مصنف ابن ابي شيبه

حضرت عطاء فرماتے ہیں کہ نبی کریم صلی اللہ علیہ وآلہ وسلم خطبہ دے رہے تھے کہ آپ صلی اللہ علیہ وآلہ وسلم نے لوگوں سے فرمایا : بیٹھ جاؤ ! حضرت عبد اللہ بن مسعود رضی اللہ عنہ نے یہ بات سُنی۔ اس وقت وہ دروازہ پر تھے۔ تو وہ بیٹھ گئے ۔ آپ صلی اللہ علیہ وآلہ وسلم نے فرمایا۔ اے عبد اللہ ! اندر آ جاؤ۔

حضرت قیس فرماتے ہیں کہ نبی کریم صلی اللہ علیہ وآلہ وسلم خطبہ ارشاد فرما رہے تھے کہ میرے والد حاضر ہوئے ۔ تو وہ آپ صلی اللہ علیہ وآلہ وسلم کے سامنے سورج میں ہی کھڑے ہوگئے آپ صلی اللہ علیہ وآلہ وسلم نے ان کے بارے میں حکم دیا تو انہیں سایہ کی طرف منتقل کیا گیا۔

حضرت عامر فرماتے ہیں کہ لوگ امام کو سلام کرتے تھے جبکہ وہ منبر پر ہوتا تھا۔ اور امام جواب بھی دیتا تھا۔

حضرت ابن سیرین روایت کرتے ہیں کہ لوگ امام سے اجازت طلب کرتے تھے درانحالہک امام منبر پر ہوتا تھا۔ پس جب زیاد خلیفہ تھا اور یہ استئندان کثرت سے ہونے لگا تو زیاد نے کہا۔ جو شخص اپنا ہاتھ اپنے ناک پر رکھ لے تو یہ اس کو اجازت (کے قائم مقام) ہوگا۔

حضرت جابر فرماتے ہیں کہ حضرت سلیک غطفانی تشریف لائے جبکہ نبی کریم صلی اللہ علیہ وآلہ وسلم خطبہ ارشاد فرما رہے تھے۔ آپ صلی اللہ علیہ وآلہ وسلم نے ان سے پوچھا۔ تم نے نماز پڑھی ہے ؟ انہوں نے عرض کیا۔ نہیں ! آپ صلی اللہ علیہ وآلہ وسلم نے فرمایا دو رکعتیں تخفیف کے ساتھ پڑھ لو۔ اور (امام) ابوحنیفہ کا قول یہ ذکر کیا گیا ہے کہ : امام اپنے خطبہ کے دوران کسی سے گفتگو نہیں کرے گا۔