مصنف ابن ابي شيبه

حضرت ابو الملیح اپنے والد سے روایت کرتے ہیں کہ نبی کریم صلی اللہ علیہ وآلہ وسلم نے درندوں کی کھالوں سے منع فرمایا : راوی یزید کہتے ہیں : یعنی ان کھالوں کو بچھونا بنانے سے۔

حضرت ابن سیرین سے روایت ہے کہ ابن مسعود نے ایک سواری مستعار لی۔ پس وہ سواری اس حال میں آپ کے پاس لائی گئی کہ اس پر چیتوں کا سائبان تھا۔ آپ نے اس کو اتار دیا پھر سوار ہوئے۔

حضرت علی رضی اللہ عنہ بن حکیم سے روایت ہے کہ میں نے حضرت حکیم سے چیتوں کی کھالوں کے بارے میں سوال کیا ؟ تو انہوں نے فرمایا : درندوں کی کھالوں (کا استعمال) مکروہ ہے۔

حضرت حکم فرماتے ہیں کہ حضرت عمر نے اہل شام کو خط لکھ کر انہیں درندوں کی کھالوں پر سوار ہونے سے منع کیا۔

حضرت ابو الملیح فرماتے ہیں کہ نبی کریم صلی اللہ علیہ وآلہ وسلم نے درندوں کی کھالوں کو بچھونا بنانے سے منع فرمایا۔

حضرت علی رضی اللہ عنہ سے روایت ہے کہ وہ لومڑیوں کی کھالوں پر نماز پڑھنے کو مکروہ قرار دیتے تھے۔ اور (امام) ابوحنیفہ کا قول یہ ذکر کیا گیا ہے کہ : ان کھالوں پر بیٹھنے میں کوئی حرج نہیں ۔