صحيح مسلم

حضرت خباب بن ارت رضی اللہ عنہ سے روایت ہے کہ ہم نے رسول اللہ صلی اللہ علیہ وسلم کے ساتھ اللہ کی راہ میں اللہ کی رضا حاصل کرنے کے لیے ہجرت کی اور ہمارا اجر اللہ کے ذمہ ثابت ہو گیا۔ اور ہم میں سے کچھ لوگ اگلے جہاں اس حال میں گئے کہ انہوں نے (دنیا میں) اپنا کچھ اجر حاصل نہیں کیا، یعنی ان کے دور میں فتوحات کے نتیجے میں مال و دولت اور آرام و آسائش میسر نہ تھی، انہی میں مصعب بن عمیر رضی اللہ عنہ بھی ہیں، وہ احد کے دن شہید ہوئے اور انہیں کفن دینے کے لیے ایک دھاری دار چادر کے سوا کچھ نہ ملا، جب ہم اس چادر کو ان کے سر پر رکھتے تو ان کے پاؤں کھل جاتے اور جب ہم اسے ان کے پاؤں پر رکھتے تو سر کھل جاتا۔ اس پر رسول اللہ صلی اللہ علیہ وسلم نے فرمایا: «ضَعُوهَا مِمَّا يَلِي رَأْسَهُ، وَاجْعَلُوا عَلَى رِجْلَيْهِ الإِذْخِرَ» ”اسے اس کے سر کے قریب رکھو اور اس کے پیروں پر اذخر گھاس ڈال دو۔“ اور ہم میں سے بعض کے پھل پک چکے ہیں (انہیں مال و دولت کی فراوانی حاصل ہے) اور وہ انہیں چن رہے ہیں، انہیں ہر قسم کی سہولت و آسائش حاصل ہے۔

”امام صاحب نے یہی روایت اپنے کئی دوسرے اساتذہ سے بیان کی ہے۔“

حضرت عائشہ رضی اللہ عنہا سے روایت ہے، وہ بیان کرتی ہیں کہ رسول اللہ صلی اللہ علیہ وسلم کو سحولی بستی کی بنی ہوئی تین سفید چادروں میں کفن دیا گیا، ان کپڑوں میں نہ قمیص (کرتا) تھی اور نہ عمامہ (پگڑی) اور رہا حُلہ (چادروں کا جوڑا) تو اس کے بارے میں لوگوں کو اشتباہ پیدا ہو گیا، آپ صلی اللہ علیہ وسلم کے کفن کے لیے اسے خریدا گیا تھا۔ پھر حلہ چھوڑ دیا گیا اور آپ کو تین سحولی کپڑوں میں کفن دیا گیا اور اس حلے کو عبداللہ بن ابی بکر رضی اللہ عنہما نے لے لیا اور کہا: ”میں اس کو اپنے کفن کے لیے رکھوں گا۔“ پھر کہنے لگا: ”اگر اللہ تعالیٰ اسے اپنے نبی کے لیے پسند فرماتا تو آپ صلی اللہ علیہ وسلم کو اس میں کفن دیتا“، اس لیے انہوں نے اسے بیچ کر اس کی قیمت صدقہ کر دی۔

حضرت عائشہ رضی اللہ عنہا سے روایت ہے کہ وہ بتاتی ہیں کہ رسول اللہ صلی اللہ علیہ وسلم کو عبداللہ بن ابی بکر رضی اللہ عنہما کے ایک یمنی حلہ (جوڑے) میں لپیٹا گیا، پھر اس کو اتار دیا گیا اور آپ صلی اللہ علیہ وسلم کو تین سفید یمانی کپڑوں کا کفن دیا گیا جن میں نہ کرتا تھا اور نہ ہی پگڑی، عبداللہ رضی اللہ عنہما نے وہ جوڑا اٹھا لیا اور کہا: ”مجھے اس میں کفنایا جائے گا“ پھر کہا: ”رسول اللہ صلی اللہ علیہ وسلم کو اس میں کفن نہیں دیا گیا تو مجھے اس میں کیوں کفن دیا جائے“ اور اسے صدقہ کر دیا۔

مصنف صاحب نے یہی روایت اپنے دو اور اساتذہ سے بیان کی ہے، مگر ان کی حدیث میں عبداللہ بن ابی بکر رضی اللہ عنہ کے واقعے کا ذکر نہیں ہے۔

ابوسلمہ رحمہ اللہ سے روایت ہے کہ میں نے نبی اکرم صلی اللہ علیہ وسلم کی زوجہ حضرت عائشہ رضی اللہ عنہا سے پوچھا، میں نے ان سے کہا: ”رسول اللہ صلی اللہ علیہ وسلم کو کتنے کپڑوں میں کفن دیا گیا تھا؟“ انہوں نے کہا: ”تین سفید سحولی کپڑوں میں۔“