مصنف ابن ابي شيبه

حضرت حارث، حضرت علی رضی اللہ عنہ سے بطور روایت بیان کرتے ہیں کہ میں نے تم سے گھوڑوں اور غلاموں کی زکوۃ کے بارے میں چشم پوشی کی ہے۔

حضرت ابوہریرہ نبی کریم صلی اللہ علیہ وآلہ وسلم تک پہنچاتے ہوئے روایت بیان کرتے ہیں کہ مسلمان پر اس کے غلام اور اس کے گھوڑے میں کوئی زکوۃ نہیں ہے۔

حضرت ابوہریرہ سے روایت ہے کہ نبی کریم صلی اللہ علیہ وآلہ وسلم کا ارشاد ہے کہ بندہ مؤمن پر اس کے غلام اور اس کے گھوڑے میں زکوۃ (واجب) نہیں ہے۔

حضرت شبیل بن عوف بیان کرتے ہیں۔ انہوں نے جاہیت کا زمانہ پایا تھا کہ حضرت عمر بن خطاب نے لوگوں کو زکوۃ کا حکم دیا تو لوگوں نے عرض کیا : اے امیر المؤمنین ! ہمارے گھوڑے اور ہمارے غلام ! ّآپ ہم پر دس دس فرض کر دیجئے۔ حضرت عمر نے فرمایا : میں تو تم پر اس بارے میں کچھ فرض نہیں کرتا۔

حضرت ابن عباس رضی اللہ عنہما سے روایت ہے کہ راہ خدا میں لڑنے والے گھوڑے پر کوئی زکوۃ نہیں ہے۔

حضرت سعید بن مسیب سے سوال کیا گیا کہ کیا بار برداری کے گھوڑے میں زکوۃ ہے ؟ انہوں نے فرمایا : کیا گھوڑے میں زکوۃ ہے ؟

حضرت نافع بیان کرتے ہیں کہ عمر بن عبد العزیز نے فرمایا : گھوڑوں میں زکوۃ نہیں ہے۔

حضرت مکحول فرماتے ہیں کہ غلام اور گھوڑے میں صدقۃ الفطر کے سوا زکوۃ نہیں ہے۔ اور (امام) ابوحنیفہ کا قول یہ ذکر کیا گیا ہے کہ : اگر گھوڑوں میں نر اور مادہ ہوں اور ان سے افزائش نسل کا کام لیا جائے تو پھر گھوڑوں میں زکوۃ ہے۔