مصنف ابن ابي شيبه

حضرت ابو اسحاق فرماتے ہیں کہ حضرت براء نے ارشاد فرمایا : سب سے آخری مکمل نازل ہونے والی سورة برائت ہے، اور قرآن میں سب سے آخری نازل ہونے والی آیت یہ ہے ( آپ سے فتوی پوچھتے ہیں ، کہو اللہ فتوی دیتا ہے تمہیں کلالہ کے بارے میں) ۔

حضرت اسماعیل بن ابی خالد فرماتے ہیں کہ حضرت سدّی نے ارشاد فرمایا : سب سے آخر میں یہ آیت نازل ہوئی ( اور ڈرو اس دن سے کہ جب لوٹ کر جاؤ گے تم اس دن اللہ کے حضور پھر پورا پورا دیا جائے گا ہر شخص کو (بدلہ) اس کے کمائے ہوئے عملوں کا اور ان پر ہرگز ظلم نہ ہوگا۔

حضرت مالک بن مغول فرماتے ہیں کہ حضرت عطیہ عوفی نے ارشاد فرمایا : آخری آیت یہ نازل ہوئی تھی ( اور ڈرو اس دن سے کہ جب لوٹ کر جاؤ گے تم اس دن اللہ کے حضور پھر پورا پورا دیا جائے گا ہر شخص کو ( بدلہ) اس کے کمائے ہوئے عملوں کا اور ان پر ہرگز ظلم نہ ہوگا) ۔

حضرت ابو السفر فرماتے ہیں کہ حضرت براء نے ارشاد فرمایا : سب سے آخر میں یہ آیت نازل ہوئی (آپ سے فتوی پوچھتے ہیں ِ ، کہو اللہ فتویٰ دیتا ہے تمہیں کلالہ کے بارے میں ) ۔

حضرت ابن ابی نجیح فرماتے ہیں کہ حضرت مجاہد نے فرمایا : یہ سورت سب سے پہلے نازل ہوئی (پڑھو ( اے نبی صلی اللہ علیہ وآلہ وسلم ) اپنے رب نام لے کر جس نے پیدا کیا۔ پھر سورة ن نازل ہوئی۔

حضرت ابو اسحاق فرماتے ہیں کہ حضرت براء نے ارشاد فرمایا : قرآن میں سب سے آخری آیت یہ نازل ہوئی (آپ سے فتویٰ پوچھتے ہیں کہو اللہ فتویٰ دیتا ہے تمہیں کلالہ کے بارے میں۔ )

حضرت عمرو بن دینار فرماتے ہیں میں نے حضرت عبید بن عمیر کو یوں فرماتے ہوئے سنا ہے کہ : قرآن میں سب سے پہلے یہ سورت نازل ہوئی (پڑھو ( اے نبی صلی اللہ علیہ وآلہ وسلم ) اپنے رب کا نام لے کر جس نے پیدا کیا پھر سورت ن نازل ہوئی۔ )

حضرت ابو رجائ فرماتے ہیں کہ میں نے حضرت ابو موسیٰ سے یہ سورت سیکھی (پڑھو ( اے نبی صلی اللہ علیہ وآلہ وسلم ) اپنے رب کا نام لے کر جس نے پیدا کیا ) یہ محمد (صلی اللہ علیہ وآلہ وسلم) پر نازل ہونے والی پہلی سورت ہے۔