صحيح مسلم

حضرت ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم کے پاس مسجد میں ایک مسلمان آدمی آیا اور آپ صلی اللہ علیہ وسلم کو آواز دے کر کہا: اے اللہ کے رسول! میں نے زنا کیا ہے، آپ صلی اللہ علیہ وسلم نے اس سے منہ پھیر لیا، وہ پھر کر آپ صلی اللہ علیہ وسلم کے سامنے آ گیا اور آپ سے کہنے لگا: اے اللہ کے رسول! میں نے زنا کیا ہے، آپ صلی اللہ علیہ وسلم نے اس سے اعراض کیا حتیٰ کہ اس نے یہ بات چار مرتبہ دہرائی، جب اس نے اپنے بارے میں چار مرتبہ گواہی دی تو رسول اللہ صلی اللہ علیہ وسلم نے اسے بلوایا اور اس سے پوچھا: ”کیا تو دیوانہ ہے؟“ اس نے کہا: نہیں، آپ صلی اللہ علیہ وسلم نے پوچھا: ”کیا تم شادی شدہ ہو؟“ اس نے کہا: جی ہاں، تو رسول اللہ صلی اللہ علیہ وسلم نے فرمایا: ”اسے لے جاؤ اور سنگسار کر دو۔“ ابن شہاب کہتے ہیں: مجھے اس شخص نے بتایا جس نے حضرت جابر بن عبداللہ رضی اللہ عنہما کو یہ کہتے سنا: میں بھی اسے رجم کرنے والوں میں شامل تھا، ہم نے اسے عید گاہ میں رجم کیا، جب پتھروں نے اسے بے بس کر دیا تو وہ بھاگ کھڑا ہوا، ہم نے اسے حرہ میں جا لیا اور رجم کر دیا۔

یہی روایت امام لیث رحمہ اللہ، زہری رحمہ اللہ ہی کی سند سے بیان کرتے ہیں۔

یہی روایت امام صاحب، امام دارمی کی سند سے زہری ہی کی سند سے بیان کرتے ہیں، امام لیث اور امام دارمی دونوں کی حدیث میں ابن شہاب، ایک ایسے شخص کے واسطے سے جس نے جابر بن عبداللہ رضی اللہ عنہما سے سنا، ان کا قول نقل کرتے ہیں۔

امام صاحب تین اساتذہ کی دو سندوں سے زہری کے واسطہ سے حضرت جابر بن عبداللہ رضی اللہ عنہما سے ابو ہریرہ رضی اللہ عنہ کی طرح حدیث بیان کرتے ہیں۔

حضرت جابر بن سمرہ رضی اللہ عنہما بیان کرتے ہیں کہ میں نے حضرت ماعز بن مالک رضی اللہ عنہ کو دیکھا، جب انہیں نبی اکرم صلی اللہ علیہ وسلم کے پاس لایا گیا، (وہ) چھوٹے قد اور مضبوط جسم والے تھے، ان کے جسم پر چادر نہیں تھی، انہوں نے اپنے بارے میں چار دفعہ زنا کرنے کی شہادت دی تو رسول اللہ صلی اللہ علیہ وسلم نے فرمایا: ”شاید تم نے...؟“ (بوس و کنار کیا ہو یا چٹکی لی ہو) انہوں نے کہا: نہیں، اللہ کی قسم! اس ذلیل اور کمینے آدمی نے زنا کیا ہے، تو آپ صلی اللہ علیہ وسلم نے انہیں رجم کرنے کا حکم دیا، پھر آپ صلی اللہ علیہ وسلم نے خطبہ دیا اور فرمایا: ”خبردار! جب بھی ہم اللہ کی راہ میں جہاد کے لیے نکلتے ہیں تو کوئی فرد پیچھے رہتا ہے اور بکرے کی طرح جنسی آوازیں نکالتا ہے، کسی کو معمولی اور حقیر چیز پیش کرتا ہے، ہاں اللہ کی قسم! اگر ان میں سے کوئی میرے قابو میں آ گیا تو میں اس کو سامانِ عبرت بنا دوں گا۔“

حضرت جابر بن سمرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم کے پاس ایک پستہ قد، پراگندہ بال اور مضبوط بدن والا آدمی لایا گیا، جو تہبند باندھے ہوئے تھا اور زنا کر چکا تھا، آپ صلی اللہ علیہ وسلم نے اسے دو مرتبہ لوٹایا، پھر اس کو رجم کرنے کا حکم دیا اور رسول اللہ صلی اللہ علیہ وسلم نے فرمایا: ”جب بھی ہم اللہ کی راہ میں جہاد کرنے نکلتے ہیں، تم میں سے کوئی پیچھے رہ جاتا ہے اور بکرے کی طرح آوازیں نکالتا ہے اور ان میں سے کسی کو تھوڑا سا دودھ دیتا ہے، اللہ تعالیٰ نے ان میں سے جس پر بھی مجھے قابو دیا میں اسے عبرت بنا دوں گا یا عبرتناک سزا دوں گا،“ راوی بیان کرتا ہے کہ میں نے یہ حدیث سعید بن جبیر رحمہ اللہ کو سنائی تو انہوں نے کہا: آپ صلی اللہ علیہ وسلم نے اسے چار بار لوٹایا تھا۔

امام صاحب رحمہ اللہ یہی روایت اپنے دو اور اساتذہ سے شعبہ رحمہ اللہ ہی کی مذکورہ بالا سند سے بیان کرتے ہیں، شبابہ رحمہ اللہ نامی راوی کی روایت میں بھی دو دفعہ لوٹانے کا تذکرہ ہے، جبکہ ابو عامر رحمہ اللہ کی روایت میں ہے: دو یا تین دفعہ لوٹایا۔

حضرت عبداللہ بن عباس رضی اللہ عنہما سے روایت ہے کہ نبی اکرم صلی اللہ علیہ وسلم نے ماعز بن مالک رضی اللہ عنہ سے پوچھا: ”کیا تیرے بارے میں مجھ تک جو کچھ پہنچا ہے، ٹھیک ہے، (حقیقت ہے)؟“ اس نے عرض کیا، آپ صلی اللہ علیہ وسلم کو میرے بارے میں کیا خبر ملی ہے؟ آپ صلی اللہ علیہ وسلم نے فرمایا: ”مجھے خبر ملی ہے کہ تو نے فلاں خاندان کی لونڈی سے زنا کیا ہے؟“ اس نے کہا، جی ہاں، اس نے چار مرتبہ اس کی شہادت دی، پھر آپ صلی اللہ علیہ وسلم نے اسے رجم کرنے کا حکم دیا۔

حضرت ابو سعید رضی اللہ عنہ سے روایت ہے کہ اسلم خاندان کا ایک آدمی جسے ماعز بن مالک رضی اللہ عنہ کہتے تھے، رسول اللہ صلی اللہ علیہ وسلم کے پاس آیا اور کہنے لگا، میں نے بدکاری کا ارتکاب کیا ہے، اس کی حد مجھ پر لگائیے، تو آپ صلی اللہ علیہ وسلم نے اسے کئی دفعہ واپس کیا، پھر آپ صلی اللہ علیہ وسلم نے اس کی قوم سے پوچھا تو انہوں نے کہا، ہمیں اس کے اندر کسی بیماری (دماغی خلل) کا علم نہیں ہے، مگر یہ بات ہے، اس نے کسی گناہ کا ارتکاب کیا ہے، جس کے بارے میں اس کا خیال ہے، وہ حد قائم کیے بغیر معاف نہیں ہو سکتا، وہ پھر نبی اکرم صلی اللہ علیہ وسلم کے پاس حاضر ہوا تو آپ صلی اللہ علیہ وسلم نے ہمیں اسے مارنے کا حکم دیا، تو ہم اسے بقیع غرقد (مدینہ کا قبرستان) کی طرف لے گئے، ہم نے نہ اس کو باندھا اور نہ ہی اس کے لیے گڑھا کھودا، ہم نے اسے ہڈیوں، روڑوں اور ٹھیکریوں سے مارا تو وہ بھاگ کھڑا ہوا اور ہم بھی اس کے پیچھے بھاگ پڑے حتیٰ کہ وہ حرہ (سیاہ سنگریزے) کے کنارے پر آ گیا اور ہمارے سامنے کھڑا ہو گیا تو ہم نے اسے حرہ کے بڑے پتھروں سے مارا حتیٰ کہ وہ خاموش ہو گیا، یعنی فوت ہو گیا۔ پھر رسول اللہ صلی اللہ علیہ وسلم نے شام کو خطاب فرمایا اور کہا: ”جب بھی ہم اللہ کی راہ میں جہاد کے لیے نکلتے ہیں تو کوئی آدمی ہماری عورتوں میں پیچھے رہ جاتا ہے اور وہ نر کی طرح آواز نکالتا ہے، مجھ پر لازم ہے، میرے پاس اس فعل کا مرتکب جو آدمی بھی لایا جائے گا، میں اسے عبرت ناک سزا دوں گا۔“ پھر آپ صلی اللہ علیہ وسلم نے نہ اس کے لیے دعا کی نہ برا بھلا کہا۔

امام صاحب ایک اور استاد سے داود کی مذکورہ بالا سند سے اس کے ہم معنی روایت بیان کرتے ہیں اور اس حدیث میں ہے کہ نبی اکرم صلی اللہ علیہ وسلم شام کو خطاب کے لیے کھڑے ہوئے، اللہ تعالیٰ کی حمد و ثناء بیان کی، پھر فرمایا: ”حمد و صلوٰۃ کے بعد، لوگوں کو کیا ہو گیا ہے جب ہم جہاد کے لیے نکلتے ہیں ان میں سے کوئی ایک پیچھے رہ جاتا ہے اور نر بکرے کی طرح آواز نکالتا ہے۔“ اس میں «فِي عِيَالِنَا» ”ہمارے اہل و عیال میں“ (کے الفاظ نہیں ہیں)۔

امام صاحب اپنے دو اور اساتذہ کی سندوں سے، داؤد کی مذکورہ سند سے اس حدیث کا کچھ حصہ بیان کرتے ہیں، ہاں سفیان کی حدیث میں ہے اس نے زنا کا اعتراف تین دفعہ کیا۔

حضرت سلیمان بن بریدہ اپنے والد حضرت بریدہ رضی اللہ عنہ سے روایت کرتے ہیں کہ حضرت ماعز بن مالک رضی اللہ عنہ نبی اکرم صلی اللہ علیہ وسلم کی خدمت میں حاضر ہو کر کہنے لگے: اے اللہ کے رسول صلی اللہ علیہ وسلم! مجھے (حد لگا کر) پاک کر دیجیے، تو آپ صلی اللہ علیہ وسلم نے فرمایا: ”تم پر افسوس! واپس جاؤ، اللہ سے معافی مانگو اور اس کی طرف رجوع کرو۔“ تو وہ تھوڑی دور واپس چلے گئے، پھر آ کر کہنے لگے: اے اللہ کے رسول صلی اللہ علیہ وسلم! مجھے پاک کر دیجیے، تو رسول اللہ صلی اللہ علیہ وسلم نے فرمایا: ”تم پر افسوس! جا، اللہ سے معافی مانگ اور توبہ کر۔“ تو وہ پھر تھوڑی دور جا کر واپس آ گئے، پھر آ کر کہنے لگے: اے اللہ کے رسول! مجھے پاک کر دیجیے، تو نبی اکرم صلی اللہ علیہ وسلم نے پھر اپنے کلمات دہرا دیے، حتیٰ کہ جب وہ چوتھی بار آیا تو رسول اللہ صلی اللہ علیہ وسلم نے اس سے پوچھا: ”میں تمہیں کس چیز سے پاک کروں؟“ تو اس نے جواب دیا: زنا سے، رسول اللہ صلی اللہ علیہ وسلم نے پوچھا: ”کیا یہ دیوانہ ہے؟“ تو آپ صلی اللہ علیہ وسلم کو بتایا گیا کہ یہ پاگل نہیں ہے، تو آپ صلی اللہ علیہ وسلم نے پوچھا: ”کیا اس نے شراب پی ہے؟“ تو ایک آدمی نے کھڑے ہو کر اس کا منہ سونگھا اور اس سے شراب کی بو محسوس نہ کی، تو رسول اللہ صلی اللہ علیہ وسلم نے پوچھا: ”کیا واقعی تو نے زنا کیا ہے؟“ اس نے کہا: جی ہاں! تو آپ صلی اللہ علیہ وسلم کے حکم پر اسے رجم کر دیا گیا اور لوگ اس کے بارے میں دو گروہوں میں بٹ گئے؛ بعض کہنے لگے وہ تباہ و برباد ہو گیا، اس کے گناہ نے اسے گھیر لیا اور بعض کہنے لگے: ماعز کی توبہ سے بڑھ کر کسی کی توبہ نہیں ہے کہ وہ خود نبی اکرم صلی اللہ علیہ وسلم کے پاس آیا اور آپ صلی اللہ علیہ وسلم کے ہاتھ میں اپنا ہاتھ رکھ کر کہنے لگا: مجھے پتھر سے مار ڈالیے، حضرت بریدہ رضی اللہ عنہ کہتے ہیں: دو تین دن صحابہ میں یہی اختلاف رہا، پھر رسول اللہ صلی اللہ علیہ وسلم تشریف لائے جبکہ دونوں گروہ بیٹھے ہوئے تھے، آپ صلی اللہ علیہ وسلم سلام کہہ کر بیٹھ گئے اور فرمایا: ”ماعز بن مالک رضی اللہ عنہ کے لیے بخشش طلب کرو۔“ تو لوگوں نے کہا: اللہ تعالیٰ ماعز بن مالک رضی اللہ عنہ کو معاف فرمائے، اس پر رسول اللہ صلی اللہ علیہ وسلم نے فرمایا: ”اس نے ایسی توبہ کی ہے کہ اگر ایک امت کے درمیان بانٹ دی جائے تو ان کے لیے کافی ہو جائے۔“ حضرت بریدہ رضی اللہ عنہ بیان کرتے ہیں: پھر آپ صلی اللہ علیہ وسلم کے پاس ازد قبیلہ کے خاندان غامد کی ایک عورت آئی اور کہنے لگی: اے اللہ کے رسول صلی اللہ علیہ وسلم! مجھے پاک کر دیجیے، آپ صلی اللہ علیہ وسلم نے فرمایا: ”تم پر افسوس! واپس چلی جاؤ، اللہ سے بخشش طلب کرو اور اس کی طرف رجوع کرو۔“ تو اس نے عرض کیا: میں سمجھتی ہوں آپ مجھے ماعز بن مالک رضی اللہ عنہ کی طرح واپس لوٹانا چاہتے ہیں، آپ صلی اللہ علیہ وسلم نے فرمایا: ”تیرا کیا معاملہ ہے؟“ اس نے کہا: مجھے زنا سے حمل ٹھہر چکا ہے، آپ صلی اللہ علیہ وسلم نے پوچھا: ”کیا واقعی تجھے؟“ اس نے کہا: جی ہاں! تو آپ صلی اللہ علیہ وسلم نے اسے فرمایا: ”تم وضع حمل تک ٹھہر جاؤ۔“ حضرت بریدہ رضی اللہ عنہ کہتے ہیں: تو ایک انصاری آدمی نے اس کے نان و نفقہ کی ذمہ داری برداشت کی، حتیٰ کہ اس نے بچہ جنا تو وہ انصاری نبی اکرم صلی اللہ علیہ وسلم کی خدمت میں حاضر ہوا اور عرض کیا: غامدیہ عورت کا حمل وضع ہو گیا ہے، تو آپ صلی اللہ علیہ وسلم نے فرمایا: ”تب ہم اس کو اس حالت میں رجم نہیں کریں گے کہ اس کے بچے کو چھوٹا ہی چھوڑ دیں اور اسے کوئی دودھ پلانے والا نہ ہو“، تو ایک انصاری آدمی کھڑا ہوا اور کہنے لگا: اے اللہ کے نبی صلی اللہ علیہ وسلم! اس کو دودھ پلانے کا ذمہ دار میں ہوں، تو آپ صلی اللہ علیہ وسلم نے اسے رجم کروا دیا۔

حضرت بریدہ رضی اللہ عنہ بیان کرتے ہیں کہ حضرت ماعز بن مالک اسلمی رضی اللہ عنہ رسول اللہ صلی اللہ علیہ وسلم کی خدمت میں حاضر ہو کر کہنے لگے، اے اللہ کے رسول صلی اللہ علیہ وسلم! میں اپنے اوپر ظلم کر چکا ہوں، میں نے زنا کیا ہے اور میں چاہتا ہوں آپ مجھے پاک کر دیں، آپ صلی اللہ علیہ وسلم نے انہیں واپس کر دیا، جب اگلا دن آیا وہ پھر آئے اور کہنے لگے، اے اللہ کے رسول صلی اللہ علیہ وسلم! میں نے زنا کیا ہے، تو آپ صلی اللہ علیہ وسلم نے دوبارہ واپس کر دیا، رسول اللہ صلی اللہ علیہ وسلم نے ان کی قوم کی طرف پیغام بھیجا اور پوچھا: ”کیا تم اس کی عقل میں کچھ فتور محسوس کرتے ہو یا اس میں کوئی قابلِ اعتراض بات پاتے ہو؟“ تو انہوں نے جواب دیا، ہمارے علم میں ان میں پوری عقل ہے، وہ ہمارے اچھے افراد میں سے ہیں، ہماری معلومات یہی ہیں، پھر وہ تیسری بار آئے، آپ صلی اللہ علیہ وسلم نے ان کی قوم کی طرف پھر پیغام بھیجا اور ان کے بارے میں پوچھا، ان کی قوم نے آپ کو بتایا کہ ان میں کوئی قابلِ اعتراض بات نہیں ہے اور نہ ان کی عقل میں فتور ہے، تو جب وہ چوتھی بار آئے تو ان کے لیے گڑھا کھودا گیا، پھر آپ صلی اللہ علیہ وسلم نے انہیں رجم کرنے کا حکم دیا، حضرت بریدہ رضی اللہ عنہ بیان کرتے ہیں کہ اس کے بعد آپ صلی اللہ علیہ وسلم کے پاس قبیلہ غامدیہ کی ایک عورت آئی اور کہنے لگی، اے اللہ کے رسول! میں زنا کر چکی ہوں تو مجھے پاک کر دیجیے، آپ صلی اللہ علیہ وسلم نے اسے واپس کر دیا، جب اگلا دن آیا تو اس نے کہا، اے اللہ کے رسول صلی اللہ علیہ وسلم! آپ مجھے واپس کیوں لوٹاتے ہیں؟ شاید آپ صلی اللہ علیہ وسلم مجھے ماعز کی طرح واپس لوٹانا چاہتے ہیں، اللہ کی قسم! میں تو حاملہ ہو چکی ہوں، آپ صلی اللہ علیہ وسلم نے فرمایا: ”اگر تمہیں اصرار ہے تو جاؤ حتیٰ کہ تم بچہ جنو۔“ تو جب اس نے بچہ جنا، وہ اسے ایک کپڑے میں لپیٹ کر لے آئی اور کہا، یہ بچہ میں جن چکی ہوں، آپ صلی اللہ علیہ وسلم نے فرمایا: ”جاؤ اسے دودھ پلاؤ حتیٰ کہ اس کا دودھ چھوٹ جائے۔“ تو جب اس نے اس کا دودھ چھڑوایا، وہ آپ صلی اللہ علیہ وسلم کے پاس بچہ لے کر آئی، اس کے ہاتھ میں روٹی کا ٹکڑا تھا اور کہنے لگی، اے اللہ کے نبی! میں اس کا دودھ چھڑا چکی ہوں اور یہ کھانا کھانے لگ گیا ہے، تو آپ صلی اللہ علیہ وسلم نے بچہ ایک مسلمان کے حوالے کیا، پھر اس کے بارے میں حکم دیا تو اس کے لیے اس کے سینے تک گڑھا کھودا گیا اور آپ صلی اللہ علیہ وسلم کے حکم سے لوگوں نے اسے رجم کر دیا، حضرت خالد بن ولید رضی اللہ عنہ پتھر لے کر آگے بڑھتے ہیں اور اس کے سر پر مارتے ہیں اور خون حضرت خالد رضی اللہ عنہ کے چہرے پر پڑتا ہے، وہ اسے برا بھلا کہتے ہیں، نبی اکرم صلی اللہ علیہ وسلم نے ان کا اس کو برا بھلا کہنا سن لیا تو آپ صلی اللہ علیہ وسلم نے فرمایا: ”رک جاؤ اے خالد! اس ذات کی قسم جس کے ہاتھ میں میری جان ہے، اس نے اس قدر سچی توبہ کی ہے کہ اگر ناجائز طور پر ٹیکس لینے والا بھی ایسی توبہ کرے تو اسے معافی مل جائے۔“ پھر آپ صلی اللہ علیہ وسلم نے اس کی نمازِ جنازہ پڑھنے کا حکم دیا اور نماز پڑھا کر اسے دفن کر دیا۔

حضرت عمران بن حصین رضی اللہ عنہ سے روایت ہے کہ جہینہ قبیلہ کی ایک عورت، جو حاملہ تھی، نبی اکرم صلی اللہ علیہ وسلم کی خدمت میں حاضر ہو کر کہنے لگی: اے اللہ کے نبی! میں قابلِ حد جرم کا ارتکاب کر چکی ہوں تو آپ صلی اللہ علیہ وسلم مجھ پر حد قائم کریں، تو نبی اکرم صلی اللہ علیہ وسلم نے اس کے سرپرست کو بلایا اور فرمایا: ”اس سے اچھا سلوک کرنا اور جب یہ بچہ جن لے تو اسے میرے پاس لے آنا۔“ اس نے ایسے ہی کیا تو نبی اکرم صلی اللہ علیہ وسلم نے اس کے بارے میں حکم دیا اور اس کے کپڑے اس پر باندھ دیے گئے، پھر آپ صلی اللہ علیہ وسلم نے اسے رجم کرنے کا حکم دیا، پھر اس کی نمازِ جنازہ پڑھانی چاہی، جس پر حضرت عمر رضی اللہ عنہ نے آپ سے پوچھا: اے اللہ کے نبی صلی اللہ علیہ وسلم! کیا آپ اس کی نمازِ جنازہ پڑھیں گے حالانکہ یہ زنا کر چکی ہے؟ تو آپ صلی اللہ علیہ وسلم نے جواب دیا: ”اس نے اس قدر عظیم توبہ کی ہے، اگر اہل مدینہ کے ستر افراد کو دی جائے تو ان کے لیے کافی ہو جائے، کیا تو نے اس سے بہتر توبہ پائی ہے کہ اس نے اللہ کے لیے اپنی جان قربان کر دی ہے؟“

یہی روایت امام صاحب رحمہ اللہ ایک اور استاد سے یحییٰ بن ابی کثیر کی مذکورہ بالا سند سے ہی بیان کرتے ہیں۔

حضرت ابوہریرہ اور حضرت زید بن خالد جہنی رضی اللہ عنہما بیان کرتے ہیں کہ ایک بدوی رسول اللہ صلی اللہ علیہ وسلم کی خدمت میں حاضر ہو کر کہنے لگا: اے اللہ کے رسول! میں آپ سے اللہ کے واسطے سے درخواست کرتا ہوں کہ آپ صلی اللہ علیہ وسلم میرے لیے اللہ کے قانون کے مطابق فیصلہ کریں، اس کے مد مقابل دوسرے فریق نے کہا، جو اس سے زیادہ سمجھدار تھا: جی ہاں، آپ ہمارے درمیان اللہ کی کتاب کے مطابق فیصلہ فرمائیں اور مجھے بات کرنے کی اجازت دیں، تو رسول اللہ صلی اللہ علیہ وسلم نے فرمایا: ”بات کر۔“ اس نے کہا: میرا بیٹا اس کے ہاں نوکر تھا تو اس نے اس کی بیوی سے زنا کیا اور مجھے بتایا گیا ہے کہ میرے بیٹے کو سنگسار کر دیا جائے گا، تو میں نے اس کی جان بچانے کے لیے سو بکری اور ایک لونڈی فدیہ کے طور پر اس کو دے دی، بعد میں میں نے اہل علم سے پوچھا تو انہوں نے بتایا: میرے بیٹے کو تو صرف سو کوڑے لگیں گے اور ایک سال کے لیے شہر بدر کیا جائے گا اور رجم تو اس کی بیوی کو کیا جائے گا، اس پر رسول اللہ صلی اللہ علیہ وسلم نے فرمایا: ”اس ذات کی قسم جس کے ہاتھ میں میری جان ہے، میں تمہارے درمیان اللہ کی کتاب (قانون) کے مطابق فیصلہ کروں گا، لونڈی اور بکریاں تجھے واپس ملیں گی اور تیرے بیٹے کو سو (100) کوڑے مارے جائیں گے اور ایک سال کے لیے دیس سے نکال دیا جائے گا، اور اے انیس! جاؤ اس کی بیوی کے پاس اگر وہ اعتراف کر لے تو اسے رجم کر دو۔“ راوی بیان کرتے ہیں: انیس رضی اللہ عنہ اس کے ہاں گئے تو اس نے اعتراف کر لیا تو رسول اللہ صلی اللہ علیہ وسلم نے اسے رجم کرنے کا حکم دیا۔

یہی روایت امام صاحب اپنے چار اساتذہ کی تین سندوں سے زہری ہی کی مذکورہ بالا سند سے بیان کرتے ہیں۔