مسند أبي يعلى الموصلي

حَدَّثَنَا أَحْمَدُ بْنُ الْمِقْدَامِ ، حَدَّثَنَا الْمُعْتَمِرُ بْنُ سُلَيْمَانَ ، قَالَ : سَمِعْتُ أَبِي يُحَدِّثُ عَنْ قَتَادَةَ ، أَنَّ أَبَا رَافِعٍ حَدَّثَ عَنْ أَبِي هُرَيْرَةَ ، عَنْ رَسُولِ اللهِ - صَلَّى اللهُ عَلَيْهِ وَسَلَّمَ - قَالَ : يَحْفِرُونَ كُلَّ يَوْمٍ حَتَّى يَكَادُوا يَرَوْنَ شُعَاعَ الشَّمْسِ ، فَيَقُولُونَ : نَرْجِعُ إِلَيْهِ غَدًا ، فَيَرْجِعُونَ وَهُوَ أَشَدُّ مَا كَانَ ، فَإِذَا بَلَغَتْ مُدَّتُهُمْ ، وَأَرَادَ اللهُ عَزَّ وَجَلَّ أَنْ يَبْعَثَهُمْ عَلَى النَّاسِ ، قَالُوا : نَرْجِعُ إِلَيْهِ إِنْ شَاءَ اللهُ غَدًا ، فَيَرْجِعُونَ إِلَيْهِ كَهَيْئَةِ مَا تَرَكُوهُ فَيَحْفِرُونَهُ ، أَوْ كَمَا قَالَ ، قَالَ : فَقَالَ رَسُولُ اللهِ - صَلَّى اللهُ عَلَيْهِ وَسَلَّمَ - : فَيَفِرُّ النَّاسُ مِنْهُمْ فِي حُصُونِهِمْ ، أَوْ كَمَا قَالَ .
قَالَ الْمُعْتَمِرُ : وَقَالَ أَبِي : عَنْ قَتَادَةَ : إِنَّهُمْ يَرْمُونَ فِي السَّمَاءِ سِهَامًا ، فَتَرْجِعُ إِلَيْهِمْ فِيهَا دَمٌ فَيَقُولُونَ : ظَهَرْنَا عَلَى الْأَرْضِ وَقَهَرْنَا أَهْلَ السَّمَاءِ ، أَوْ كَمَا قَالَ .
قَالَ : فَيَبْعَثُ اللهُ عَلَيْهِمُ النَّغَفَ فِي أَقْفَائِهِمْ فَيَقْتُلُونَهُمْ ، فَقَالَ رَسُولُ اللهِ - صَلَّى اللهُ عَلَيْهِ وَسَلَّمَ - : حَتَّى إِنَّ دَوَابَّهُمْ تَسْمَنُ وَتَبْطَرُ مِمَّا تَأْكُلُ لُحُومَهُمْ ، أَوْ كَمَا قَالَ .

سیدنا ابوہریرہ رضی اللہ عنہ سے روایت ہے کہ رسول اللہ ﷺ نے ارشاد فرمایا: ”وہ (یاجوج و ماجوج) ہر روز (بند کو) کھودتے ہیں، یہاں تک کہ جب وہ سورج کی روشنی دیکھنے کے قریب پہنچ جاتے ہیں تو وہ کہتے ہیں: اب واپس چلو، بقیہ کل کھودیں گے، چنانچہ وہ واپس چلے جاتے ہیں لیکن جب اگلے دن آتے ہیں تو اللہ تعالیٰ اس دیوار کو پہلے سے بھی زیادہ مضبوط کر دیتا ہے، یہاں تک کہ جب ان کی (قید کی) مدت پوری ہو جائے گی اور اللہ عزوجل انہیں لوگوں پر نکالنے کا ارادہ فرمائے گا تو (دیوار کھودنے کے بعد) وہ کہیں گے: اب واپس چلو، ان شاء اللہ کل اسے مکمل کر لیں گے، پس وہ اگلے دن واپس آئیں گے تو دیوار کو اسی حالت میں پائیں گے جیسا اسے چھوڑ کر گئے تھے، چنانچہ وہ اسے کھود ڈالیں گے“، یا جیسا آپ ﷺ نے فرمایا، راوی کہتے ہیں کہ پھر رسول اللہ ﷺ نے ارشاد فرمایا: ”لوگ ان کے ڈر سے اپنے قلعوں میں محصور ہو جائیں گے“، یا جیسا آپ ﷺ نے فرمایا، معتمر رحمہ اللہ کہتے ہیں کہ میرے والد سلیمان رحمہ اللہ نے قتادہ رحمہ اللہ سے نقل کیا: ”وہ آسمان کی طرف اپنے تیر پھینکیں گے جو خون آلود ہو کر ان کی طرف پلٹیں گے، تو وہ (تکبر سے) کہیں گے: ہم زمین والوں پر غالب آ گئے اور ہم نے آسمان والوں کو بھی مغلوب کر دیا“، یا جیسا آپ ﷺ نے فرمایا، آپ ﷺ نے ارشاد فرمایا: ”پھر اللہ تعالیٰ ان کی گدیوں میں «النَّغَفَ» ”ایک خاص قسم کا کیڑا“ پیدا فرما دے گا جو انہیں ہلاک کر دے گا“، رسول اللہ ﷺ نے ارشاد فرمایا: ”حتیٰ کہ زمین کے جانور ان کا گوشت کھا کھا کر خوب موٹے تازہ ہو جائیں گے اور ان پر چربی چڑھ جائے گی“ یا جیسا کہ آپ ﷺ نے ارشاد فرمایا۔