مصنف ابن ابي شيبه

حضرت مکحول رضی اللہ عنہ فرماتے ہیں کہ خمس بھی فئی کی طرح ہے، اس میں سے امام مالدار اور فقیر دونوں کو دے گا۔ حضرت عمر بن عبدالعزیز نے تحریر فرمایا : جو عام فئی کا راستہ ہے وہ خمس کا بھی راستہ ہے۔

حضرت حجاج بن ثابت فرماتے ہیں کہ مجھے خبر پہنچی ہے کہ بنو عبدالمطلب کے دو شخص نبی کریم صلی اللہ علیہ وسلم کی خدمت میں حاضر ہوئے اور صدقہ کا مال مانگا۔ نبی کریم صلی اللہ علیہ وسلم نے ارشاد فرمایا : ابھی نہیں لیکن جب تم دیکھو میرے پاس خمس کا مال موجود ہے تو پھر تم میرے پاس آنا (میں عطا کر دوں گا) ۔

حضرت مجاہد فرماتے ہیں کہ آل محمد ﷺ کے لیے صدقہ حلال نہیں ہے۔ ان کو خمس کا خمس ملے گا۔

حسن سے مروی ہے کہ حضرت عمر رضی اللہ عنہ نے مال فیٔ میں سے ایک شخص کو دس ہزار، نو ہزار، آٹھ ہزار اور سات ہزار عطا فرمائے۔

حضرت جابر بن عبد اللہ رضی اللہ عنہ سے دریافت کیا گیا کہ نبی کریم صلی اللہ علیہ وسلم خمس کو کس طرح تقسیم فرماتے تھے ؟ حضرت جابر رضی اللہ عنہ نے ارشاد فرمایا : اللہ کے نبی ﷺ اس میں سے ایک مجاہد کو دیتے پھر دوسرے کو پھر تیسرے کو عطا فرماتے ۔