مصنف ابن ابي شيبه

حضرت مرزوق بن عمرو رحمہ اللہ فرماتے ہیں کہ حضرت ابو فرقد رحمہ اللہ نے ارشاد فرمایا : میں نے حضرت ابو موسیٰ کی زرہوں پر دیباج اور ریشم دیکھا۔

حضرت ہشام رحمہ اللہ فرماتے ہیں کہ حضرت میرے والد حضرت عروہ بن زبیر رحمہ اللہ کے پاس ریشم کا ایک بھراؤ دار چوغہ تھا جسے وہ جنگ میں پہنتے تھے۔

حضرت لیث رحمہ اللہ فرماتے ہیں کہ حضرت عطاء رحمہ اللہ نے ارشاد فرمایا : کوئی حرج کی بات نہیں جبکہ وہ جبہ یا ہتھیار ہو۔

حضر ت حجاج رحمہ اللہ فرماتے ہیں کہ حضرت عطاء رحمہ اللہ نے فرمایا : جنگ میں ریشم پہننے میں کوئی حرج نہیں۔

حضرت منذر رحمہ اللہ فرماتے ہیں کہ حضرت علیاء بن احمر الیشکری یا حضرت ابن بریدہ رحمہ اللہ ان دونوں میں سے کسی ایک نے ارشاد فرمایا : کہ مہاجرین میں سے چند لوگوں نے حضرت عمر رضی اللہ عنہ سے کہا : جب ہم نے دشمن کو دیکھا تو ہم نے ان کو اس حال میں دیکھا کہ انہوں نے اپنے ہتھیار ریشم میں چھپائے ہوئے تھے۔ تو ہم یہ دیکھ کر گھبرا گئے ؟ اس پر حضرت عمر رضی اللہ عنہ نے ارشاد فرمایا : اگر تم لوگ چاہو تو تم بھی اپنے ہتھیاروں کو ریشم اور دیباج سے چھپالو۔

حضرت ابن عون رحمہ اللہ فرماتے ہیں کہ میں نے محمد رحمہ اللہ سے جنگ میں ریشم پہننے کے بارے میں سوال کیا ؟ تو آپ رحمہ اللہ نے فرمایا : وہ لوگ کہاں ریشم پاتے تھے ؟