المستدرك على الصحيحين

سیدنا انس بن مالک رضی اللہ عنہ سے روایت ہے کہ رسول اللہ ﷺ نے فرمایا: ”اپنی کچھ نمازوں کے ذریعے اپنے گھروں کو معزز بناؤ۔“ شیخین نے سیدنا ابن عمر رضی اللہ عنہما کی روایت سے اس بات پر اتفاق کیا ہے کہ نبی کریم ﷺ نے فرمایا: ”اپنی نمازیں گھروں میں پڑھا کرو اور انہیں قبرستان نہ بناؤ۔“ البتہ عبداللہ بن فروخ کی حدیث کے الفاظ منفرد ہیں، اور وہ مکہ کے ایک صدوق شیخ ہیں جو مصر میں مقیم رہے اور وہیں فوت ہوئے۔

سیدنا بریدہ رضی اللہ عنہ سے روایت ہے کہ ایک دن رسول اللہ ﷺ نے صبح کے وقت بلال رضی اللہ عنہ کو بلایا اور فرمایا: ”اے بلال! تم کس عمل کی وجہ سے جنت میں مجھ سے آگے نکل گئے ہو؟ میں گزشتہ رات جنت میں داخل ہوا تو میں نے اپنے آگے تمہارے چلنے کی چاپ سنی“، بلال رضی اللہ عنہ نے عرض کیا: یا رسول اللہ! میں نے جب بھی اذان دی ہے اس کے بعد دو رکعت نماز ضرور پڑھی ہے، اور جب بھی میرا وضو ٹوٹا میں نے اسی وقت وضو کیا، تو رسول اللہ ﷺ نے فرمایا: ”اسی عمل کی وجہ سے۔“
یہ حدیث شیخین کی شرط پر صحیح ہے، لیکن انہوں نے اسے روایت نہیں کیا۔