صحيح مسلم

مختار بن فلفل سے روایت ہے، انہوں نے کہا: ”میں نے حضرت انس بن مالک رضی اللہ عنہ سے عصر کے بعد نفل نماز پڑھنے کے بارے میں پوچھا تو انہوں نے کہا: ”حضرت عمر رضی اللہ عنہ عصر کے بعد نماز پڑھنے پر ہاتھوں پر مارتے تھے اور ہم نبی اکرم صلی اللہ علیہ وسلم کے دور میں سورج کے غروب ہو جانے کے بعد نماز مغرب سے پہلے دو رکعت پڑھتے تھے۔“ تو میں نے ان سے پوچھا: ”کیا رسول اللہ صلی اللہ علیہ وسلم یہ دو رکعتیں پڑھتے تھے؟“ انہوں نے کہا: ”آپ صلی اللہ علیہ وسلم ہمیں پڑھتا دیکھتے تھے، آپ صلی اللہ علیہ وسلم نے نہ ہمیں حکم دیا اور نہ روکا۔““

حضرت انس بن مالک رضی اللہ عنہ بیان کرتے ہیں: ”ہماری مدینہ میں عادت تھی کہ جب مؤذن مغرب کی اذان دیتا تو صحابہ ستونوں کی طرف لپکتے تھے اور دو دو رکعتیں پڑھتے تھے، حتیٰ کہ ایک مسافر مسجد میں آتا تو یہ سمجھتا کہ مغرب کی نماز ہو چکی ہے کیونکہ لوگ کثرت سے یہ رکعتیں پڑھتے تھے۔“