی تو میں وہ کہوں گا جو اللہ چاہے گا کہ میں کہوں، پس یہی مقام محمود ہے۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

صلہ بن زفر سے روایت ہے کہ میں نے سیدنا حذیفہ بن یمان رضی اللہ عنہ کو اللہ تعالیٰ کے اس فرمان ﴿عَسَى أَنْ يَبْعَثَكَ رَبُّكَ مَقَامًا مَحْمُودًا﴾ ”امید ہے کہ آپ کا رب آپ کو مقام محمود پر فائز کرے گا۔“ [سورة الإسراء: 79] کے بارے میں فرماتے ہوئے سنا: ”لوگوں کو ایک ہی میدان میں جمع کیا جائے گا، پکارنے والے کی آواز سب کو سنائی دے گی اور نگاہ سب تک پہنچے گی، سب ننگے پاؤں اور ننگے بدن ہوں گے جیسے پیدا کیے گئے تھے، سب خاموش ہوں گے اور کوئی جان اس کی اجازت کے بغیر کلام نہیں کرے گی۔“ انہوں نے فرمایا: ”پھر محمد (ﷺ) کو پکارا جائے گا، تو آپ ﷺ فرمائیں گے: «لَبَّيْكَ وَسَعْدَيْكَ، وَالْخَيْرُ فِي يَدَيْكَ، وَالشَّرُّ لَيْسَ إِلَيْكَ، الْمَهْدِيُّ مَنْ هَدَيْتَ، وَعَبْدُكَ بَيْنَ يَدَيْكَ، وَلَكَ وَإِلَيْكَ، لَا مَلْجَأَ وَلَا مَنْجَى إِلَّا إِلَيْكَ، تَبَارَكْتَ وَتَعَالَيْتَ، سُبْحَانَ رَبِّ الْبَيْتِ» ”میں حاضر ہوں اور تیری اطاعت کے لیے تیار ہوں، اور بھلائی تیرے ہی ہاتھوں میں ہے، اور برائی کی نسبت تیری طرف نہیں کی جا سکتی، ہدایت یافتہ وہی ہے جسے تو نے ہدایت دی، اور تیرا بندہ تیرے سامنے کھڑا ہے، میرا سب کچھ تیرے لیے اور تیری ہی طرف ہے، تیرے سوا نہ کوئی پناہ گاہ ہے اور نہ کوئی جائے نجات، تو بابرکت اور بہت بلند ہے، پاک ہے اس گھر (کعبہ) کا رب۔“ پس یہی وہ مقام محمود ہے جس کے بارے میں اللہ تعالیٰ نے فرمایا ہے: ﴿عَسَى أَنْ يَبْعَثَكَ رَبُّكَ مَقَامًا مَحْمُودًا﴾ [سورة الإسراء: 79] ۔“
یہ حدیث شیخین کی شرط پر صحیح ہے لیکن انہوں نے اسے اس سیاق کے ساتھ روایت نہیں کیا، البتہ امام مسلم نے ابو مالک اشجعی کی حدیث بطریق ربعی بن حراش عن حذیفہ سے صرف ”وہ ضرور جہنم سے نکالے جائیں گے“ کے الفاظ کے ساتھ روایت کی ہے۔