مصنف ابن ابي شيبه

حضرت قابوس کے والد رحمہ اللہ فرماتے ہیں کہ ایک عورت نے حضرت عائشہ رضی اللہ عنہا سے سوال کیا : کہ ہمارے پاس مجوسیوں کی عورتیں ہیں ان کی عید ہوتی ہے تو وہ ہمیں کھانے کی اشیاء ہدیہ کرتی ہیں۔ آپ رضی اللہ عنہا نے فرمایا : بہر حال وہ اشیاء جو اس دن ذبح کی جاتی ہیں تم ان کو نہ کھاؤ لیکن تم ان کے درختوں سے کھالیا کرو۔

حضرت ابو برزہ اسلمی رحمہ اللہ فرماتے ہیں کہ ان کے پاس کچھ مجوسی آباد تھے۔ تو یہ لوگ نیروز اور مہرجان والے دن ہمیں ہدیہ بھیجا کرتے تھے۔ تو آپ رحمہ اللہ اپنے گھر والوں سے فرماتے : جو پھل وغیرہ میں سے ہو اس کو تو قبول کرلیا کرو اور جو چیز اس کے علاوہ ہو اس کو لوٹا دیا کرو۔

حسن رحمہ اللہ فرماتے ہیں کہ حضرت ابو برزہ رضی اللہ عنہ نے ارشاد فرمایا : ہم لوگ کسی غزوہ میں شریک تھے۔ ہماری ملاقات مشرکین کے چند لوگوں سے ہوئی۔ تو ہم نے ان کو گرم راکھ پر بنی ہوئی روٹی کھانے سے روک دیا پھر ہم بھی اس میں پڑگئے اور ہم نے بھی اس کو کھانا شروع کردیا۔ اور ہم زمانہ جاہلیت میں سنتے تھے۔ جو شخص روٹی کھاتا ہے وہ فربہ ہوجاتا ہے۔ پس جب ہم نے یہ روٹی کھائی تو ہم میں سے ہر ایک اپنے کو یوں دیکھتا تھا کہ کیا وہ فربہ ہوگیا ؟

حضرت مغیرہ رحمہ اللہ فرماتے ہیں کہ حضرت ابو وائل رحمہ اللہ اور ابراہیم رحمہ اللہ دونوں حضرات نے ارشاد فرمایا : جب مسلمان آئے اور انہوں نے مجوسیوں کا کھانا پایا ، ان کا پنیر اور ان کی روٹیاں وغیرہ پس انہوں نے یہ چیزیں کھا لیں اور انہوں نے ان کے بارے میں سوال نہیں کیا۔

حضرت ہشام رحمہ اللہ فرماتے ہیں کہ حسن رحمہ اللہ اس کھانے کو ناپسند کرتے تھے جو مجوسیوں کے برتن میں پکایا گیا ہو۔ اور وہ ان کے کھانوں کو تناول فرمانے میں کوئی حرج نہیں سمجھتے تھے سوائے ان چیزوں کے ۔ گھی، پنیر، یا شوربہ یا مکھن یا دودھ وغیرہ کو۔

حضرت ہشام رحمہ اللہ فرماتے ہیں کہ حسن رحمہ اللہ نے ارشاد فرمایا : کوئی حرج نہیں مجوسیوں کے سرکہ میں اور ان کے شوربے میں اور ان کے دودھ وغیرہ میں۔

حضرت لیث رحمہ اللہ فرماتے ہیں کہ حضر ت مجاہد رحمہ اللہ نے ارشاد فرمایا : تم مجوسی کے کھانوں میں سے پھل کے سوا کچھ بھی مت کھاؤ۔

حضرت ہشام رحمہ اللہ فرماتے ہیں کہ حسن رحمہ اللہ اور حضرت محمد رحمہ اللہ ان دونوں حضرات نے ارشاد فرمایا : مشرکین اپنے برتنوں میں گھی لایا کرتے تھے ۔ اور رسول اللہ صلی اللہ علیہ وسلم کے صحابہ اور مسلمان ان کو خرید لیتے تھے۔ پھر وہ بھی کھاتے تھے اور ہم بھی اس کو کھالیتے۔

حضرت عاصم رحمہ اللہ فرماتے ہیں کہ حضرت ابو عثمان رحمہ اللہ نے ارشاد فرمایا : ہم لوگ گھی کھاتے تھے اور چربی و چکناہٹ نہیں کھاتے تھے۔ اور نہ ہی ہم برتنوں سے متعلق پوچھتے تھے۔

حضرت منصور رحمہ اللہ فرماتے ہیں کہ میں نے ابراہیم رحمہ اللہ سے پہاڑی گھی کے متعلق سوال کیا ؟ تو آپ رحمہ اللہ نے فرمایا : عربی مجھے زیادہ پسند ہے البتہ میں کھاتا پہاڑی گھی ہوں۔