مصنف ابن ابي شيبه

حسن روایت کرتے ہیں کہ حضرت عمر رضی اللہ عنہ نے اپنی اُمِّ ولد باندیوں کے لئے چار چار ہزار درہم کی وصیت کی تھی۔

حسن فرماتے ہیں کہ حضرت عمران بن حصین رضی اللہ عنہ نے اپنی اُمِّ ولد باندیوں کے لئے وصیت کی تھی۔

جعفر بن برقان فرماتے ہیں کہ میں نے میمون بن مہران سے پوچھا کہ کیا آدمی اپنی امِّ ولد باندی کے لئے وصیت کرسکتا ہے ؟ آپ نے فرمایا ایسا کرنا جائز ہے۔

جابر فرماتے ہیں کہ حضرت شعبی نے اپنی اُمِّ ولد باندی کے لئے وصیت کی تھی۔

حکم روایت کرتے ہیں کہ ابراہیم نے اس آدمی کے بارے میں فرمایا جو اپنی اُمِّ ولد باندی کو کچھ مال دے کہ اس کے لئے ایسا کرنا جائز ہے۔

معمر کہتے ہیں کہ میں نے یونس سے عرض کیا کہ اس آدمی کا کیا حکم ہے جس نے اپنی ام ولد باندی کو کچھ عطیہ دیا پھر مرگیا، فرمایا کہ حسن فرمایا کرتے تھے کہ وہ عطیہ اسی باندی کا ہے۔

حماد روایت کرتے ہیں کہ ابراہیم نے فرمایا : جب ام ولد باندی کوئی چیز اپنے آقا کی زندگی میں محفوظ کرلے اور پھر اس کا آقا مرجائے تو وہ چیز اسی باندی کی ہوگی، اور باندی آزاد ہوجائے گی، اور اگر مرنے والا مرنے سے پہلے کچھ واپس لے لے یا جو چیز باندی کے پاس ہے اس کے بارے میں وصیت کر دے تو اس کو ایسا کرنے کا اختیار ہے۔